အမေရိကန်သည် ဆိုက်ဘာစွမ်းရည်ပိုင်ဆိုင်မှုတွင် ထိပ်ဆုံးတွင်ရှိနေသော တစ်ခုတည်းသော ကမ္ဘာအင်အားကြီးနိုင်ငံဖြစ်ပြီး၊ တရုတ်က ရုရှား၊ ပြင်သစ်နှင့် အခြားနိုင်ငံအနည်းငယ်နှင့် အတူ ဒုတိယအုပ်စုတွင် အခိုင်အမာရပ်တည်နေကြောင်း ဗြိတိန်အခြေစိုက် သုခမိန်အဖွဲ့ဖြစ်သော မဟာဗျူဟာလေ့လာမှုများအတွက် အပြည်ပြည်ဆိုင်ရာအင်စတီကျူ (IISS ) က ဇွန်လ ၂၈ရက်က လေ့လာမှုအသစ်တစ်ခုကို ထုတ်ပြန်လိုက်သည်။
IISS ၏ ခန့်မှန်းချက်အရ ဆိုက်ဘာစွမ်းရည်တွင် တရုတ်သည် အမေရိကန်ထက် အနည်းဆုံး ၁၀နှစ်ကျော် နောက်ကျနေပြီး အထူးသဖြင့် လုံခြုံရေးကိစ္စရပ်များတွင်ဖြစ်ကြောင်း ယင်းလေ့လာမှုကို ကိုးကားပြီး The Financial Times က သတင်းဖော်ပြခဲ့သည်။
တရုတ်က ဆိုက်ဘာတိုက်ခိုက်မှုများပြုလုပ်ခြင်းနှင့် သတင်းမှားများထုတ်လွှင့်ခြင်းတို့ကို စိတ်အားထက်သန်စွာ ပြုလုပ်နေသော်လည်း လုံခြုံရေးပိုင်းတွင် အားနည်းကြောင်း အစီရင်ခံစာကဆိုသည်။
AI နှင့်အခြားဆိုက်ဘာစွမ်းရည်များတွင် တရားဝင်အားသာချက်များရှိခြင်းကြောင့် တရုတ်၏ ဆိုက်ဘာစွမ်းရည်ကို ပုံကြီးချဲ့ကားဖော်ပြနေခြင်းဖြစ်ကြောင်း သုခမိန်အဖွဲ့ဝင်တစ်ဦးဖြစ်သူ ဂတ်အော်စတင်က The Financial Times သို့ ပြောကြားခဲ့သည်။