ဧပြီလ ၂၉
ရန်ကုန်တိုင်းဒေသကြီး၊ မြောက်ဥက္ကလာပမြို့နယ် ၊ (ဈ)ရပ်ကွက်၊စက္ကဝတ်(၁)လမ်းရှိ နေအိမ်အတွင်းမှ သေနတ် အပါအဝင်ဆက်စပ်ပစ္စည်းများနှင့် ဓားများ ကို ဧပြီလ ၂၈ ရက်နေ့ ညက ဖမ်းဆီးရမိခဲ့ကြောင်းကို မြောက်ဥက္ကလာပမြို့မ ရဲစခန်းမှာ စုံစမ်းသိရှိရသည်။
မြောက်ဥက္ကလာပမြို့မရဲစခန်းမှ တာဝန်ရှိသူတစ်ဦးက ဖြေကြားရာတွင် “ဟုတ်ပါတယ်။ မနေ့ညကမိတာပါ။ အခု အဓိကသံသယရှိသူကိုဖမ်းဆီးရမိဖို့အတွက် လုပ်ဆောင်နေပါတယ် “ ဟု မဇ္ဈိမသတင်းဌာန ကိုအတည်ပြုဖြေကြားသည်။
ယင်းနေအိမ်အတွင်းတွင် တရုတ်နိုင်ငံလုပ်လေသေနတ်အမျိုးစားနှစ်လက်တွင်လေအိုးဖြင့် ပစ်ရသည့် သေနတ်တစ်လက် ပါဝင်ကြောင်း နှင့် ဆက်စပ်ပစ္စည်းများ ကိုလာရောက်စစ်ဆေးသည့် ရန်ကုန်တိုင်းဒေသကြီး လစရ (၄) လက်နက်စစ်ဆေးရေးအဖွဲ့ မှတာဝန်ရှိသူတစ်ဦး ကလည်း အခုလိုပြောဆိုခဲ့သည်။
“ပြောင်းရှည် နှစ်လက်ပါ။ တရုတ်နိုင်ငံထုတ် လေသေနတ်အမျိုးအစားပါ။ တစ်လက်က လေအိုးနဲ့တပ်ပစ်ရတဲ့ဟာပါ။ကျန်တာက သူဆက်စပ်ပစ္စည်းတွေ ကိုပါလာရောက်စစ်ဆေးနေတာပါ “ ဟု မဇ္ဈိမသတင်းဌာနကို ဖြေကြားခဲ့သည်။
အဆိုပါနေအိမ်တွင်နေထိုင်သူများသည်ထွက်ပြေးတိမ်းရှောင်နေပြီးနေအိမ်အတွင်းတွင် သေနတ်နှစ်လက်နှင့်ဆက်စပ်ပစ္စည်းများဒါ့အပြင်ဓားအလက်နှစ်ဆယ်ခန့်တို့ကိုသိမ်းဆည်းရမိခဲ့ကြောင်း သိရသည်။
လက်ရှိအချိန်တွင် ယင်းနေအိမ်တွင် နေထိုင်သည့် သံသယရှိသူကို ဖမ်းဆီးရမိရေးအတွက် စုံစမ်းစစ်ဆေးရှာဖွေ လျက်ရှိကြောင်းကို မြောက်ဥက္ကာလပ ရဲစခန်းမှာ သိရသည်။
ထိုအမှုကို မြောက်ဥက္ကလာပ မြို့မရဲစခန်း က ပ ၊ ၉၈၂ /၂၀၂၀ လက်နက်ဥပဒေပုဒ်မ ၁၉ (စ) ဖြင့် အမှုဖွင့်အရေးယူထားကြောင်း သိရှိရသည်
