ဧပြီ ၂၉
စဉ့်ကူးမြို့နယ် တောင်ကိုင်းကျေးရွာမှာ ဧပြီလ၂၉ရက်နေ့ကဆန္ဒပြဦးဆောင်သူအမျိုးသမီးတစ်ဦးကို လာရောက်ဖမ်းဆီးရာမှာ မတွေ့တာကြောင့်စစ်ကောင်စီတပ်တွေက ကျေးရွာအတွင်းကိုဝင်ရောက်ဖျက်ဆီးမှုတွေလုပ်ဆောင်သွားတယ်လို့ဒေသခံတွေကဆိုပါတယ်။
ဒါ့အပြင်အဆိုပါအမျိုးသမီးရဲ့နေအိမ်မှာ CDMဝန်ထမ်းတွေကို ထောက်ပံ့ရန်ရှိနေတဲ့ ဆန်အိတ်ပိုင်း ရှစ်ပိုင်းကိုလည်းယူဆောင်သွားတယ်လို့ပြောပါတယ်။
"ကျေးရွာတွေကို ကားနဲ့တင်မဟုတ်တော့ဘူး။ဆိုင်ကယ်နဲ့လိုက်ပတ်ပြီး ခြောက်နေတာ။လူတွေကို အကြောက်တရားတွေဝင်အောင်လုပ်နေတာ"လို့ စဉ့်ကူးမြို့နယ်သပိတ်ခေါင်းဆောင်တစ်ဦးကပြောပါတယ်။
ကျေးရွာအတွင်းကလက်ဖက်ရည်ဆိုင်ထိုင်နေတဲ့ ပန်းရံအလုပ်သမားအဖွဲ့တွေကို ဝမ်းလျားမှောက်ခိုင်းပြီးကြိမ်လုံးနဲ့ရိုက်နှက်တာတွေကို စစ်ကောင်စီတပ်တွေကလုပ်ဆောင်ခဲ့တယ်လို့ဆိုပါတယ်။ဒါ့အပြင်လေးခွရောင်းတဲ့ ကျေးရွာစတိုးဆိုင်တွေကိုလည်း ကာကွယ်ရေးပစ္စည်းရောင်းတယ်ဆိုတဲ့ အကြောင်းပြချက်နဲ့ငွေကျပ်၂သိန်းစီတောင်းရမ်းခဲ့တယ်လို့ဆိုပါတယ်။
"ကျွန်တော်တို့ကျေးရွာတွေကို ပြောချင်တာက ကျွန်တော်တို့ကြောက်လှန့်နေဖို့မလိုဘူး။အခုချိန်လိုအပ်ရင်ရှောင်ရမယ်။ဒါပေမယ့် ကျွန်တော်တို့မှာသူတို့ကို တော်လှန်မယ့်စနစ်တကျအဖွဲ့အစည်းတွေရှိပြီးသားမို့ မကြောက်ကြဖို့ပြောချင်ပါတယ်"လို့ စဉ့်ကူးမြို့နယ်သပိတ်ခေါင်းဆောင်ကဆိုပါတယ်။
