ဖားကန့်မြို့ရဲ့ စစ်တပ်ဗျူဟာကုန်းကို ကချင်လွတ်လပ်ရေးတပ်မတော်(ကေအိုင်အေ)က ဝင်ရောက်စီးနှင်းတိုက်ခိုက်ခဲ့ပြီး၊ အာဏာသိမ်းစစ် ကောင်စီရဲ့ တပ်များနဲ့ တိုက်ပွဲပြင်းထန်နေဆဲဖြစ်တယ်လို့ ဒေသခံတွေထဲကနေ သိရပါတယ်။
ဖားကန့်မြို့ပေါ်ရှိ မြို့မရပ်ကွက်အတွင်းက ကလပ်ကုန်းမှာတပ်စွဲထားတဲ့ စစ်ကောင်စီ၏ တပ်ဗျူဟာကုန်းကို မနေ့ည ၁၀နာရီအချိန်လောက်မှစပြီး တိုက်ပွဲပြင်းထန်နေကြောင်း ဒေသခံတွေထံကနေ သိရပါတယ်။
ဒီလိုဖြစ်ပွားခဲ့တဲ့ တိုက်ပွဲတွေကြောင့် ဖားကန့်မြို့ပေါ်ရပ်ကွက်တချို့က ပြည်သူများအနေနဲ့ ကတုတ်ကျင်းအတွင်း ပုန်းအောင်းနေကြောင်း သိရပါတယ်။
ဖားကန့်မြို့နယ်အတွင်းမှာက မနေ့ညနေ ငါးနာရီအချိန်လောက်ကစပြီး အောင်ဘာလေကျေးရွာအနီးက အာဏာသိမ်းစစ်ကောင်စီရဲ့တပ်ဖွဲ့ဝင်များနဲ့ ကချင်လွတ်လပ်ရေးတပ်မတော် KIA အကြား တိုက်ပွဲများစတင်ဖြစ်ပွားခဲ့ပြီး၊ ဖားကန့်မြို့စစ်တပ်ဗျုဟာကုန်းကို ကေအိုင်အေက ဝင်ရောက်စီးနှင်းတိုက်ခိုက်ခဲ့တာပါ။
