ပါကစ္စတန်နိုင်ငံ၏ ရူပီးငွေတန်ဖိုးသည် ဆက်တိုက်ကျဆင်းလျှက်ရှိရာ ဩဂုတ် ၂၄ ရက်က အနိမ့်ဆုံးသို့ ရောက်ရှိသွားခဲ့သည်။ ယူအေအီးငွေကြေး ဒါဟမ်နှင့် နှိုင်းယှဉ်ပါက ဩဂုတ် ၂၃ ရက်က ၄၄ ဒသမ ၇ ရှိရာမှ နောက်တစ်ရက်တွင် ၄၅ ဒသမ ၀၂ သို့ ရောက်ရှိကာ ၀ ဒသမ ၆၇ ရာခိုင်နှုန်း ကျဆင်းခဲ့သည်ဟု to xe.com တွင် ဖော်ပြထားသည်။

ဇူလိုင် ၂၄ ရက်က ပါကစ္စတန်ရူပီး ၁၆၅ ဒသမ ၄ လျှင် အမေရိကန် ၁ ဒေါ်လာ ပေါက်ဈေးရှိခဲ့သည်။ ရူပီးငွေဈေးသည် ၂၀၂၁ ခုနှစ်၊ မေ ၅ ရက်က အမြင့်ဆုံးသို့ ရောက်ရှိခဲ့ကာ ဒါဟမ်နှင့် နှိုင်းယှဉ်ပါက ၄၁ ဒသမ ၅ ရှိခဲ့သည်။

ကိုရိုနာဗိုင်းရပ်စ်ကြောင့် ထိခိုက်ခံရသည့် ဝင်ငွေနည်းနိုင်ငံများကို ပံ့ပိုးသည့် အထူးထုတ်ယူခွင့် (SDR) အစီအစဉ်အရ ပါကစ္စတန်သည် နိုင်ငံတကာ ငွေကြေးရန်ပုံငွေအဖွဲ့ (IMF) မှ ဩဂုတ် ၂၄ ရက်တွင် ဒေါ်လာ ၂ ဒသမ ၇၅ ဘီလျံ ရရှိခဲ့သောကြောင့် နိုင်ငံ၏ နိုင်ငံခြားအရန်ငွေကြေးသည် ဒေါ်လာ ၂၂ ဒသမ ၂၅ ဘီလျံ ဖြစ်သွား သော်လည်း ရူပီးငွေတန်ဖိုး ကျဆင်းမှုကို ပြန်လည်မြင့်တက်ခြင်း မဖြစ်စေခဲ့ပေ။

Orient Exchange ၏ အမှုဆောင်အရာရှိချုပ် ရာဂျစ် ရာအီပန်ချိုလီယာက “အစားအစာနဲ့ ဆီတို့လို့ အဓိကကျတဲ့ ပစ္စည်းတွေ လိုအပ်ချက်နဲ့အတူ သွင်းကုန်မြင့်တက်ပြီး ကုန်သွယ်ရေး လိုငွေပြမှုဟာ ရူပီးငွေတန်ဖိုး ကျဆင်းရခြင်းရဲ့ အကြောင်းရင်းအချို့ဖြစ်ပါတယ်” ဟု ပြောကြားသည်။

ရူပီးငွေကျဆင်းခြင်းသည် ပြည်ပတွင် ရောက်ရှိနေသူ ၈ သန်းခန့်က နိုင်ငံတွင်းသို့ ငွေပေးပို့သည့် ပမာဏ မြင့်တက်လာနိုင်ခြင်းကြောင့် ပါစ္စတန်သို့ ပြည်ပမှ ဝင်ငွေရောက်ရှိမှု ဆက်လက်အားကောင်းနိုင်ကြောင်း ကျွမ်းကျင်သူများက သုံးသပ်ထားသည်။

ပါကစ္စတန်သည် ယမန်နှစ်အတွင်း ကိုဗစ်-၁၉ ဖြစ်ပွားချိန်မှစ၍ နိုင်ငံခြားမှ ငွေပြန်ပို့သည့် ပမာဏ စံချိန်တင် အဖြစ် ၂၀၂၀-၂၀၂၁ ခုနှစ်အတွင်းက ဒေါ်လာ ၂၉ ဒသမ ၄ ဘီလျံ ရရှိခဲ့သည်။ Roshan Digital Accounts မှတစ်ဆင့် နောက်ထပ် ဒေါ်လာ ၂ ဘီလျံ ရရှိထားသည်။

“နိုင်ငံခြားရောက် ပြည်သူတွေက ပါကစ္စတန်ကို ပြန်ပို့ငွေပမာဏ မြင့်တက်လာပါတယ်။ ရူပီးငွေတန်ဖိုးဆက်ကျနေမယ်ဆိုရင် ဆက်ပြီး များများပြန်ပို့နိုင်ပါတယ်။ တစ်ချိန်တည်းမှာ ငွေကြေးဖောင်းပွမှုကလည်း အလားတူနှုန်း သို့မဟုတ် ပိုမိုမြန်ဆန်စွာနဲ့ တက်နေပါတယ်” ဟု ာအီပန်ချိုလီယာက ပြောကြားသည်။