ဇွန် ၁၈
တာမွေမြို့နယ်အတွင်း ပေါက်ကွဲမှုများကြောင့် ရဲအရာရှိတစ်ဦးနှင့် အရပ်သားတစ်ဦးသေဆုံးပြီး ခုနှစ်ဦးပြင်းထန်စွာဒဏ်ရာရရှိသွားကြောင်း ပေါက်ကြားလာသောလုံခြုံရေးတပ်ဖွဲ့များ၏ ကနဦး အစီရင်ခံစာအရသိရသည်။
စစ်ထရပ်ကား ပေါ်မှ ဒုရဲအုပ် ဇေယျာနှင်းဦးနှင့် တက္ကစီကားလေးပေါ်မှ ကားမောင်းသူတို့ သေဆုံးသွားပြီး စစ်ကားပေါ်မှ စစ်သားနှင့်ရဲစုစုပေါင်း ခြောက်ယောက်နှင့် ကားလေးပေါ်မှအရပ်သားတစ်ဦးတို့ ပြင်းထန်စွာဒဏ်ရာရသွားခဲ့ကြသည်။
လှည့်ကင်းလှည့်နေသော Faw အမျိုးအစား စစ်သည်တင်ကားက ဗညားဒလလမ်းမကြီးနှင့် (၁၄၇) လမ်းထိပ်တွင် ခေတ္တနားနေစဉ် မွန်းလွဲ ၃ နာရီ ၂၀ မိနစ်တွင် ကားတစ်စီးပေါ်မှ လစ်ပစ်ဗုံးပစ်သွင်းသွားခဲ့ခြင်းကြောင့် ပေါက်ကွဲမှုဖြစ်၍ ကားမီးလောင်ပျက်စီးသွားခဲ့ကာ ရဲတပ်ဖွဲ့ (၂၆) မှ ဒုရဲအုပ်ဇေယျာနှင်းဦး အခင်းဖြစ်ပွားရာနေရာမှာပင် သေဆုံးသွားခဲ့သည်။
ထို့အပြင် မင်္ဂလာဒုံ တပ်နယ်မြေမှ တပ်ကြပ်ကြီး ကိုကိုမောင်၊ တပ်သား ဟိန်းခန့်ဇော်၊ တပ်သား နေလင်းကိုကို၊ တပ်သားအောင်နိုင်ထွေး၊ ရဲတပ်ဖွဲ့ (၂၆) မှ ရဲဒုတပ်ကြပ် အောင်သူနှင့် ရဲတပ်သား ဟိန်းမင်းဦးလည်း ပြင်းထန်စွာဒဏ်ရရသွားခဲ့သည်။
တာမွေစျေးက တက္ကစီ ယာဉ်ပေါ်တွင်လည်း ပေါက်ကွဲမှုတစ်ခုဖြစ်ပွားရာ ယာဉ်မောင်းသေဆုံးသွားပြီး ခရီးသည်နေရာတွင်ထိုင်နေသူတစ်ဦး ဒဏ်ရာပြင်းထန်စွာရသွားခဲ့သည်။
ဒဏ်ရာရရှိသော စစ်ကောင်စီလက်အောက်ခံ စစ်သားနှင့်ရဲများကို စစ်ဆေးရုံသို့ပို့ဆောင်ပြီး သေဆုံးသူနှစ်ဦးနှင့် ဒဏ်ရာရအရပ်သားကို ရန်ကုန်ဆေးရုံကြီးသို့ ပို့ဆောင်ကုသနေကြောင်းလည်း အစီရင်ခံစာတွင်ပါရှိသည်။
