နေပြည်တော်၊ အောက်တိုဘာ ၁၇။ ။ တစ်နိုင်ငံလုံးပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA)ကို အကောင်အထည်ဖော်မှုဆိုင်ရာညှိနှိုင်း အစည်းအဝေး (JICM) ပထမအကြိမ် အစည်းအဝေးအပြီးတွင် ဒုတိယအကြိမ်အစည်းအဝေးကို နိုဝင်ဘာ လလယ်တွင် ကျင်းပရန် သဘောတူညီကြောင်း နှစ်ဖက်ပူးတွဲ ကြေငြာချက်တစ်စောင်ကို အောက်တိုဘာ ၁၇ရက်က ထုတ်ပြန်လိုက်သည်။
ယင်းထုတ်ပြန်ချက်ကို ပထမအကြိမ် အစည်းအဝေးအပြီးတွင် ပအိုဝ်းအမျိုးသားလွတ်မြောက်ရေးအဖွဲ့ (PNLO) ဥက္ကဋ္ဌ ဦးခွန်မြင့်ထွန်းက နှစ်ဖက်ခေါင်းဆောင်များ၊ မီဒီယာများ ရှေ့မှောက်တွင် ဖတ်ကြားခဲ့ခြင်းဖြစ်သည်။
သဘောတူညီချက်တွင် ဒုတိယအကြိမ် JICM အစည်းအဝေးကို နိုဝင်ဘာလ လလယ်ပိုင်းတွင် ထပ်မံကျင်းပရန် သဘောတူခဲ့ကြပြီး NCA စာချုပ်ပါ သဘောတူညီချက်များ နှင့် အညီ နိုင်ငံရေး ဆွေးနွေးပွဲများ ကျင်းပနိုင်ရန် ဆက်လက်ဆောင်ရွက်သွားမည်ဟူသည့် အချက်အပါအဝင် ငါးချက်ပါသည့် ပူးတွဲကြေငြာချက် ထုတ်ပြန်ခဲ့သည်။
ပထမအကြိမ် အစည်းအဝေးအတွင်း ပစ်ခတ်တိုက်ခိုက်မှု ရပ်စဲရေး ပူးတွဲစောင့်ကြည့်ရေးကော်မတီ (JMC) နှင့် ပြည်ထောင်စု ငြိမ်းချမ်းရေးဆွေးနွေးမှု ပူးတွဲကော်မတီ (UPDJC)ကို ဖွဲ့စည်းခဲ့ပြီး UPDJC၏ လုပ်ပိုင်ခွင့်အာဏာ နှင့် ဖွဲ့စည်းမှု ပုံသဏ္ဍန်ကို ဆွေးနွေးသဘောတူညီနိုင်ခဲ့သည်။
ယင်းUPDJC ကော်မတီတွင် ဒု-သမ္မတ ဒေါက်တာစိုင်းမောက်ခမ်းက ဥက္ကဋ္ဌအဖြစ် တာဝန်ယူပြီး ဒု-ဥက္ကဋ္ဌအဖြစ် အစိုးရဘက်မှ ပြည်ထောင်စုဝန်ကြီးဦးအောင်မင်း နှင့် တိုင်းရင်းသားလက်နက်ကိုင် တော်လှန်ရေးအဖွဲ့များဘက်က KNU မှ ဖဒိုကွယ်ထူးဝင်းက ဆောင်ရွက်မည်ဖြစ်ပြီး နိုင်ငံရေးပါတီများအတွက် တစ်နေရာစာ ချန်ပေးထားကာ အတွင်းရေးမှူးများအဖြစ် အစိုးရဘက်က ဦးလှမောင်ရွှေ၊ တိုင်းရင်းသားလက်နက်ကိုင် တော်လှန်ရေးအဖွဲ့အစည်းဘက်မှ ဒေါက်တာဆလိုင်းလျန်မှုန်း နှင့် နိုင်ငံရေးပါတီဘက်မှ တစ်ဦးတို့က တာဝန်ယူဆောင်ရွက်မည်ဟု ဒေါက်တာဆလိုင်းလျန်မှုန်းက မီဒီယာများကို ရှင်းပြသည်။
