ရန်ကုန် ၊ သြဂုတ် ၆ ။ ။ ရခိုင်ပြည်နယ်မြောက်ပိုင်း မောင်တောဒေသ၌ လူမျိုးတုန်းသတ်ဖြတ်မှုများ လုံးဝမရှိကြောင်း နှင့် လူသားမျိုးနွယ်အား ဆန့်ကျင်သည့် ရာဇဝတ်မှုဖြစ်နိုင်ချေလည်း လုံးဝမရှိဟု မောင်တောစုံစမ်းစစ်ဆေးရေးကော်မရှင်က တုံ့ပြန်ပြောဆိုလိုက်သည်။
သြဂုတ်လ ၆ ရက်တွင် ရန်ကုန်မြို့ တက္ကသိုလ်ရိပ်သာလမ်းရှိ စိမ်းလဲ့ကန်သာ နိုင်ငံတော်ဧည့်ရိပ်သာ၌ပြုလုပ်သည့် မောင်တောဒေသစုံစမ်းစစ်ဆေးရေးကော်မရှင်၏ သတင်းစာရှင်းလင်းပွဲတွင် ကော်မရှင်ဥက္ကဌဖြစ်သူ ဒုတိယသမ္မတ ဦးမြင့်ဆွေက ပြောဆိုလိုက်ခြင်းဖြစ်သည်။
"ကုလသမဂ္ဂလူ့အခွင့်အရေးဆိုင်ရာမဟာမင်းကြီးရုံးက သုံးသပ်တဲ့ လူသားမျိုးနွယ်အား ဆန့်ကျင်သည့် ရာဇဝတ်မှု ဖြစ်နိုင်ချေ လုံးဝမရှိပါကြောင်းနဲ့ လူမျိုးတုန်းသတ်ဖြတ်မှုဟု ယူဆနိုင်သည့် အနေအထားလည်း လုံးဝမရှိပါကြောင်း ပြောကြားလိုပါတယ်" ဟု ဒုတိယသမ္မတ ဦးမြင့်ဆွေက ပြောဆိုခဲ့သည်။
ကုလသမဂ္ဂလူ့အခွင့်အရေးဆိုင်ရာမဟာမင်းကြီးရုံး(OHCHR) မှ ၂၀၁၇ ဖေဖော်ဝါရီလ ၃ ရက်က ထုတ်ပြန်ခဲ့သည့် အစီရင်ခံစာတွင် ရခိုင်ပြည်နယ်မြောက်ပိုင်း၌ ဘင်္ဂါလီ(ရိုဟင်ဂျာ) များကို လူမျိုးတုန်းသတ်ဖြတ်မှုများရှိနိုင်ကြောင်း ယူဆဖွယ်ရာအချက်များ မြင်တွေ့ရသည်ဟု ထည့်သွင်းဖော်ပြခဲ့ခြင်းဖြစ်သည်။
ဒုတိယသမ္မတဦးမြင့်ဆွေဦးဆောင်သည့် မောင်တောစုံစမ်းစစ်ဆေးရေးကော်မရှင်အနေဖြင့် မောင်တောရှိ ကျေးရွာများကို ကွင်းဆင်းစစ်ဆေးခဲ့သော်လည်း ကုလသမဂ္ဂလူ့အခွင့်အရေးဆိုင်ရာ မဟာမင်းကြီးရုံး(OHCHR) မှ ဖော်ပြသည့် အချက်အလက်များနှင့် ကိုက်ညီခြင်းမရှှိဟု သတင်းစာရှင်းလင်းပွဲတွင် ထုတ်ဖော်ပြောဆိုခဲ့သည်။
မောင်တောစုံစမ်းစစ်ဆေးရေးကော်မရှင် အတွင်းရေးမှူးဖြစ်သူ ဦးဇော်မြင့်ဖေက "ကော်မရှင်အနေနဲ့ မောင်တောဒေသမှာ ဒီလိုအကြမ်းဖက်မှုမျိုးတွေ ထပ်မံမပေါ်ပေါက်အောင် ဘယ်လိုအဖြေရှာပြီးတော့ ကုစားမလဲဆိုတဲ့ အရှေ့ကိုမျှော်ပြီးတော့ လေ့လာဆောင်ရွက်ခဲ့တာဖြစ်ပါတယ်" ဟု ဆိုသည်။
သို့သော်လည်း နေအိမ်များမီးရှို့ခံရခြင်း၊ အဓမ္မပြုကျင့်ခံရခြင်း လုယက်ခိုးယူခံရခြင်းများ ရှိနေသည်ဆိုသည့် ပြောဆိုချက်များကို ကော်မရှင်အနေဖြင့် လုံးဝ ငြင်းဆန်ခြင်းမပြုဘဲ ဆက်လက်စုံစမ်းစစ်ဆေးရန် လွတ်လပ်စွာ အမှုဖွင့်တိုင်ကြားနိုင်သည်ဟုသာ ပြောဆိုခဲ့သည်။
ယင်းအပြင် ရခိုင်ပြည်နယ်မြောက်ပိုင်း၌ ဖြစ်ပွားနေသည့် အကြမ်းဖက်တိုက်ခိုက်မှုဖြစ်စဉ်များကို ပြည်ပနိုင်ငံများမှ ကူညီထောက်ပံ့ပေးနေသည်ဟု ဆိုသည့် အချက်ကို ကော်မရှင်က ထုတ်ဖော်ပြောဆိုခဲ့သလို မူးယစ်ဆေးဝါး ပြဿနာများဖြင့်လည်း ဆက်နွယ်နေနိုင်သည်ဟု ဝန်ခံထားသည်။
