မေ ၇
စစ်ကောင်စီက ပုဒ်မနှစ်ခုတပ်ကာ ဖမ်းဆီးထားသော မန္တလေးတိုင်းဝန်ကြီးချုပ် ဒေါက်တာဇော်မြင့်မောင်အနေဖြင့် ဆေးဝါးကုသရန်လိုအပ်သောကြောင့် အာမခံရရှိရန် နှစ်ဖက်အပြီးသတ်လျှောက်လွှဲချက်ကို မန္တလေး ခရိုင်တရားရုံးက မေ ၁၃ ရက်သို့ ချိန်းဆိုထားရှိကြောင်း တရားလွှတ်တော်ရှေ့နေ တစ်ဦးက ပြောကြားသည်။
ပြီးခဲ့သော မေ ၄ ရက်က ဒေါက်တာဇော်မြင့်မောင်အတွက် အာမခံပေးသင့်/ မပေးသင့် အမိန့်ချမှတ်ရ မည့်အပေါ် မန္တလေးခရိုင်တရားရုံးက အစိုးရဘက်မှ ဥပဒေအရာရှိကိုဆင့်ခေါ်၍ မေ ၁၃ ရက် ရုံးချိန်းတွင် နှစ်ဘက် အပြီးသတ်လျှောက်လွှဲချက်ပေးရန် ပြောကြားခဲ့ကြောင်း ၎င်းက ဆိုသည်။
“ ကျွန်တော်တို့ ဥပဒေအမြင်ကတော့ ပေးသင့်တယ်။ သူ့ ကျန်းမာရေးအခြေအနေက အခုမှ ဖြစ်လာတာမဟုတ်ဘူး။ အစောပိုင်းထဲက ဆေးဝါးကုသနေရတာ။ အခုလည်း သမားတော်ငါးဦးပါ ဘုတ်အဖွဲ့ဆုံးဖြတ်ချက်နဲ့ ဆေးကုသနေရတယ်။ ကျင့်ထုံး ၄၉၇/၁ အရလည်း ဆေးကုသဖို့ပေါ်ပေါက်နေရင် ပေးရမယ်လို့ ပြောထားတာရှိတယ်။ ကျွန်တော်တို့ဘက်ကတော့ သေချာအောင်ကြိုးစားဆောင်ရွက်မှာပါ။ (မေ ၇)ရက်မှာ ဒေါက်တာဇော်မြင့်မောင်နဲ့ တွေ့ဆုံဖို့ရှိပါတယ်” ဟု ၎င်းက သုံးသပ်ပြောကြားသည်။
မန္တလေးတိုင်းဒေသကြီး၊ အောင်မြေသာစံမြို့နယ်တရားရုံးတွင် ဧပြီလ ၉ ရက်၌ ဒေါက်တာဇော်မြင့်မောင် ကျန်းမာရေးအတွက် အာမခံလျှောက်ထားရာ ပယ်ချခံခဲ့ရသောကြောင့် ဧပြီ ၂၀ ရက်တွင် မန္တလေး ခရိုင်တရားရုံးသို့ ရာဇဝတ်ထွေအထွေအမှု အမှတ် ၃၁/၃၂ အရ အယူခံဝင်လျှောက်ထားတင်ပြခဲ့ရာ လက်ခံခဲ့ကြောင်း ဆိုသည်။
ဒေါက်တာဇော်မြင့်မောင်ကို နိုင်ငံတော်အကြည်ညိုပျက်ဆီးစေမှု ရာဇသတ်ကြီး ဥပဒေပုဒ်မ ၅၀၅(ခ) နှင့် သဘာဝဘေးအန္တရာယ်ဆိုင်ရာ စီမံခန့်ခွဲမှု ဥပဒေပုဒ်မ ၂၅/၃၀ (က) များဖြင့် စစ်ကောင်စီက အမှုဖွင့် ဖမ်းဆီးထားခြင်းဖြစ်သည်။