ယင်းအပြင် JMC လို့ခေါ်သည့် ပစ်ခတ်တိုက်ခိုက်မှု ရပ်စဲရေး ပူးတွဲစောင့်ကြည့်ရေးကော်မတီ အနေဖြင့် အောက်တိုဘာလ ၂၉ရက် နှင့် ၃၀ရက်တို့တွင် ပြန်လည်တွေ့ဆုံမည်ဖြစ်ပြီး ယင်းကော်မတီတွင် အစိုးရဘက်မှ ဗိုလ်မှူးကြီး ကျော်စိုးဝင်း နှင့် ဒေါက်တာမင်းဇော်ဦးတို့က ဆောင်ရွက်မည်ဖြစ်ပြီး တိုင်းရင်းသားလက်နက်ကိုင် တော်လှန်ရေးအဖွဲ့များဘက်မှ ဖဒိုသာထိုမှူး နှင့် ဒေါက်တာရွှေခါးရ်တို့က ဆောင်ရွက်မည်ဟု သိရသည်။
"NCAကို ကျွန်တော်တို့ ထိုးပြီးတဲ့နောက်ပိုင်း လက်တွေ့အကောင်အထည် မဖော်နိုင်ရင်ဘဲ ပြည်သူလူထုကြားမှာ သံသယလည်း ရှိနိုင်တယ်။ အမျိုးမျိုးဖြစ်နိုင်တဲ့အချိန်မှာ ကျွန်တော်တို့ လုပ်သင့်လုပ်ထိုက်တဲ့ NCA ရဲ့ အစီအစဉ်များကို ဆက်လက် လုပ်ကိုင်ခြင်းအားဖြင့် JICM ကို ခေါ်ယူနိုင်ခြင်းဖြစ်ပါတယ်"ဟု ချင်းအမျိုးသားတပ်ဦး (CNF)ဥက္ကဋ္ဌ ပူးနန်လျန်ထန်းက အစည်းအဝေး အပိတ်မိန့်ခွန်းတွင် ပြောကြားခဲ့သည်။
ယင်းကော်မတီများ၏ လုပ်ငန်းစဉ် နှင့် ပါဝင်မည့်သူ အသေးစိတ်ကို နိုဝင်ဘာလလယ်တွင် ကျင်းပမည့် UPDJC အစည်းအဝေးတွင် ဆောင်ရွက်နိုင်ရန် မျှော်မှန်းထားသည်ဟု ဒေါက်တာဆလိုင်းလျန်မှုန်းက ပြောသည်။
အောက်တိုဘာ ၁၆ရက် နှင့် ၁၇ရက် နှစ်ရက်တာ နေပြည်တော်ရှိ Hotel Max တွင် ကျင်းပခဲ့သည့် JICM အစည်းအဝေးတွင် အပစ်ရပ်လက်မှတ်မထိုးနိုင်သေးသည့် အဖွဲ့များအတွက်လည်း ငြိမ်းချမ်းရေးဖြစ်စဉ်တွင် ဂုဏ်သိက္ခာရှိစွာ ပူးပေါင်းပါဝင်နိုင်ရေးအတွက် နှစ်ဘက်ကြိုးပမ်းရန်လည်း သဘောတူခဲ့သေးသည်။
အစည်းအဝေးကို ဒု-သမ္မတ ဒေါက်တာစိုင်းမောက်ခမ်းက ဖွင့်လှစ်ပေးခဲ့ပြီး အစိုးရဘက်မှ ဝန်ကြီးဦးအောင်မင်း ဦးဆောင်ကာ၊ တပ်မတော်မှ ဗိုလ်မှူးကြီးများ တက်ရောက်ခဲ့ပြီး တိုင်းရင်းသားများဘက်က အပစ်ရပ်လက်မှတ်ထိုးထားသည့် တိုင်းရင်းသားလက်နက်ကိုင် အဖွဲ့များ တက်ရောက်ခဲ့ကြသည်။
