ဇွန် ၁
စစ်အာဏာသိမ်းယူအပြီး ဒုတိယအကြိမ်ဖွင့်လှစ်တဲ့ အောင်ဘာလေထီဖွင့်ပွဲဟာ အက္ခရာအလုံးရေ ထပ်တိုးရောင်းချနိုင်ခြင်းမရှိဘဲ အက္ခရာ အလုံးရေ ၂၀ နဲ့သာ ရောင်းချဖွင့်လှစ်ပေးခဲ့ရပါတယ်
အာဏာသိမ်းစစ်ကောင်စီကို အလိုမရှိတာကြောင့် ၎င်းတို့ ရဲ့ ဘက်ဂျက်တွေ(လျာထားငွေ) ကျဆင်းအောင် ပြည်သူအများစုက ထီမထိုးခဲ့တာပါ။ ဒါ့ကြောင့် အရင်အရပ်သားအစိုးရလက်ထက်က အမြင့်ဆုံးဆုကို ကျပ်သိန်းတစ်သောင်းခွဲ ချီးမြှင့်နေရာကနေ စစ်ကောင်စီလက်ထပ်မှာ ကျပ်သိန်း ၅၀၀၀ ကိုသာ လျော့ကျ ပေးနိုင်တော့တာပါ။
ယနေ့ ဖွင့်လှစ်တဲ့ ၂၇ ကြိမ်မြောက် ကျပ်တစ်ထောင်တန်အောင်ဘာလေထီနဲ့ ပတ်သက်လို့ လက်ပွေ့ရောင်းချနေတဲ့ ထီသည်တစ်ဦးက “ ဒီလလည်း ထီတွေအများကြီးကျန်တယ်။ ထီရောင်းသူလာရင်တောင် စစ်ကောင်စီအားပေးနေတဲ့ ကောင်လာပြီဆိုပြီး တိုးတိုးပြောတဲ့သူရှိသလို၊ အော်ရောင်းနေတာကို အနှောင့်အယှက်ဖြစ်အောင် လုပ်တာမျိုးတွေလည်းရှိတယ်။
အက္ခရာက တိုးဖို့ မပြောနဲ့ အခု အလုံးရေ ၂၀ ကိုရောင်းတာတောင် ထီကျန်တွေရှိနေတာဆိုတော့ နောက်ဆို ဘယ်လိုလာမလဲတောင်မသိဘူး။ အခြားဟာဘဲပြောင်းရောင်းတော့မယ်လို့” မဇ္စျိမကို ရင်ဖွင့် ပြောဆိုပါတယ်။
“ အရင်က အက္ခရာ အလုံးရေအပြည့် ၃၃ လုံးအပြင် “ကက” တို့ “ကခ”တို့ ဆိုတဲ့ အရံထီတွေကိုပါ ရောင်းရတယ်။ အခုဟာက ဆုပေးဖို့ နီးနီးလောက် အက္ခရာကိုဘဲရောင်းနေရတယ်။ အရင်က လလယ်ကနေ လကုန်ရက်အတွင်း ကိုယ့်ဆီလာဝယ်တဲ့ နယ်ကိုယ်စားလှယ်တွေရော၊ အခြားကိုယ်စားလှယ်တွေရော ဆိုင်ထဲ ခြေချင်း ခတ်နေတာ။ အခုတော့ လက်ကျန်ထီထဲက ပေါက်ဂဏန်းကိုဘဲမျှော်နေရတော့တဲ့ အခြေအနေဖြစ်နေတယ်” လို့ ထီကိုယ်လှယ်တစ်ဦးက ဆိုပါတယ်
စစ်ကောင်စီက ဒီနေ့ဖွင့်လှစ်ပေးခဲ့တဲ့ အောင်ဘာလေထီဖွင့်ပွဲအတွက် “က” အက္ခရာမှ အစဉ်လိုက် “န” အက္ခရာအထိ အက္ခရာအလုံးရေ ၂၀ မှာ ထီစာအုပ်ရေပေါင်း ၂၆၂၃၃၄ အုပ်ရောင်းချခဲ့ရသလို ရောင်းချရငွေ ကျပ်သန်း ၂၆၂၃ ဒဿမ ၃၄၀ ထဲကတဆင့် ၆၀ ရာခိုင်နှုန်းဖြင့်တဲ့ ကျပ်သန်း ၁၅၇၄ ဒဿမ ၀၀၄ ကိုချီးမြှင့်ပေးမယ်လို့ ကြေညာထားပါတယ်
အဲ့ဒီအပြင် သတ်မှတ်ကာလအတွင်း လာရောက်ထုတ်ယူခြင်းမရှိတဲ့ ဘဏ္ဍာသိမ်းရငွေများထဲက ကျပ်သန်း၂၅၀ ကိုလည်း ဖြည့်စွက်ချီးမြှင့်သွားမယ်လို့ လည်းဆိုပါတယ်။
