အောက်တိုဘာ ၃၀ ။ ။ အမျိုးသားဒီမိုကရေစီအဖွဲ့ချုပ်ဥက္ကဋ္ဌ ဒေါ်အောင်ဆန်းစုကြည်သည် နိုဝင်ဘာ ၅ ရက်နေ့၌ တက္ကသိုလ်ရိပ်သာလမ်း ခြံအမှတ် ၅၄၊ ၎င်း၏နေအိမ်တွင် သတင်းစာရှင်းလင်းပွဲ တစ်ရပ်ပြုလုပ်မည်ဟု ပါတီအောင်နိုင်ရေးအဖွဲ့က ပြောသည်။
''နိုဝင်ဘာ ၅ ရက်နေ့ မနက် ၉ နာရီခြံထဲမှာ သတင်းစာရှင်းလင်းပွဲ လုပ်မှာပါ။ မဲဆွယ်ပွဲအတွေ့အကြုံ ရှင်းမှာဖြစ်နိုင်သလို တခြားဘာ အကြောင်းအရာတွေကို ရှင်းမလဲဆိုတာတော့ အတိအကျမသိရသေးဘူး။'' ဟု ပါတီအောင်နိုင်ရေးအဖွဲ့ဝင် ပါတီဗဟိုကော်မတီဝင် ဦးသိန်းဦးက မဇ္ဈိမသို့ပြောသည်။
မဲဆွယ်စည်းရုံးစဉ်အတွေ့အကြုံများအား ရှင်းလင်းမည်ဖြစ်ပြီး အခြားသော အကြောင်းအရာများလည်း ဦးတင်ဦးနှင့် ဒေါ်အောင်ဆန်းစုကြည်တို့ နှစ်ဦးက ပြောကြားမည်ဟု ဗဟိုကော်မတီဝင် ဦးကြည်တိုးက ပြောသည်။
''၂ ရက်နေ့ အတိအကျ ကြေညာပေးမယ်။ ၃ ရက်နဲ့ ၄ ရက်နေ့တွေမှာ သတင်းစာ၊ ဂျာနယ်တစ်တိုက်ကို နှစ်ဦး စာရင်း ပေးပြီး ကတ်ပြားလာထုတ်လို့ရပါတယ်။ အမေး အဖြေ ကဏ္ဍလည်းပါတော့ မေးခွန်းတွေ ကြိုရေးလာပေါ့။'' ဟု၎င်းက မဇ္ဈိမသို့ ပြောသည်။
ထို့ပြင် နိုဝင်ဘာ ၁ ရက်နေ့၌လည်း သင်္ကန်းကျွန်းမြို့နယ်၊ သုဝဏ္ဏမြို့ဦးစေတီတော်ဝင်း အတွင်း၌ ဒေါ်အောင်ဆန်းစုကြည် လာရောက်ဟောပြောမည်ဟု အဖွဲ့ချုပ်ဗဟိုကော်မတီဝင် ဦးဝင်းထိန်က ပြောသည်။
''နိုဝင်ဘာ ၁ ရက်နေ့ သုဝဏ္ဏမြို့ဦးစေတီမှာ လူထုတွေ့ဆုံဟောပြောပွဲလုပ်ဖို့ ခွင့်ပြုမိန့်ကျပြီးပါပြီ။ ဘဘဦးတင်ဦး အရင်ပြောမယ်၊ ပြီးရင် အစ်မစု ဟောပြောမယ်။'' ဟု ၎င်းကပြောသည်။
ထိုနေ့တွင်ပင် ဟောပြောပွဲပြီးလျှင် ရွှေဂုံတိုင်ရှိ တော်ဝင်နှင်းဆီခန်းမ၌ ရန်ကုန် အရှေ့ပိုင်းခရိုင်၊ အနောက်ပိုင်းခရိုင်၊ မြောက်ပိုင်းခရိုင်တို့မှ လွှတ်တော်အသီးသီး၌ ဝင်ရောက် ရွေးချယ်ခံကြမည့် ကိုယ်စားလှယ်လောင်းများနှင့် တွေ့ဆုံရန် ရှိသည်ဟု ပါတီအောင်နိုင်ရေးအဖွဲ့မှ သိရသည်။
