စက်တင်ဘာ ၂၉
နေပြည်တော်၊ ပျဉ်းမနားမြို့၊ မင်္ဂလာရပ်ကွက် ဗိုလ်တော်ထိန်လမ်းနှင့် ဦးဘွားလမ်းဆုံရှိ KBZ Bank ခွဲ (၃) အနီးတွင် စက်တင်ဘာ ၂၉ ရက် နံနက် ၉နာရီအချိန်က လမ်းပေါ်မောင်းနှင်နေသည့် အကြမ်းဖက်စစ်ကောင်စီ၏ မော်တော်ကား အနီးပေါက်ကွဲမှုဖြစ်ပွားခဲ့ကြောင်း ဒေသခံများထံမှသိရသည်။
မောင်းနှင်နေသည့် စစ်ကောင်စီကား ဗုံးပစ်ခံရပြီး ကားဘေးဘောင်နှင့်ထိကာ ကန်ထွက်လာသည့် ဗုံးဆန်မှာ ယင်းစစ်ကားအနီးတွင် ပေါက်ကွဲမှုဖြစ်ပွားခဲ့ခြင်းဖြစ်သည်။
“ မောင်းနေတဲ့ကားပေါ် လက်ပစ်ဗုံးပစ်တာ ၊ ဘောင်နဲ့ထိပြီး မဝင်သွားဘူး ။ အောက်ရောက်မှ ပေါက်ကွဲသွားတာ ။ လူတော့မထိဘူး။ ရိက္ခာလာလာဝယ်တတ်ကြတဲ့ စကစဘက်က ကားအကြီး ပစ်ခံရတာ " ဟု နေပြည်တော် ပြည်သူ့ကာကွယ်ရေးတပ်က ဆိုသည်။
ပျဉ်းမနားအမှတ်(၁) စျေးသို့ ရိက္ခာလာဝယ်သည့် စစ်ကားအကြီး တစ်စီးပေါ်သို့ လက်ပစ်ဗုံးပစ်သွင်းခဲ့ခြင်းဖြစ်ကာ ကားပေါ်သို့မရောက်ရှိဘဲ အနီးနားရှိ ဦးဘွားလမ်းဆုံနားတွင် ပေါက်ကွဲမှုဖြစ်ပွားခဲ့ခြင်းသည်။
လက်ရှိအချိန်တွင် ဗိုလ်တောက်ထိန်လမ်းကိုပိတ်ထားကာ စစ်ဆေးမှုများလုပ်ဆောင်နေကြောင်းသိရသည်။
