ရန်ကုန် ၊ မေ ၃၀ ။          ။ ရိုးမဘဏ်နှင့် Early Dawn Microfinance Company Limited (DAWN) တို့အကြား အမေရိကန်ဒေါ်လာ ၁၀ သန်း တန်ဖိုးရှိ ဘဏ္ဍာရေးထောက်ပံ့မှု သဘောတူညီချက်ကို မေလ ၂၉ ရက်နေ့က လက်မှတ်ရေးထိုးခဲ့ကြသည်။

ယင်းသဘောတူညီချက်အရ မြန်မာနိုင်ငံတစ်ဝန်းလုံးရှိ အသေးစား စွန့်ဦးတီထွင်လုပ်ငန်းရှင်ပေါင်း ၃၀,၀၀၀ အား ထပ်မံချေးငွေထုတ်ချေးနိုင်မည်ဖြစ်သည်။

“အမေရိကန်အစိုးရ၊ ရိုးမဘဏ်နဲ့ DAWN တို့ကြား ပူးပေါင်းဆောင်ရွက်ကြတဲ့ ဒီအမေရိကန်ဒေါ်လာ ၁၀ သန်း စီမံကိန်း ကနေပြီး မြန်မာနိုင်ငံအတွင်းက နောက်ထပ်ပြည်သူတွေ ချေးငွေရရှိစေမှာဖြစ်ပြီး စီးပွားရေးလုပ်ငန်း အသစ်တွေစတင် ဆောင်ရွက်ရေး၊ ကလေးတွေ ကျောင်းထားနိုင်ရေးနဲ့ လုပ်ငန်းတွေထဲမှာ ပိုမိုရင်းနှီးမြှုပ်နှံ နိုင်ရေးအတွက် အထောက်အကူ ပြုမှာဖြစ်ပါတယ်” ဟု လက်မှတ်ရေးထိုးသည့် အခမ်းအနားတွင် အမေရိကန် သံအမတ်ကြီး မာစီရယ်လ်က ပြောကြားခဲ့ပါသည်။

အမေရိကန်အစိုးရ၏ကဏ္ဍအစိတ်အပိုင်းတစ်ရပ်ဖြစ်သည့် နိုင်ငံရပ်ခြား ပုဂ္ဂလိကရင်းနှီးမြှုပ်နှံမှုကော်ပိုရေးရှင်း (Overseas Private Investment Corporation-OPIC) သည် မြန်မာနိုင်ငံအတွင်းရှိ   ပြည်သူအားလုံးချေးငွေပိုမို ရရှိရေးအတွက် ရိုးမဘဏ် ၊ DAWN တို့နှင့်လက်တွဲဆောင်ရွက်လျက်ရှိသည်။

ဘဏ္ဍာရေးထောက်ပံ့မှု သဘောတူညီချက်အရ အမေရိကန်အခြေစိုက် OPIC က လေးနှစ်သက်တမ်းကြာ ထောက်ပံ့ ပေးအပ်သည့် အမေရိကန်ဒေါ်လာ ၄ သန်းကို ရိုးမဘဏ်က မြန်မာကျပ်ငွေဖြင့် ဒေသအလိုက် ထုတ်ချေးပေးပြီး DAWN က အပြည့်အဝ ထိန်းချုပ်ကန့် သတ်နိုင်မည် ဖြစ်သည်။

"အရေးအကြီးဆုံးကတော့ အတူတကွ လက်တွဲပြီး မြန်မာနိုင်ငံမှာရှိတဲ့ အသေးစား စွန့်ဦးတီထွင်လုပ်ငန်းရှင်တွေကို ပံ့ပိုးကူညီနိုင်မှာ ဖြစ်ပါတယ်" ဟု ဟု ရိုးမဘဏ်၏ Special Advisor to the Chairman and CEO ဖြစ်သူ Mr. Hal Bosher က ပြောသည်။

Dawn သည် မြန်မာနိုင်ငံ တွင် ရုံးခွဲပေါင်း ၄၀ ခု ဖွင့်လှစ်ထားပြီး အသေးစား စွန့်ဦးတီထွင်လုပ်ငန်းရှင်များနှင့် အသေးစား စီးပွားရေး လုပ်ငန်းပေါင်း ၁၅၅,၀၀၀ အား ၀န်ဆောင်မှု ပေးနေသည့် ကုမ္ပဏီဖြစ်သည်။

“ပြည်တွင်းသုံးငွေကြေးနဲ့ ဘဏ္ဍာရေးကူညီထောက်ပံ့ပေးမှုကြောင့် DAWN အနေနဲ့ နိုင်ငံတစ်ဝန်းရှိ အသေးစား စွန့်ဦးတီထွင်လုပ်ငန်းရှင်နဲ့ စီးပွားရေးလုပ်ငန်းငယ်ပေါင်း သုံးသောင်းကျော်ကို ထပ်တိုး ၀န်ဆောင်မှု ပေးနိုင်တော့မှာ ဖြစ်ပါတယ်။ ၀န်ဆောင်မှုပေးတဲ့အခါမှာလည်း ကျွန်တော်တို့ရဲ့ အစုရှယ်ယာဝင်တွေဖြစ်တဲ့ Accion, FMO နဲ့ Triodos တို့ရဲ့ ပံ့ပိုးမှုနဲ့အတူ မဝေးတော့တဲ့အနာဂတ်မှာ စာရွက်စာတမ်းမလို၊ ငွေသားမလိုတဲ့ လုပ်ငန်းလည်ပတ်မှုစနစ်ကို အကောင် အထည်ဖော်နိုင်ဖို့ ရည်ရွယ်ပြီး Client ဗဟိုပြုဒီဇိုင်းတွေကို အခြေခံထားတဲ့ Product နဲ့ ၀န်ဆောင်မှုတွေ ပေးအပ်နိုင်မှာ ဖြစ်ပါတယ်” ဟု DAWN ၏ CEO ဖြစ်သူ Gonzalo González A က ထုတ်ဖော်ပြောကြားခဲ့သည်။

ယခု ဘဏ္ဍာရေးသဘောတူညီချက်သည် ရိုးမဘဏ်အတွက် ခြောက်ကြိမ်မြောက် သဘောတူညီချက်ဖြစ်ပြီး ဆက်လက်၍လည်း သဘောတူညီချက် လက်မှတ်ရေးထိုးမှုများ ပြုလုပ်သွားမည်ဟုလည်း သိရသည်။