ဇူလိုင် ၁၅

CDMပြုလုပ်နေဆဲ ဆရာဝန်တွေနဲ့ လွှတ်တော်ကိုယ်စားလှယ်တွေ စုပေါင်းပြီး ဧရာဝတီတိုင်းအတွင်း မြောင်းမြ၊ဘိုကလေး၊ ရေကြည်အစရှိတဲ့ မြို့တွေမှာ Covid19 ရောဂါနဲ့ပက်သက်ပြီး ကျန်းမာရေးဆွေးနွေးစောင့်ရှောက်မှုတွေကို Onlineပေါ်ကနေ ကူညီလုပ်ဆောင်ပေးနေကြပါတယ်။

သက်ဆိုင်ရာ မြို့နယ်တွေအလိုက် တယ်လီကျန်းမာဆိုတဲ့ Facebook Pageတွေကို ဖွင့်လှစ်ကာ နေအိမ်မှာဆေးဝါးကုသမှု ခံယူနေတဲ့ ကိုဗစ်လူနာတွေအတွက် ဆေးဝါးလမ်းညွှန်မှုတွေ အခမဲ့ လုပ်ဆောင်ပေးနေတာဖြစ်ပါတယ်။

“CDMဆရာဝန်အင်အား ၁၀ဦးနဲ့ ကျွန်တော်တို့ လုပ်ပေးနေတာ နေ့စဉ် လူနာရာနဲ့ချီပြီး မေးမြန်းကုသပေးနေပါတယ်၊ ကိုဗစ်စင်တာ ရောက်နေသူတွေကိုလည်း လုပ်ပေးနေတယ်၊ နေ့စဉ် မနက် ၈နာရီကနေ ည ၁၁နာရီလို့ သတ်မှတ်ထားပေမဲ့ သန်းခေါင်ကျော်အထိလည်း ဖြေကြားပေးနေပါတယ်၊ ကိုဗစ်ကာလမှာ ဆေးရုံဆေးခန်း မသွားချင်တဲ့ လူနာတွေအတွက် အကူညီအထောက်ပံ့ကောင်းကောင်းဖြစ်မှာပါ”လို့ မြောင်းမြမြို့နယ် ပြည်သူ့လွှတ်တော်ကိုယ်စားလှယ် ဦးဝေလင်းအောင်က ပြောပါတယ်။

ပြည်သူအများစုဟာ စစ်ကောင်စီရဲ့ ကိုဗစ်စင်တာတွေနဲ့ ဆေးရုံတွေမှာ ကုသမှုတွေမလုပ်ဘဲ နေအိမ်မှာပဲ ဆေးဝါးကုသမှု ပြုလုပ်နေကြပါတယ်။