ဖေဖော်ဝါရီ ၈
ကရင်နီပြည်နယ် အတွင်း တိုက်ပွဲများကြောင့် ထွက်ပြေး တိမ်းရှောင်နေရသည့် ဒေသခံများ နေထိုင်ရာ စစ်ဘေးရှောင် စခန်းများသို့ မြန်မာနိုင်ငံလုံးဆိုင်ရာ CDM မီးသတ်ဝန်ထမ်းများ ကိုယ်စားပြု ကော်မတီဝင် ဒီးမော့ဆိုမြို့နယ် CDM မီးသတ် ဝန်ထမ်းများ ဦးဆောင်၍ သောက်သုံးရေများ ဖြန့်ဝေလျက်ရှိကြောင်း ယမန်နေ့ ဖေဖော်ဝါရီ ၇ ရက်တွင် ထုတ်ပြန်သည်။
ဒီးမော့ဆိုမြို့အနီးရှိ စစ်ဘေးရှောင် စခန်း လေးခုကို ဖေဖော်ဝါရီလ ၅ ရက်မှ စတင်ကာ သောက်သုံးရေ နေ့စဉ် ပေးဝေနေကြောင်း ဆိုသည်။
"တိုက်ပွဲတွေကြောင့် စစ်ရှောင်နေရတော့ ရေက လုံလုံလောက်လောက် မရဘူး၊ မြို့ပေါ်မှာဆိုလည်း မီးကမရတော့ ရေမော်တာတွေ သုံးလို့မရဘူးလေ၊ အဲ့တော့ ရေအခက်အခဲကတော့ တော်တော်ဆိုးတယ်၊ ပရဟိတ သဘောမျိုးပဲ လုပ်ကိုင်နေတာပါ။ ဘယ်အစိုးရစီကမှ လစာရိက္ခာ မယူထားဘဲ ပရဟိတ လုပ်နေတာ " ဟု ယင်းကော်မတီ သတင်းပြန်ကြားရေး တာဝန်ခံက ဆိုသည်။
အကြမ်းဖက် စစ်ကောင်စီတပ်၏ လက်နက်ကြီးဖြင့် ပစ်ခတ်မှု၊ ပြည်သူလူထု နေထိုင်ရာ ဒေသများတွင် တိုက်ပွဲ ဖြစ်ပွားမှုများကြောင့် ကရင်နီပြည်နယ် အတွင်းရှိ ပြည်သူ အများစု ထွက်ပြေး တိမ်းရှောင်နေရပြီး စစ်ဘေးရှောင် စခန်းများတွင် သောက်သုံးရေ အခက်အခဲ ဖြစ်နေကြောင်း CDM မီးသတ်ဝန်ထမ်းများ ကိုယ်စားပြု ကော်မတီက ထုတ်ပြန်ထားသည်။