နေပြည်တော်(မတ်လ ၁၁ရက်)။ ။ တပ်မတော်သားကိုယ်စားလှယ်များအစုအဖွဲ့က ဒုတိယသမ္မတအဖြစ် လက်ရှိရန်ကုန်တိုင်းဝန်ကြီးချုပ်ဖြစ်သူ အငြိမ်းစား ဒုတိယဗိုလ်ချုပ်ကြီး ဦးမြင့်ဆွေကို မတ်လ ၁၁ရက်တွင် ရွေးချယ်လိုက်သည်။
နေပြည်တော်ရှိ ဆင်ဖြူရှင်ခန်းမတွင် မတ်လ ၁၁ရက်၊ နံနက်ပိုင်းက ပြုလုပ်သော ဒုတိယသမ္မတရွေးချယ်ရေး အခမ်းအနားတွင် တပ်မတော်သားလွှတ်တော်ကိုယ်စားလှယ် ၁၆၆ဦးက အတည်ပြု ရွေးချယ်လိုက်ခြင်းဖြစ်သည်။
ယင်းအခမ်းအနားတွင် ဦးမြင့်ဆွေအား ဒုတိယသမ္မတအဖြစ် တင်မြှာက်ရန် ဗိုလ်မှူးချုပ် သန်းလွင်ကအဆိုပြုခဲ့ပြီး အဆိုပြုချက်အပေါ် ထောက်ခံခဲ့သော ဗိုလ်မှူးချုပ် တင်စန်းနိုင်က "ဦးမြင့်ဆွေ(ဒုတိယဗိုလ်ချုပ်ကြီး အငြိမ်းစား)ဟာ ပထမအကြိမ်လွှတ်တော်သက်တမ်းကာလအတွင်းမှာ ရန်ကုန်တိုင်းဒေသကြီးဝန်ကြီးချုပ်အဖြစ် တာဝန်ထမ်းဆောင်ခဲ့တဲ့အတွက် နိုင်ငံရေးအတွေ့အကြုံများစွာရှိသူဖြစ်ပါတယ်။ ဒါ့အပြင် တပ်မတော်မှာ ဒုတိယဗိုလ်ချုပ်ကြီးအဆင့်အထိ တာဝန်ထမ်းဆောင်ခဲ့တဲ့အတွက် အုပ်ချုပ်ရေးအတွေ့အကြုံလည်း များစွာရှိတဲ့သူတစ်ယောက်ဖြစ်ပါတယ်" ဟု ပြောသည်။
ဗိုလ်မှူးချုပ် သန်းလွင်၏ အဆိုပြုချက်အပေါ် တပ်မတော်သားအမတ်အားလုံးက ကန့်ကွက်မှုမရှိသည့်အတွက်
ဦးမြင့်ဆွေအား ဒုသမ္မတအဖြစ်တင်မြှောက်ရန် အတည်ပြုဆုံးဖြတ်ခဲ့ခြင်းဖြစ်သည်။
ဦးမြင့်ဆွေသည် ၂၀၁၀ရွေးကောက်ပွဲကာလတွင် တပ်မတော်မှအငြိမ်းစားယူကာ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီကိုယ်စားပြုပြီး ဆိပ်ကြီးခနောင်တိုမြို့နယ်မှ တိုင်းအမတ်အဖြစ် ဝင်ရောက်ယှဉ်ပြိုင်ကာ အနိုင်ရခဲ့ပြီး ရန်ကုန်တိုင်းဝန်ကြီးချုပ်အဖြစ် တာဝန်ပေးခံရသူဖြစ်သည်။
ရန်ကုန်တိုင်းဝန်ကြီးချုပ်အဖြစ် ဦးမြင့်ဆွေတာဝန်ထမ်းဆောင်စဉ်တွင်မူ ရန်ကုန်မြို့သစ်စီမံကိန်းကိစ္စ၊ ဒဂုံစီးတီးစီမံကိန်းကိစ္စ၊ ပြီးခဲ့သည့်နှစ်က ရန်ကုန်မြို့တော်ခန်းမအရှေ့တွင် ဆန္ဒပြကျောင်းသားပြည်သူများကို "တာဝန်" ဟူသည့် လက်ပတ်နီပတ်ထားသူများက အကြမ်းဖက်ဖြိုခွင့်ခဲ့သည့်ကိစ္စများနှင့်ပတ်သက်၍ ပြင်းပြင်းထန်ထန်ဝေဖန်ခံရသူတစ်ဦးဖြစ်သည်။
ယင်းအပြင် ၂၀၀၇ခုနှစ်၊ ရွှေဝါရောင်သံဃာ့အရေးအခင်းလှုပ်ရှားမှုကို ဖြိုခွင်းခဲ့စဉ်က ဦးဆောင်တာဝန်ယူခဲ့သူ တစ်ဦးလည်းဖြစ်သည်။
