မဲဆန္ဒရှင်များကို ချက်သမ္မတနိုင်ငံ အထူးဂုဏ်ပြု

မဲဆန္ဒရှင်များကို ချက်သမ္မတနိုင်ငံ အထူးဂုဏ်ပြု

နိုဝင်ဘာ ၈ ရက် ရွေးကောက်ပွဲတွင် စနစ်တကျ မဲပေးခဲ့ကြပြီး နိုင်ငံသား အခွင့်အရေးကို အပြည့်အဝ အသုံးချခဲ့ကြသည့် မဲဆန္ဒရှင်များကို အထူးဂုဏ်ပြုပါကြောင်း ချက်သမ္မတနိုင်ငံ နိုင်ငံခြားရေး ဝန်ကြီးဌာနက နိုဝင်ဘာ ၁၂ ရက်က ထုတ်ပြန်သည်။

“အလုံးအရင်းနှင့် ပါဝင်ပြီး ၂၅နှစ်ကြာမြင့်ပြီးမှ ရလာသည့် အခွင့်အရေးကို အပြည့်အ၀ အသုံးချပြီး မိမိတို့၏ ဆန္ဒကို ပြတ်ပြတ်သားသား ထုတ်ဖော်ပြသခဲ့ကြသည့် မြန်မာ မဲဆန္ဒရှင်များကို အထူး ဂုဏ်ပြုရမည်” ဟု ထုတ်ပြန်ချက်တွင် ပါရှိသည်။

ကျင်းပခဲ့သည့် ရွေးကောက်ပွဲသည် လွတ်လပ်သည့် ရွေးကောက်ပွဲဟု ထုတ်ပြန်ချက်တွင် ညွှန်းဆိုထားပြီး အားတက်ဖွယ် ဖြစ်သည်ဟုလည်း ချီးမွမ်းထားသည်။ “ရွေးကောက်ပွဲကို တည်ငြိမ် အေးချမ်းစွာနှင့် လွတ်လပ်သည်ဟု ပြောနိုင်သည့် အနေအထားဖြင့် ပြုလုပ်သွားနိုင်သည်ကို အားတက်ဖွယ်ရာ တွေ့ရသည်” ဟုလည်း ထုတ်ပြန်ချက်တွင် ပါရှိသည်။

ရွေးကောက်ပွဲသည် သမိုင်းမှတ်တိုင် တစ်ခုဖြစ်ပြီး ရွေးကောက်ပွဲအလွန် ဖွံ့ဖြိုးတိုးတက်မှုကို ခိုင်မာစေလိမ့်မည်ဟု ထုတ်ပြန်ချက်တွင် ဖေါ်ပြထားပြီး တိုင်းရင်းသား စည်းလုံး ညီညွတ်မှုနှင့် အမျိုးသား ရင်ကြားစေ့ရေးကို စွမ်းဆောင်ရန်လည်း ချက်သမ္မတနိုင်ငံက တိုက်တွန်းသည်။

အလားတူ “ချတ်သမ္မတနိုင်ငံ အနေဖြင့် မြန်မာနိုင်ငံတွင် ဒီမိုကရေစီ ပြုပြင်ပြောင်းလဲရေး လုပ်ငန်းများကို ဆက်လက် ထောက်ခံသွားရန် အသင့်ရှိနေပြီး မြန်မာပြည်သူများ၏ ဒီမိုကရေစီ ရည်မှန်းချက်များကို ကူညီ ဖြည့်ဆည်းသွားမည်” ဟုလည်း ဆိုထားသည်။

Mizzima Weekly

Tags