ဇွန် ၅

ဖယ်ရှားခံ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အား နေအိမ်အကျယ်ချုပ်ချထားရာ နေပြည်တော်ရှိ ၎င်း၏ နေအိမ်မှာ ရွှေ့ပြောင်းပြီး လက်ရှိ၌ မည်သည့်နေရာတွင် ရှိနေသည်ကို မသိရကြောင်း ဒေါ်အောင်ဆန်းစုကြည်၏ တရားရေးအဖွဲ့က ပြောသည်။ 

စစ်အာဏာသိမ်းမှုကို တွန်းလှန်ရန် ဖွဲ့စည်းထားသော အမျိုးသားညီညွတ်ရေး အစိုးရ NUG က ဒေါ်အောင်ဆန်းစုကြည်၏ ဘေးကင်းလုံခြုံရေးအတွက် စိုးရိမ်သည်ဟု ထုတ်ပြန်ခဲ့ကြောင်း Nikkei Asia သတင်းတွင် ဇွန် ၄ ရက် ညပိုင်းက ဖော်ပြသည်။ 

စစ်အာဏာသိမ်းခေါင်းဆောင် မင်းအောင်လှိုင်နှင့် တွေ့ဆုံခဲ့သော ဘရူနိုင်း ကိုယ်စားလှယ်အဖွဲ့သည် ဇွန် ၄ ရက်၌ ရွေးကောက်ပွဲကော်မရှင် ဥက္ကဋ္ဌ ဦးသိန်းစိုးနှင့် တွေ့ဆုံဆွေးနွေးခဲ့သည်ဟု စစ်တပ်ပိုင် မြဝတီရုပ်မြင်သံကြားက ထုတ်လွှင့်ခဲ့သည်။ 

ဘရူနိုင်း ဒုတိယနိုင်ငံခြားရေးဝန်ကြီး အဲဝမ်ပီဟင်ယူဆော့ဖ်နှင့် လက်ရှိ အာဆီယံအတွင်းရေးမှူးချုပ် လင်ဂျော့ဟွိုင်သည် ရွေးကောက်ပွဲ ကော်မရှင် ဥက္ကဋ္ဌနှင့် တွေ့ဆုံကြခြင်း ဖြစ်သည်။ 

စစ်တပ်က နောက်ပိုင်းတွင် ကျင်းပပေးမည်ဆိုသော “လာမည့် ရွေးကောက်ပွဲနှင့် ပတ်သက်သော လုပ်ငန်းစဉ်များ” နှင့် “အာဆီယံ၏ ပူးပေါင်းဆောင်ရွက်မှု” အရေးတို့ကို အစည်းအဝေး၌ ဆွေးနွေးခဲ့ကြသည်ဟု အဆိုပါ သတင်းထုတ်လွှင့်ချက်အရ သိရသည်။ 

ထိုသို့ အာဆီယံ သံတမန်နှစ်ဦး နေပြည်တော်၌ စစ်အာဏာသိမ်းခေါင်းဆောင် မင်းအောင်လှိုင်နှင့် တွေ့ဆုံကြချိန် မြန်မာနိုင်ငံ၏ ပဋိပက္ခ အကျပ်အတည်း အဆုံးသတ်ရေး အာဆီယံ၏ ကြိုးပမ်းမှုများကို ယုံကြည်မှု မရှိကြောင်း NUG မှ လက်ထောက်နိုင်ငံခြားရေး ဦးမိုးဇော်ဦးက ပြောကြောင်း ရိုက်တာသတင်းက ဖော်ပြသည်။ 

ဖေဖော်ဝါရီ ၁ ရက်တွင် ရွေးကောက်ခံခေါင်းဆောင် ဒေါ်အောင်ဆန်းစုကြည်နှင့် သမ္မတ ဦးဝင်းမြင့်တို့အား ဖမ်းဆီးထိန်းသိမ်းပြီး စစ်တပ်က အာဏာသိမ်းခဲ့ချိန်မှစကာ အာဏာသိမ်းမှုကို ဆန့်ကျင်သော ဆန္ဒပြပွဲများ ဖြစ်ပွားပေါ်ပေါက်လျက် ရှိသည်။