နေပြည်တော်(ဇန်နဝါရီ ၃၁ရက်၊ ၂၀၁၇ခုနှစ်)။ ။ အမျိုးသားဒီမိုကရေစီအဖွဲ့ချုပ်(NLD)အစိုးရသက်တမ်းအတွင်း ပထမဆုံးတောင်းခံသည့် အသုံးစရိတ်ငွေများအနက် ကာကွယ်ရေးဝန်ကြီးဌာနက တောင်းခံသည့် အသုံးစရိတ်ပမာဏမှာ ယခင်(၂)နှစ်ထက် လျော့နည်းလာသည်ကို တွေ့ရသည်။

၂၀၁၇-၂၀၁၈ ရသုံးခန့်မှန်းခြေငွေစာရင်းတွင် ကာကွယ်ရေးဝန်ကြီးဌာနက တောင်းခံထားသည့် အသုံးစရိတ်စုစုပေါင်းမှာ ကျပ်ငွေ ၂၉၀၅ဒဿမ ၁၉၅ ဘီလီယံ ဖြစ်သည်။

ပြည်ထောင်စုအဆင့်ဌာနအဖွဲ့အစည်းများက တောင်းခံသည့် အသုံးစရိတ်စုစုပေါင်းမှာ ကျပ်ဘီလီယံ ၂၀,၈၉၆ ဖြစ်ပြီး စုစုပေါင်းအသုံးစရိတ်၏ ၁၃ဒဿမ ၉၅ရာခိုင်နှုန်းဖြစ်သော ကျပ်ငွေ ၂၉၀၅ဒဿမ ၁၉၅ ဘီလီယံအား ကာကွယ်ရေးဝန်ကြီးဌာနက တောင်းခံထားခြင်း ဖြစ်သည်။

“၂၀၁၇-၂၀၁၈ခုနှစ်အတွက် ဘဏ္ဍာငွေတောင်းခံမှုဟာ ယခင်(၂)နှစ်ထက် လျှော့နည်းလာတာကို တွေ့ရှိရမှာ ဖြစ်ပါတယ်” ဟု ကာကွယ်ရေးဝန်ကြီးဌာန၊ ဒုတိယဝန်ကြီး ဗိုလ်ချုပ် မြင့်နွယ်က ပြည်ထောင်စုလွှတ်တော်သို့ လာရောက်ရှင်းလင်းတင်ပြစဉ် ဇန်နဝါရီ ၃၁ရက်က ပြောကြားသည်။

ကာကွယ်ရေးဝန်ကြီးဌာန၏ အသုံးစရိတ်များမှာ ၂၀၁၅-၂၀၁၆ ဘဏ္ဍာနှစ်တွင် ကျပ်ငွေ ၃၀၄၀ဒဿမ၀၈ဘီလီယံဖြစ်ပြီး ၂၀၁၆-၂၀၁၇ခုနှစ်တွင် ကျပ်ငွေ ၂၉၉၀ဒဿမ၅၇ဘီလီယံဖြစ်ကြောင်း ဗိုလ်ချုပ်မြင့်နွယ်က လွှတ်တော်တွင် Power Point ဖြင့် ရှင်းပြခဲ့သည်။

ကာကွယ်ရေးဝန်ကြီးဌာနက တောင်းခံထားသည့် အသုံးစရိတ်များအနက် လစာနှင့် စရိတ်များ၊ ပစ္စည်းများ၊ ပို့ဆောင်ရေး၊ အင်ဂျင်နီယာ၊ စက်ရုံ/အလုပ်ရုံများနှင့် စစ်ဆင်ရေးအတွက် သာမန်အသုံးစရိတ်အဖြစ် ကျပ်ငွေ ၁၆၅၄ဒဿမ ၃၃ဘီလီယံ တောင်းခံထားသည်။ ထိုအထဲတွင် စစ်ဆင်ရေးအသုံးစရိတ်အဖြစ် ကျပ်သန်းပေါင်း - ၄၂၀၃ဒဿမ ၅၇ တောင်းခံထားသည်ကို တွေ့ရသည်။

ထို့ပြင် ဆောက်လုပ်ရေးအသုံးစရိတ်၊ စက်ပစ္စည်း အသုံးစရိတ်နှင့် အခြားအသုံးစရိတ်တို့ဖြစ်သည့် ငွေလုံးငွေရင်း အသုံးစရိတ်အဖြစ် ကာကွယ်ရေးဝန်ကြီးဌာနက တောင်းခံထားသည့် ငွေပမာဏမှာ ငွေကျပ် ၁၂၅၀ဒဿမ ၈၆၅ဘီလီယံ ဖြစ်သည်။

အဆိုပါ ငွေလုံးငွေရင်းအသုံးစရိတ်သည် ၂၀၁၆-၂၀၁၇ ဘဏ္ဍာရေးနှစ်ထက် ၈၆ဒဿမ ၅၃၃ ဘီလီယံ လျော့နည်း တောင်းခံထားသည်ဟု ဗိုလ်ချုပ် မြင့်နွယ်က လွှတ်တော်တွင် ပြောသည်။

ကာကွယ်ရေးဝန်ကြီးဌာနအနေဖြင့် ရငွေအဖြစ် ကျပ်ငွေ ၇၃ဒဿမ ၁၁၁ဘီလီယံ ရရှိမည်ဖြစ်ကြောင်း့ ၂၀၁၇-၂၀၁၈ ရသုံးမှန်းခြေငွေစာရင်းတွင် ဖော်ပြထားသည်။