မေ ၄
ဖမ်းဆီးထိန်းသိမ်းခံထားရသည့် ဂျပန်သတင်းထောက် ယူကီ ကီတာဇူမီကို သတင်းမှားဖြန့်ဝေမှုဖြင့် မြန်မာအာဏာသိမ်းအကြမ်းဖက်စစ်အုပ်စုက တရားစွဲဆိုထားကြောင်း မေလ ၄ ရက် သတင်းတစ်ရပ်အရ သိရသည်။
ထိုသို့ တရားစွဲဆိုမှုက မြန်မာနိုင်ငံတွင် စစ်တပ်အာဏာသိမ်းပြီးနောက် သတင်းမီဒီယာလွတ်လပ်ခွင့်အပေါ် နောက်ထပ်ထိုးနှက်ချက်တစ်ခုလည်း ဖြစ်သည်။
ဂျပန်အလွတ်တန်းသတင်းထောက် ယူကီ ကီတာဇူမီသည် ပြီးခဲ့သည့်လက ဖမ်းဆီးထိန်းသိမ်းခံခဲ့ရပြီး ၎င်းသည် သတင်းမှားများ ဖြန့်ဝေမှုဖြင့် ကမ္ဘာ့စာနယ်ဇင်းလွတ်လပ်ခွင့်နေ့ဖြစ်သည့် မေလ ၃ ရက်တွင် တရားစွဲဆိုခံခဲ့ရကြောင်း ကျိုဒိုသတင်းအေဂျင်စီ၏ သတင်းတစ်ရပ်အရ သိရသည်။
၎င်းသည် လက်ရှိ မြန်မာနိုင်ငံတွင် ဖမ်းဆီးထိန်းသိမ်းခံထားရသည့် ဂျာနယ်လစ် ၅၀ ဦးအနက် တစ်ဦး အပါအ၀င် ဖြစ်သည်။
အာဏာသိမ်းစစ်အုပ်စုသည် ဖေဖေါ်၀ါရီ ၁ ရက် အာဏာသိမ်းပြီးနောက် အာဏာသိမ်းမှုအပေါ် ဆန့်ကျင်ဆန္ဒပြမှုများအပေါ် ဖြိုခွင်းနှိမ်နင်းခဲ့ပြီး ယင်း၏ တစ်စိတ်တစ်ဒေသအဖြစ် ဂျာနယ်လစ်များကိုလည်း ဖမ်းဆီးထိန်းသိမ်းမှုများ လုပ်ဆောင်ထားသည်။
ထိန်းသိမ်းခံ သတင်းထောက် ယူကီ ကီတာဇူမီသည် ရန်ကုန် အင်းစိန်ထောင်ထဲတွင် သီတင်းပတ်အချို့ နေထိုင်ခဲ့ရသော်လည်း ကျန်းမာရေး ကောင်းမွန်ကြောင်း အမည်မဖော်ပြသည့် ဂျပန်သံရုံး အရာရှိတစ်ဦးကို ကိုးကားပြီး ကျိုဒိုသတင်းဌာနက ဖော်ပြသည်။