ရန်ကုန်၊ ဖေဖော်ဝါရီ ၂၇ ။ ။ လူမှုကွန်ရက်စာမျက်နှာများတွင် ရခိုင်ပြည်နယ်ဝန်ကြီးချုပ် ခြုံခိုတိုက်ခိုက်ခံရခြင်းကြောင့် သေဆုံးသွားပြီဆိုသည့်သတင်းများမှာ မှန်ကန်မှုမရှိကြောင်း ပြည်နယ်အစိုးရပြောရေးဆိုခွင့်ရှိသူ ရခိုင်ပြည်နယ် စည်ပင်သာယာရေးဝန်ကြီး ဦးဝင်းမြင့်က မဇ္ဈိမသို့အတည်ပြုပြောဆိုသည်။
"ဒါတွေကမဟုတ်ပါဘူး။ ဝန်ကြီးချုပ်က နေပြည်တော်မှာပါ။သတင်းမှားတွေပါ" ဟု ဦးဝင်းမြင့်က ဆိုသည်။
ဖေဖော်ဝါရီ ၂၇ ရက်နေ့ ည ၇ နာရီခန့်မှ စပြီး လူမှုကွန်ရက်စာမျက်နှာများတွင် ရခိုင်ပြည်နယ်၊ ပုဏ္ဏားကျွန်းမြို့နယ် ပန်းနီလာရွာအနီး၌ ဝန်ကြီးချုပ်ယာဉ်တန်းအား AA အဖွဲ့မှ ခြုံခိုတိုက်ခိုက်ခဲ့ပြီး ဝန်ကြီးချုပ် ဦးညီပု နှင့် ပြည်နယ်ရဲတပ်ဖွဲ့မှူး သေဆုံးခဲ့သည်ဟု သတင်းများ ပျံ့နှံလာနေခြင်းဖြစ်သည်။
အဆုိပါနေရာအနီးတွင် တပ်မတော်ယာဉ်တန်း တစ်ခု ခြုံခိုတိုက်ခိုက်ခံရကြောင်း သတင်းများကြားသိရသော်လည်း မဇ္ဈိမအနေဖြင့် သီးခြားအတည်မပြုနိုင်သေးပေ။
