နေပြည်တော်(စက်တင်ဘာ ၂၁ရက်၊ ၂၀၁၆ခုနှစ်)။ ။ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် မြန်မာနိုင်ငံရှိ စီးပွားရေးလုပ်ငန်းရှင်များ၊ ဖွံ့ဖြိုးတိုးတက်မှု မိတ်ဖက်အဖွဲ့အစည်းများနှင့် နေပြည်တော်ရှိ မြန်မာအပြည်ပြည်ဆိုင်ရာကွန်ဗင်းရှင်းဗဟိုဌာန(MICC-2)တွင် စက်တင်ဘာ ၂၈ရက်တွင် တွေ့ဆုံသွားမည်ဖြစ်သည်။
အမေရိကန်အစိုးရက စီပွားရေးပိတ်ဆို့အရေးယူများကို ဖြေလျှော့လိုက်သည့် အမေရိကန်ခရီးစဉ်အပြီးတွင် ဒေါ်အောင်ဆန်းစုကြည်က စီးပွားရေးလုပ်ငန်းရှင်များနှင့် ပထမဆုံးအကြိမ် တွေ့ဆုံမည့် တွေ့ဆုံပွဲတစ်ခုလည်း ဖြစ်သည်။
ဒေါ်အောင်ဆန်းစုကြည်ဦးဆောင်သည့် အစိုးရသစ်သက်တမ်းသည် ငါးလခန့်ရှိလာပြီဖြစ်ပြီး အစိုးရက စီးပွားရေးမူဝါဒများကိုလည်း ချမှတ်ထားပြီးဖြစ်သည်။
စက်တင်ဘာ ၂၈ရက်တွင်ပြုလုပ်မည့် ဒေါ်အောင်ဆန်းစုကြည်နှင့် စီးပွားရေးလုပ်ငန်းရှင်များတွေ့ဆုံပွဲသို့ တက်ရောက်သတင်းရယူမည့် မီဒီယာများကိုလည်း ပြန်ကြားရေးဝန်ကြီးဌာနက အမည်စာရင်းတောင်းခံလျက်ရှိသည်။
