ဇန်နဝါရီ ၆
စစ်ကိုင်းတိုင်း၊ မုံရွာမြို့နယ်၊ တောပုကျေးရွာတွင် စစ်ကောင်စီတပ်နှင့် ပျူစောထီးအဖွဲ့ကို ထောက်ပံ့ပေးနေသူ အမျိုးသမီး တစ်ဦး ရွာအဝင်ဇရပ်တွင်သေနတ်ဖြင့်ပစ်ခတ်ခံရကာ သေဆုံးသွားကြောင်း ရွာခံထံမှ သိရသည်။
ယနေ့ ဒီဇင်ဘာ ၆ရက် နံနက် ၈နာရီ မိနစ် ၃၀တွင် ပန်းရောင်းသူ ဒေါ်ကြည်လှဆိုသူသည် သေနတ်ဖြင့် ခြောက်ချက်ပစ်ခတ်ခဲ့ရသည့်အနက် လေးချက်ထိမှန်ကာ သေဆုံးသွားကြောင်း ၎င်းကဆိုသည်။
ဒေါ်ကြည်လှဆိုသူအား Monywa Ranger Group/Truth Army အဖွဲ့က လုပ်ကြံခဲ့သည်ဟု ယင်းအဖွဲ့ကထုတ်ပြန်ထားသည်။
"စစ်တပ်ထောက်ပံ့ပေးသူ ပန်းသည် ဒေါ် ကြည်လှ ဆိုသူသည် ရပ်ရွာကို စစ်တပ်ခေါ်ဆောင်ခြင်း၊ ပိုက်ဆံ ထည့်ခြင်း၊ ရပ်ရွာရှိ ပျူစောထီး၊ စစ်ခွေးများကို ထောက်ပံ့သတင်းပေးခြင်းများ ပြုလုပ်ပေးနေသူတစ်ဦးဖြစ်သည်"ဟု Monywa Ranger Group/Truth Army အထူးစုံစမ်းရေးတပ်ဖွဲ့၏ ထုတ်ပြန်ချက်တွင် ဖော်ပြထားသည်။
အခင်းဖြစ်ပွားပြီးနောက် စစ်ကောင်စီတပ်မှ ကား နှစ်စီးဖြင့် လာရောက်စစ်ဆေးခဲ့သော်လည်း အဖမ်းအဆီးများ မရှိကြောင်း ၎င်းဒေသခံက ပြောသည်။
တောပုရွာတောင်ခြမ်းမှ ရွာခံ အများစုသည် ပျူစောထီးဆိုသူများနှင့် စစ်တပ်လိုလားသူများဖြစ်ပြီး ရွာမြောက်ခြမ်းမှာ ကာကွယ်ရေးတပ်ဖွဲ့နှင့် ပြည်သူ့အစိုးရအား ထောက်ခံကြကြောင်း ဒေသခံကဆိုသည်။
