မေ ၁၇
ပြည်တွင်းရွှေဈေးနှုန်းတည်ငြိမ်စေရေးအတွက်သက်ဆိုင်သည့်ဌာနဆိုင်ရာစသုံးလုံး(စစစ-အထူးစုံစမ်းစစ်ဆေးရေးအဖွဲ့)၏ လမ်းညွှန်မှုနှင့်အတူ လပတ်အထူးအစည်းဝေးများကျင်းပ၍ ဆောင်ရွက်လျက်ရှိကြောင်း ရန်ကုန်တိုင်းဒေသကြီး ရွှေလုပ်ငန်းရှင်များအသင်း(YGEA)မှ ယနေ့ မေလ ၁၇ ရက်တွင် ထုတ်ပြန်ထားသည်။
ထို့အပြင် လက်ရှိ မှောင်ခိုတင်သွင်းသူများနှင့်
အရောင်း/အဝယ်ကျွံ ကတိပျက်ယွင်းသူများကိုလည်း ထိထိရောက်ရောက်အရေးယူဆောင်ရွက်လျက်ရှိကြောင်းအဆိုပါထုတ်ပြန်ချက်တွင်ရေးသားထားသည်။
ရွှေလုပ်ငန်းရှင်အသင်းအနေဖြင့် လက်ရှိအချိန်တွင် ရွှေထိငွေထိလက်ငင်းအရောင်းအ၀ယ်သာပြုလုပ်နေသဖြင့် စျေးနှုန်းတည်ငြိမ်စေရေးအတွက် အဝေးအရောင်းများကိုလည်း ပိတ်ထားခြင်းဖြစ်သည်။
ယခုကဲ့သို့ ဆောင်ရွက်နေစဉ်ကာလအတွင်း
လူမှုကွန်ယက်စာမျက်နှာများအပေါ်တွင်အတည် မပြုနိုင်သော ရွှေဈေးနှင့်ပတ်သတ်၍ သတင်းအချက်အလက်အမှားများဖြန့်ဝေသည့်သူများရှိနေသောကြောင့်အသင်းအနေဖြင့် အခါအားလျော်စွာ ပန်ကြားချက်များ ထုတ်ပြန်၍ သတိပေးတားမြစ်သွားမည်ဖြစ်ကြောင်းသိရသည်။
