နေပြည်တော်(အောက်တိုဘာ ၂၁ရက်၊ ၂၀၁၆ခုနှစ်)။ ။ တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA)ကို လက်မှတ်မရေးထိုးဘဲ NCA စာချုပ်ပါ ကိစ္စရပ်များကို ကျော်လွန်ပြီး အမျိုးသားအဆင့်ဆွေးနွေးပွဲများသို့သွားနိုင်ရန် ကြိုးစားနေခြင်းဟာ မဖြစ်သင့်ဟု တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ပြောကြားလိုက်သည်။
“NCA ကို လက်မှတ်ရေးထိုးခြင်း မရှိဘဲ NCA စာချုပ်ပါကိစ္စရပ်များကို ကျော်လွန်ပြီး အမျိုးသားအဆင့် ဆွေးနွေးပွဲများသို့ သွားနိုင်ရန် ကြိုးစားနေခြင်းဟာ မဖြစ်သင့်ပါဘူး။ ကျွန်တော်တို့ ဘာတွေလုပ်ခဲ့ကြတယ်။ ဘယ်လို သဘောထားတွေရှိခဲ့ကြတယ်။ ငြိမ်းချမ်းရေးကို ဘယ်လိုဖော်ဆောင် ခဲ့ကြတယ်ဆိုတာကို သမိုင်းကသက်သေခံပါလိမ့်မယ်” ဟု ဗိုလ်ချုပ်မှူးကြီး မင်းအောင်လှိုင်က ပြောသည်။
နေပြည်တော်ရှိ MICC-1တွင် ၂၀၁၆ခုနှစ်၊ အောက်တိုဘာ ၁၅ရက်က ကျင်းပပြုလုပ်သည့် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA) လက်မှတ်ရေးထိုးခြင်းနှစ်ပတ်လည်အခမ်းအနားတွင် ဗိုလ်ချုပ်မှူးကြီး မင်းအောင်လှိုင်က ထိုသို့ ပြောဆိုလိုက်ခြင်းဖြစ်သည်။
“ပစ်ခတ်တိုက်ခိုက်မှုတွေ မရပ်စဲဘဲ လုပ်နေတဲ့ တွေ့ဆုံမှုတွေ၊ ဆွေးနွေးပွဲတွေဟာ သံသယစိတ်တွေ၊ မယုံကြည်စိတ်တွေ၊ အခက်အခဲအနည်းငယ်ရှိတာနဲ့ လက်နက်ကိုင်လမ်းစဉ်ကိုသာ ပြန်လည်ငဲ့စောင်းသွားလိုတဲ့ စိတ်တွေနဲ့ ပြည့်နှက်နေမှာ အမှန်ပဲဖြစ်ပါတယ်” ဟုလည်း ဗိုလ်ချုပ်မှူးကြီးက ပြောသည်။
NCA တွင် အားလုံးပါဝင်နိုင်ရေးနှင့်ပတ်သက်ပြီး တပ်မတော်နှင့် အစိုးရအနေဖြင့် မူဝါဒပိုင်းဆိုင်ရာ ဖြေလျှော့မှုအချို့ပြုလုပ်ပေးရန် NCAတွင် လက်မှတ်ရေးထိုးထားသည့် ကရင်အမျိုးသားအစည်းအရုံး(KNU)က လက်မှတ်ထိုးထားသည့်အဖွဲ့အားလုံး၏ကိုယ်စား တောင်းဆိုကြောင်း KNU ဥက္ကဌ ဗိုလ်ချုပ်ကြီးစောမူတူးစေးဖိုးက ယင်းအခမ်းအနားတွင် ပြောဆိုသည်။
“NCA လက်မှတ်ရေးထိုးခြင်းမရှိသေးတဲ့ ညီနောင်တိုင်းရင်းသားလက်နက်ကိုင်အဖွဲ့စည်းတွေ ပါဝင်လက်မှတ်ထိုးနိုင်အောင် လက်တွေ့လမ်းဖွင့်ပေးရာမှာ အစိုးရဘက်မှ တပ်မတော်ဘက်မှ သဘောထားကြီးပြီး မူဝါဒဆိုင်ရာမှာ ဖြေလျှော့မှုအချို့ပြုလုပ်ခြင်း၊ အင်အားသုံးတိုက်ခိုက်မှုတွေကို ရပ်ဆိုင်းထားခြင်းတို့ကိုပြုလုပ်ပေးဖို့ NCA လက်မှတ်ရေးထိုးထားတဲ့လက်နက်ကိုင်တွေကိုယ်စား တောင်းဆိုလိုပါတယ်”ဟု ဗိုလ်ချုပ်ကြီး စောမူတူးစေးဖိုးက ပြောသည်။
လက်ရှိတွင် NCA စာချုပ်ကို တိုင်းရင်းသားလက်နက်ကိုင်အဖွဲ့အစည်း (၈)ဖွဲ့ကသာ ပြီးခဲ့သည့် သမ္မတဦးသိန်းစိန်အစိုးရလက်ထက် ၂၀၁၅ခုနှစ်၊ အောက်တိုဘာ ၁၅ရက်တွင် ရေးထိုးရသေးသည်။
NCA လက်မှတ်ရေးထိုးမှုနှင့်ပတ်သက်ပြီး နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကလည်း “အခု NCA လက်မှတ်ထိုးပြီးတာက တစ်နှစ်ကြာပြီ။ တစ်နှစ်ကြာပြီဆိုပေမယ့်လည်း မထိုးသေးတဲ့အဖွဲ့တွေ တစ်ခုမှ ထပ်ပြီးတော့ မထိုးသေးတာဟာ ကျွန်မတို့အတွက် အင်မတန်မှ ဝမ်းနည်းစရာဖြစ်ပါတယ်” ဟု နှစ်ပတ်လည်အခမ်းအနားတွင် ပြောဆိုသည်။
NCAတွင် လက်မှတ်မရေးထိုးရသေးသော ညီညွတ်သောတိုင်းရင်းသားလူမျိုးများဖက်ဒရယ်ကောင်စီ(UNFC)၏ နိုင်ငံရေးဆိုင်ရာညှိနှိုင်းဆွေးနွေးရေးဆိုင်ရာကိုယ်စားလှယ်အဖွဲ့(DPN)ကမူ NCAကို အထောက်အကူဖြစ်စေမည်ဟူသည့် အချက်(၈)ချက်ကို အစိုးရထံသို့ တင်ပြထားသည်။
အဆိုပါ အချက်(၈)ချက်နှင့်ပတ်သက်ပြီး DPNနှင့် အစိုးရ၏ ငြိမ်းချမ်းရေးကော်မရှင်အဖွဲ့တို့ ယနေ့မွန်းလွဲပိုင်းတွင်ပင် နေပြည်တော်၊ သင်္ဂဟဟိုတယ်တွင် တွေ့ဆုံဆွေးနွေးခဲ့ကြသည်။
၃နာရီကျော်ကြာမြင့်သည့် အဆိုပါဆွေးနွေးပွဲတွင် တစ်ဝက်ကျော်ကိုသာ ပြီးပြီးအောင်ဆွေးနွေးနိုင်ခဲ့ပြီး လာမည့် နိုဝင်ဘာလဆန်းပိုင်းတွင် ထပ်မံဆွေးနွေးသွားမည်ဟု သိရသည်။
