ဇွန် ၁၆
စက်မှုထိပ်သီး ဂျီ ၇ အုပ်စု၏ ထိပ်သီးအစည်းအဝေး ကြေညာချက်အပေါ် မြန်မာအာဏာသိမ်း အကြမ်းဖက်စစ်ကောင်စီက ပြန်လည်တုံ့ပြန်ခဲ့ပြီး အဆိုပါ ဂျီ ၇ အုပ်စုနိုင်ငံများမှ ခေါင်းဆောင်များ၏ ကြေညာချက်သည် ‘လုပ်ကြံဖန်တီးထားပြီး ဘက်လိုက်မှုရှိသည့် သတင်းအချက်အလက်များ’ ကို အခြေပြုထားကြောင်း အာဏာသိမ်းစစ်ကောင်စီခန့် နိုင်ငံခြားရေး၀န်ကြီးဌာနက စွပ်စွဲထုတ်ပြန်သွားခဲ့သည်။
ထို့ပြင် အဆိုပါ နိုင်ငံခြားရေး၀န်ကြီးဌာန၏ ထုတ်ပြန်ဖော်ပြချက်ထဲတွင် စစ်တပ်အနေဖြင့် ဖေဖေါ်၀ါရီ ၁ ရက်တွင် အာဏာသိမ်းမှု လုပ်ဆောင်ခဲ့ခြင်း မရှိပါဟုလည်း ငြင်းဆိုထားခဲ့သည်။
“မြန်မာနိုင်ငံ အခြေအနေနဲ့ပတ်သက်လို့ တိကျမှန်ကန်မှု မရှိဘဲ တစ်ဖက်သတ်ဖြစ်နေတဲ့ အမြင်သဘောထားတွေအပေါ် ၀န်ကြီးဌာနဘက်က အပြင်းအထန် ကန့်ကွက်ပါတယ်” ဟုလည်း စစ်ကောင်စီ၏ နိုင်ငံခြားရေး၀န်ကြီးဌာနက ပြောခဲ့သည်။
စက်မှုထိပ်သီး ဂျီ ၇ ခေါင်းဆောင်များသည် ထိပ်သီးအစည်းအဝေး ကြေညာစာတမ်းတစ်ခုကို ထုတ်ပြန်ခဲ့ပြီး ယင်းတွင် မြန်မာနိုင်ငံ စစ်အာဏာသိမ်းမှုနှင့် နောက်ဆက်တွဲ အကြမ်းဖက်မှုတို့အပေါ် အပြင်းထန်ဆုံး အသုံးအနှုန်းများဖြင့် ပြစ်တင်ရှုတ်ချထားခဲ့သည်။
“ဂျီ ၇ နိုင်ငံတွေအနေနဲ့ တည်ငြိမ်မှု ရှိပြီး အလုံးစုံပါ၀င်တဲ့ ဒီမိုကရေစီနိုင်ငံတစ်နိုင်ငံအတွက် ငြိမ်းချမ်းစွာ ထောက်ခံလုပ်ဆောင်နေသူတွေကို ဆက်လက် ကူညီထောက်ပံ့သွားဖို့ ကတိပြုပါတယ်” ဟု အဆိုပါ စက်မှုထိပ်သီးနိုင်ငံများအုပ်စုက ပြောခဲ့သည်။
ထို့ပြင် ဂျီ ၇ အစိုးရများအနေဖြင့် လိုအပ်ပါက ထပ်တိုး ဆောင်ရွက်ချက်များ ဆက်လုပ်သွားမည်ဖြစ်ကြောင်း ပြောခဲ့သလို ယင်းသည် အာဏာသိမ်းစစ်အုပ်စုအပေါ် ထပ်တိုး အရေးယူပိတ်ဆို့မှုများ လုပ်နိုင်ကြောင်း အရိပ်အမြွက် ပြသွားခဲ့ခြင်းလည်း ဖြစ်သည်။
