မြို့နယ်၊ ခရိုင်အသီးသီးတွင် ကိုးကွယ်ရာဘာသာအလိုက် လူဦးရေစာရင်း ထုတ်ပြန်မည်

မြို့နယ်၊ ခရိုင်အသီးသီးတွင် ကိုးကွယ်ရာဘာသာအလိုက် လူဦးရေစာရင်း ထုတ်ပြန်မည်
(ဓာတ်ပုံ- မင်းမင်း/မဇ္ဈိမ)

နေပြည်တော်(မေလ ၂၇ရက်၊ ၂၀၁၆ခုနှစ်)။ ။ မြန်မာနိုင်ငံအတွင်းရှိ မြို့နယ်၊ ခရိုင်အသီးသီးတွင် ကိုးကွယ်ရာဘာသာအလိုက် လူဦးရေစာရင်းများကို အစိုးရ၏ ရက်(၁၀၀)စီမံချက်အတွင်း ထုတ်ပြန်ပေးသွားမည်ဟု အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ ပြည်ထောင်စုဝန်ကြီး ဦးသိန်းဆွေက ပြောဆိုလိုက်သည်။

၂၀၁၄ခုနှစ်အတွင်းက ကောက်ယူခဲ့သော သန်းခေါင်စာရင်းတွင် ထုတ်ပြန်ရန် ကျန်ရှိနေသေးသည့် ဘာသာရေးဆိုင်ရာအချက်အလက်များကို အစိုးရသစ်၏ ရက်(၁၀၀)စီမံချက်အတွင်း ထုတ်ပြန်ပေးမည်ဟု ဝန်ကြီးက ပြောဆိုလိုက်ခြင်း ဖြစ်သည်။

"ဘယ်မြို့နယ်မှာ ဘယ်ဘာသာဝင်တွေ ရှိနေတယ်။ ဘယ်ခရိုင်မှာ ဘယ်ဘာသာဝင်တွေ ရှိနေတယ်။ အင်အားတွေ အဲ့ဒါတွေ ထုတ်ပေးဖို့ ရှိနေသေးတယ်။ အဲ့ဒါကို ရက်တစ်ရာအတွင်းမှာ သက်ဆိုင်ရာအဖွဲ့အစည်းတွေနဲ့ ညှိနှိုင်းပြီးတော့မှ ဆွေးနွေးပွဲတွေ လုပ်ပြီးတော့မှ ဒီအချက်အလက်တွေကို ပြည်သူကို တိတိကျကျ ထုတ်ပြန်သွားဖို့ ရှိပါတယ်" ဟု ဦးသိန်းဆွေက ပြောသည်။

သန်းခေါင်စာရင်းအရ မြန်မာနိုင်ငံအတွင်း လူဦးရေ ၅၁.၄ သန်းကျော်ထိ ရှိသည်ဟု ဗဟိုသန်းခေါင်စာရင်း ကော်မရှင်က ၂၀၁၄ခုနှစ် သြဂုတ်လနှင့် ၂၀၁၅ခုနှစ် မေလတို့တွင် အသီးသီးထုတ်ပြန်ခဲ့ပြီး ဖြစ်သည်။

လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာနက ဦးဆောင်ကာ နိုင်ငံတကာ လူဦးရေရံပုံငွေအဖွဲ့နှင့် ၂၀၁၄ခုနှစ် မတ်လ ၂၉ရက်မှ ဧပြီလ ၁၀ရက်အထိ ၁၂ရက်ကြာအောင် ပြည်လုံးကျွတ်သန်းခေါင်စာရင်းကို ကောက်ခံခဲ့ခြင်းဖြစ်သည်။

ယင်းသို့ကောက်ခံရာတွင် မြန်မာနိုင်ငံအတွင်းရှိ အိမ်ထောင်စုပေါင်း ၁၁သန်းကို မေးခွန်း ၄၁ခုအထိ မေးမြန်းကာ အချက်အလက် ကောက်ခံခဲ့ခြင်းလည်း ဖြစ်သည်။

အစိုးရသစ်၏ ရက်(၁၀၀)စီမံချက်အရ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနမှ လုပ်ငန်းပေါင်း (၁၃)ခုကို လုပ်ဆောင်သွားမည်ဟု ဝန်ကြီးဦးသိန်းဆွေက မေလ ၂၆ရက်တွင် မဇ္ဈိမသတင်းဌာန၊ ဘီဘီစီမြန်မာပိုင်း၊ ဧရာဝတီသတင်းဌာနတို့နှင့် သီးသန့်တွေ့ဆုံစဉ် ပြောဆိုခဲ့သည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly