ဇွန် ၂၉
ချင်းပြည်နယ် ဖလမ်းမြို့နယ်အတွင်း အာဏာသိမ်းစစ်ကောင်စီတပ်နဲ့ ချင်းအမျိုးသားအဖွဲ့ချုပ် (CNDF) တို့အကြား ဒီကနေ့ ဇွန်လ ၂၉ ရက်နေ့ မနက်ပိုင်းမှာ နှစ်နာရီခန့်ကြာ တိုက်ပွဲဖြစ်ခဲ့ပြီး အာဏာသိမ်းစစ်ကောင်စီတပ်ဖွဲ့ဝင် နှစ်ဆယ်ဦးထက်မနည်း သေဆုံးခဲ့တယ်လို့ CNDF က ထုတ်ပြန်ပါတယ်။
အဲဒီတိုက်ပွဲအတွင်း CNDF တပ်ဖွဲ့ဘက်ကလည်း လေးဦးကျဆုံးခဲ့ပြီး ထိခိုက်ဒဏ်ရာရသူ (မစိုးရိမ်ရ) သုံးဦးရှိခဲ့တယ်လို့ သိရပါတယ်။
အာဏာသိမ်းစစ်ကောင်စီတပ်တွေက CNDF တပ်ဖွဲ့ဝင်တွေ ရောက်ရှိနေတဲ့ နေရာတစ်ခုကို ထိုးစစ်ဆင်ဖို့ အင်အားအများအပြားနဲ့ လက်နက်ကြီးအသုံးပြုကာ ဝင်ရောက်လာတဲ့အတွက် ခုခံကာကွယ်ပစ်ခတ်ခဲ့တာလို့ CNDF က ပြောပါတယ်။
အရင်နေ့တွေကလည်း အာဏာသိမ်းစစ်ကောင်စီတပ်ဖွဲ့ဝင်တွေဟာ ဖလမ်းမြို့အတွင်းရှိ ကျေးရွာတချို့ကို ဝင်ရောက်ပြီး အိမ်မွေးတိရိစ္ဆာန်တွေကို သတ်ဖြတ်စားသောက်ကာ နေအိမ်တွေကို ဖျက်စီးခဲ့တယ်လို့ CNDF ရဲ့ ထုတ်ပြန်ချက်မှာ ပြောထားပါတယ်။
လက်ရှိမှာတော့ ဖလမ်းမြို့နယ်အတွင်းမှာ တိုက်ပွဲတွေ ရပ်တန့်နေပေမယ့် ဆက်လက်ပြင်းထန်လာနိုင်ဖွယ်ရှိနေတဲ့အတွက် ဒေသခံပြည်သူတွေအနေနဲ့ သတိထားသွားလာကြဖို့ ချင်းအမျိုးသားအဖွဲ့ချုပ် (CNDF) က အသိပေးထားပါတယ်။
