နေပြည်တော်(မတ်လ ၈ရက်)။ ။ ကမ်းလှမ်းလာပါက အမျိုးသားအကျိုးစီးပွားအတွက် ဒုသမ္မတတာဝန်ကိုထမ်းဆောင်မည်ဟု တပ်မတော်သားအမတ်များက အဆိုပြုမည့် ဒုတိယသမ္မလောင်းအဖြစ် နာမည်ထွက်နေသူ ဗိုလ်ချုပ်ကြီးဟောင်း သူရသက်ဆွေက ပြောဆိုလိုက်သည်။
“ကမ်းလှမ်းလာတဲ့အခါကျတော့လည်း အမျိုးသားအကျိုးစီးပွားအတွက် လုပ်ရမှာပေါ့” ဟု ဒုသမ္မတရာထူးကို ရည်ညွှန်းကာ သူရသက်ဆွေက မတ်လ ၈ရက်၊ ပြည်သူ့လွှတ်တော်အစည်းအဝေးအပြီးတွင် ပြောသည်။
သို့သော် ဒုတိယသမ္မတအဖြစ် တာဝန်ထမ်းဆောင်ရန်အတွက် တပ်မတော်မှ တရားဝင်ကမ်းလှမ်းထားခြင်းမရှိသေးဟု သူရသက်ဆွေက ဆိုကာ သတင်းထွက်ပေါ်နေမှုများအပေါ် အတည်မပြုခဲ့ပေ။
“ကမ်းလှမ်းမှုလည်း မရှိသေးဘူး။ အတည်မပြုနိုင်ပါဘူး” ဟု ၎င်းက ပြောသည်။
၂၀၀၈ဖွဲ့စည်းပုံအခြေခံဥပဒေအရ တပ်မတော်ဘက်က တင်မြောက်မည့် ဒုသမ္မတတစ်ဦးအဖြစ် ထင်ကြေးပေးခံနေရသူ သူရသက်ဆွေသည် ကာကွယ်ရေး ဦးစီးချုပ်(ရေ) ဗိုလ်ချုပ်ကြီးရာထူးမှ အငြိမ်းစားယူကာ ၂၀၁၅နိုဝင်ဘာရွေးကောက်ပွဲတွင် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီကိုယ်စားပြုကာ ကိုကိုးကျွန်းမြို့မှ ပြည်သူ့လွှတ်တော်အမတ်အဖြစ် ရွေးကောက်ပွဲဝင်ကာ အနိုင်ရလာသူ ဖြစ်သည်။
သမ္မတနှင့် ဒုတိယသမ္မတများရွေးချယ်တင်မြှောက်မည့် လွှတ်တော်အမတ်များ၏ အစုအဖွဲ့အလိုက် အစည်းအဝေးများကို မတ်လ ၁၀ရက်တွင် စတင်ကျင်းပမည်ဖြစ်ပြီး ဒုသမ္မတလောင်းအဆိုပြုလွှာများကို မတ်လ ၈ရက်ပြည်သူ့လွှတ်တော်တွင် လွှတ်တော်အမတ်များက လွှတ်တော်ရုံးက ဝေငှထားပြီဖြစ်သည်။
