နေပြည်တော်(မေလ ၁၁ရက်၊ ၂၀၁၆ခုနှစ်)။ ။ မြန်မာနိုင်ငံသားများ လိုလားလက်ခံခြင်းမရှိသည့် ‘ရိုဟင်ဂျာ’ ဟူသည့် အသုံးအနှုန်းအား သတိပြုသွားမည်ဟု အမေရိကန်သံအမတ်သစ် H.E. Scot Marciel က မေလ ၁၁ရက်တွင် ပြောဆိုခဲ့ကြောင်း သူရဦးရွှေမန်း၏ လူမှုကွန်ယက်တွင် ရေးသားထားသည်။

‘ရိုဟင်ဂျာ’ ဟူသည့် အသုံးအနှုန်းအား သုံးစွဲခဲ့ရခြင်းမှာလည်း မြန်မာနိုင်ငံသားများ၏ သဘောထားကို အလေးမထား၊ ဆန့်ကျင်လိုခြင်းကြောင့်မဟုတ်ဘဲ ၎င်းအတွက် အခြားသောစကားရပ်မရှိသောကြောင့်ဟု အမေရိကန်သံအမတ်က ပြောဆိုခဲ့သည်ဟု သူရဦးရွှေမန်းက ရေးသားထားသည်။

ဥပဒေရေးရာနှင့် အထူးကိစ္စရပ်များ လေ့လာဆန်းစစ်သုံးသပ်ရေး ကော်မရှင်ဥက္ကဋ္ဌ သူရဦးရွှေမန်းနှင့် အမေရိကန်သံအမတ်ကြီးတို့သည် မေလ ၁၁ရက်၊ နံနက် ၁၀နာရီအချိန်တွင် နေပြည်တော်လွှတ်တော်ဝင်းအတွင်းရှိ ကော်မရှင်အဆောက်အဦ I – 1တွင် တွေ့ဆုံခဲ့ခြင်း ဖြစ်သည်။

အဆိုပါ တွေ့ဆုံမှုတွင် သူရဦးရွှေမန်းက မြန်မာနိုင်ငံသားများ လက်ခံနိုင်ခြင်းမရှိသည့် ‘ရိုဟင်ဂျာ’ ဟူသည့် အသုံးအနှုန်းအား သံအမတ်ကြီးအနေဖြင့် သတိပြုရမည့်အချက်ဖြစ်သည်ဟု ပြောဆိုခဲ့ကြောင်းလည်း လူမှုကွန်ယက်တွင် သူရဦးရွှေမန်းက ရေးသားထားသေးသည်။

ဒေါ်အောင်ဆန်းစုကြည်ဦးဆောင်သည့် အစိုးရက ရိုဟင်ဂျာဟူသော စကားလုံးမသုံးနှုန်းရန် တိုက်တွန်းထားသော်လည်း ဖိနှိပ်ခံမွတ်စလင်များအတွက် ရိုဟင်ဂျာဟူသော အသုံးအနှုန်းကိုပင် ဆက်လက်သုံးစွဲသွားမည်ဟု မြန်မာနိုင်ငံဆိုင်ရာ အမေရိကန်သံအမတ်ကြီးသစ်က မေ ၁၀ ရက်တွင် ပြောလိုက်ကြောင်း ရိုက်တာ သတင်းက ဖော်ပြထားသည်။

လူဦးရေ ၁ ဒဿမ ၁ သန်းနီးပါးရှိသည့် ရိုဟင်ဂျာဟုဆိုသူများကို မြန်မာနိုင်ငံရှိ လူအများစုက ဘင်္ဂလားဒေ့ရှ်မှ တရားမဝင်ခိုးဝင်လာသူ ဘင်္ဂလီများအဖြစ် လက်ခံထားသည်။ ယင်းရိုဟင်ဂျာ အသုံးအနှုန်းကြောင့်လည်း သဘောထားကွဲလွဲမှုများ ဖြစ်ပွားကာ ပြီးခဲ့သည့် ရကတ်သတ္တပတ်ကျော်အတွင်းက ရန်ကုန်မြို့ရှိ အမေရိကန်သံရုံးအရှေ့တွင် ဆန္ဒပြမှု ဖြစ်ပေါ်ခဲ့သည်။

ပြီးခဲ့သည့်သီတင်းပတ်က ဒေါ်အောင်ဆန်းစုကြည်ဦးစီးသည့် နိုင်ငံခြားရေးဝန်ကြီးဌာနမှ တာဝန်ရှိသူများက အမေရိကန်သံအမတ်ကြီးအား အငြင်းပွားဖွယ်ရာ အချင်းအရာဖြစ်၍ ရိုဟင်ဂျာဟူသော အသုံးအနှုန်းအား ရှောင်ကြည်ရန် မေတ္တာရပ်ခံခဲ့ကြောင်း သတင်းမီဒီယာများတွင် ဖော်ပြခဲ့သည်။