အောက်တိုဘာ ၁၉ ။         ။ NLD ပါတီ ဥက္ကဋ္ဌ ဒေါ်အောင်ဆန်းစုကြည်အား လူမှုကွန်ရက်ပေါ်တွင် နောက်ပြောင် သရော် ထားမှုကို အရေးယူပေးရင် တရားလိုပြု တိုင်ကြားထားသူ ဦးစည်သူအောင်၏ ဇနီးမှာ ခြိမ်းခြောက်မှု များ ခံနေရကြောင်း မဇ္ဈိမကို ပြောသည်။

ကန်ကြီးထောင့်မြို့၊ မြို့မရဲစခန်းတွင် စက်တင်ဘာလ ၁၇ ရက်က အမှုဖွင့်ပြီးနောက် “တချို့ သတင်းစကားတွေ ကြားနေရတယ်။ ကျွန်တော်မိန်းမက ကျောင်းဆရာမ ဆိုတော့ NLD အင်္ကျီဝတ်လို့ အရေးယူ မယ်၊ တိုင်မယ်ဆိုတာတွေ ကြားနေတယ်” ဟု တရားလိုပြု တိုင်ကြားထားသည့် ဦးစည်သူ အောင်က ပြောသည်။

ဦးစည်သူအောင် ဇနီးမှ ကန်ကြီးထောင့်မြို့၊ ချောင်းစောက်ကျေးရွာ အခြေခံပညာ မူလတန်း လွန်ကျောင်းတွင် တာဝန် ထမ်းဆောင်နေသည့် ကျောင်းဆရာမ တစ်ဦးဖြစ်သည်။

တိုင်ကြားခံထားရသူမှ ကန်ကြီးထောင့်မြို့နယ် ပြည်ထောင်စု ကြံ့ခိုင်ရေးနှင့် ဖွံဖြိုးရေးပါတီ တွဲဘက်အတွင်းအရေးမှူး ဖြစ်ကြောင်း သိရသည်။ တိုင်ကြားထားသူက ဒေါ်အောင်ဆန်းစုကြည် ဓါတ်ပုံအား ကန့်တော့ရန် တောင်းဆိုခဲ့ထားပြီး တဘက်မှ မီဒီယာများ ရှေ့မှောက်တွင် တောင်ပန်းခြင်း မပြုနိုင်ကြောင်း ပြောသဖြင့် အမှုဖွင့်ခြင်းဖြစ်ကြောင်း သိရှိရသည်။

အမှုဖွင့် ခံထားရသူအား ဖမ်းဆီးရမိခြင်း မရှိသေးပေ။ အမှုအား ကန်ကြီးထောင့်မြို့၊ မြို့မ ရဲစ ခန်းတွင် ပ၁၅၇/၂၀၁၅ နှင့် အီလက်ထော့နစ်ပုဒ်မ ၆၆(ဃ)ဖြင့် စက်တင်ဘာ ၁၇ ရက်တွင် အမှုဖွင့် ထားကြောင်း သိရှိရသည်။

ဖြစ်စဉ်မှာ Thu Thu အကောင့်ဖြင့် လူမှုကွန်ယက် စာမျက်နှာပေါ်တွင် စက်တင်ဘာလ ၂ ရက် နေ့တွင် ဒေါ်အောင်ဆန်းစုကြည်ပုံကို ဓာတ်ပုံပညာဖြင့် ပြန်လည်ပြင်ဆင်လျက် သရော်ထားခြင်း ဖြစ်သည်။