ဇွန်လ ၁၅
ရခိုင်ပြည်နယ် အမ်းမြို့တွင်ဖွင့်လှစ်ထားသည့် စစ်ဘေးရှောင်စခန်းနှစ်ခုတွင်ရှိသည့် ကျောင်းနေအရွယ်ကလေးငယ် စုစုပေါင်း ၄၂၅ဦးကျော်သည် ယခုနှစ်အတန်းပညာသင်ကြားရေးအတွက် ကျောင်းသုံးပစ္စည်းများနှင့် ကျောင်းတက်ခွင့်ရရှိရန် အခက်အခဲရှိနေသည်။
အမှတ်(၁)စစ်ဘေးရှောင်စခန်းဥက္ကဋ္ဌဦးသန်းချိုက“ အမှတ် ၁စစ်ဘေးရှောင်စခန်းမှာ ရှိနေတဲ့ကျောင်းတက်တဲ့အရွယ်ကလေးငယ် စုစုပေါင်းက ၂၅၅ ဦးရှိပါတယ်။ အလယ်တန်းအထက်တန်းက ၁၀၀နဲ့မူလတန်းအရွယ်က ၁၅၅ဦးရှိပါတယ်။ အခုကျောင်းတွေပြန်ဖွင့်ပြီဆိုတော့ ၉တန်းနဲ့၁၀တန်းကို ကျောင်းတွေပြန်အပ်ခိုင်းပါတယ်။ မူလတန်းအဆင့်ကို ဒီစခန်းမှာပဲသင်ကြားပေးခွင့်ရအောင် မြို့နယ်အုပ်ချုပ်ရေးမှူး ကိုစာတင်ထားပါတယ်။ “ ဟု မဇျ္စိမသတင်းဌာနကိုပြောသည်။
စစ်ရှောင်စခန်းသို့ရွှေ့ပြောင်းလာကြသူများအနေဖြင့်မိမိတို့မူလနေထိုင်ခဲ့သောကျေးရွာများတွင်ကျောင်းပြန်လည်အပ်လျှင်ယခုနေထိုင်သောနေရာမှကျောင်းသွားတက်ရန်အခက်အခဲများရှိနေကြသည်။ထို့ကြောင့်ကျောင်းအပ်နှံချိန်တွင် အထက်တန်းနှင့်အလယ်တန်းကိုအမ်းမြို့ပေါ်မှကျောင်းများတွင်အပ်နှံခွင့်ရရှိရေးနှင့်မူလတန်းကို တော့စစ်ရှောင်စခန်းများတွင်သာ သင်ကြားခွင့်ရရှိရေးအတွက်အုပ်ချုပ်ရေးတာဝန်ရှိသူများနှင့် ညှိနှိုင်းဖြေရှင်းနေကြာင်း သိရသည်။
အမှတ် ၁ စစ်ဘေးရှောင်စခန်း (ပဲပဒုံကယ်ဆယ်ရေးစခန်း)တွင် လူဦးရေ ၆၄၈ ဦးထိရှိလာပြီး ကျေးရွာပေါင်း ၁၄ ရွာ ၊ အိမ်ထောင်စု ၁၃၀ စုမှပြောင်းရွေ့လာကြသူများနေထိုင်ကြသည်။အမ်းမြို့အနီးက ဒါးလက်အုပ်စု (ဒါးလက်ချောင်း ဒေသ)တွင် စားနပ်ရိက္ခာသယ်ယူခွင့် မရရှိသည့်အတွက် ရိက္ခာ ပြတ်တောက် သည့်ကာလကြာလာသောကြောင့် စစ်ရှောင်စခန်းများသို့လာရောက်နေထိုင်ကြခြင်းဖြစ်ကြောင်း ဦးသန်းချိုက ပြောဆိုခဲ့သည်။
ပုံ - ဦးသန်းချို ( အမှတ်၁စစ်ဘေးရှောင်စခန်း)
“ကျောင်းတွေကပြန်ဖွင့်တော့မယ်ဆိုတော့အဓိကလိုအပ်နေတာ ကျောင်းသုံးပစ္စည်းတွေပါ။ ထီးတွေကလှူထားတာရှိပါတယ်။ကျောင်းသားတစ်ယောက်ချင်းစီအတွက် စစ်တွေကောလိပ်ကျောင်းသားဟောင်းတွေ နဲ့ ဂျပန်ပြန်ရခိုင်လူမျိုးတွေ စာအုပ်စာတမ်းတွေ၊ကျောင်းဝတ်စုံတွေ ၊ မိုးကာအကျီ်၊ အတန်းကြီးရင်ကြီးသလိုပေါ့ “ ဟု အမှတ်၂စစ်ဘေးရှောင်စခန်းမှာ စည်းကမ်းထိန်းသိမ်းရေးကော်မတီ ဥက္ကဋ္ဌ ဦးစိုးသိန်းက ပြောသည်။
ယခင်က ၂၀၀ကျော်သာရှိသော ထိုစစ်ရှောင်စခန်းများသို့ ယခုနှစ် မေလကုန်မှစတင်ကာ ကျေးရွာများမှရွေ့ပြောင်းလာကြခြင်းဖြစ်ပြီးယခုလကုန်ပိုင်းမှာတော့ စစ်ဘေးရှောင်စခန်း နှစ်ခုတွင် လူဦးရေ ၁၅၀၀ ကျော်လာပြီး စားသောက်ရေး နှင့်နေထိုင်ရေးတို့အတွက် အခက်အခဲများဖြစ်ပေါ်နေကြောင်းသိရသည်။
အမှတ်၂စစ်ဘေးရှောင်စခန်းကို ကစုကွန်းနှင့်ဒါးလက်အုပ်စုတို့ဘက်သို့ အများဆုံးရောက်ရှိလာကြတာဖြစ်ပြီး ရွာပေါင်း ၂၃ ရွာမှလူပေါင်း ၈၆၂ ဦးတို့က စစ်ဘေးရှောင်လာကြခြင်းဖြစ်သည်။
ကျောင်းအပ်နှံနိုင်သည့်ကာလမှာ ဇူလိုင်လ၁၃ရက်နေ့မှ၁၇ ရက်နေ့အထိဖြစ်ပြီး ဇူလိုင်လ ၂၁ရက်နေ့မှာတော့ သင်ရိုးသစ် ဒသမတန်းနှင့် သင်ရိုးဟောင်းဒသမတန်းတို့ ကျောင်းပြန်တက်ကြရမည်ဖြစ်သည်။
