မေ ၂၂
ပဲခူးတိုင်းအရှေ့ခြမ်း ညောင်လေးပင်မြို့အနီး စမ်းကလေး ကျေးရွာမှာ ဗုံးပေါက်ကွဲပြီး ရာအိမ်မှူးတစ်ဦးနေရာတွင်သေဆုံးကာ အုပ်ချုပ်ရေးမှူနဲ့ မိသားစုငါးဦး ဆေးရုံတင်ထားရတယ်လို့ သိရပါတယ်။ မေလ ၂၁ ရက် ည ၇ နာရီမှာ အကြမ်းဖက်စစ်ကောင်စီခန့်အပ်ထားတဲ့ အုပ်ချုပ်ရေးမှူးနေအိမ်မှာ ပေါက်ကွဲခဲ့တာဖြစ်ကြောင်း ဒေသခံတစ်ဦးက ပြောပါတယ်။
ထိခိုက်ဒဏ်ရာရခဲ့တဲ့ စစ်ကောင်စီကခန့်အပ်ထားတဲ့ အုပ်ချုပ်ရေးမှူးနဲ့ သူ့မိသားစုကို ညောင်လေးပင်ဆေးရုံမှာ အရေးပေါ်ကုသပြီး လက်ရှိမှာ ပဲခူးဆေးရုံကို လွှဲပြောင်းကုသနေတယ်လို့ သိရပါတယ်။
ပေါက်ကွဲမှုဖြစ်ပြီးမကြာခင်မှာ စစ်ကောင်စီတပ်တွေ ရောက်လာပြီး ရိုက်နှက်စစ်ဆေးတာတွေပြုလုပ်ကာ ညောင်လေးပင် မြို့မ ၂ ရပ်ကွက်မှ ၁ ယောက်နဲ့ ကောက်ကွေ့ရွာသား ၁ ယောက်ကို ဗုံးခွဲတရားခံလို့ စပ်စွဲကာ ဖမ်းဆီးခေါ်ဆောင်သွားတယ်လို့ သိရပါတယ်။
ဗုံးခွဲခံရတဲ့ အုပ်ချုပ်ရေးမှူးနေအိမ်မှ ညောင်လေးပင် ကြံ့ဖွံ့အတွင်းရေးမှူးနဲ့အတူ ပျူစောထီးဆိုတဲ့အဖွဲ့က အစည်းအဝေးတွေလုပ်ခဲ့တယ်လို့ဒေသခံတစ်ဦးကပြောပါတယ်။
"အဲ့ဒီအိမ်မှာပဲ အရက်ရောင်းတယ် စစ်သားတွေရဲတွေက အဲ့ဒီမှာ လာသောက်စားပြီး မူးရင် သေနတ်တွေဖောက်ပြီး ပတ်ဝန်းကျင်ကို ခြိမ်းခြောက်တာတွေလုပ်တယ်၊ ရဲစခန်းက စခန်းမှူးလဲပါတယ်" လို့ အဆိုပါဒေသခံကပြောပါတယ်။
