ရန်ကုန်၊ ဧပြီ ၂၄ ။ ။ တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) လက်မှတ်ရေးထိုးရေးအတွက် ညီညွတ်သောတိုင်းရင်းသားလူမျိုးများ ဖက်ဒရယ်ကောင်စီ (UNFC) မှ တောင်းဆိုထားသည့် အချက် ၉ချက်အနက် ၁ ချက်ကိုသာ အစိုးရက သဘောတူညီထားသည်ဟု ကချင်အဖွဲ့ KIA ခေါင်းဆောင်တစ်ဦးဖြစ်သည့် ဗိုလ်ချုပ်ဂွမ်မော် က ပြောဆိုလိုက်သည်။
“UNFC ၏တောင်းဆိုချက် ၉ချက် (အားလုံး) အပေါ်အစိုးရဘက်မှ (မူအရသဘောတူခဲ့ခြင်း) မဟုတ်ဘဲ တောင်းဆိုချက် အမှတ် ၈ (တစ်ချက်တည်း) ကိုသာသဘောတူညီချက်ရရှိခဲ့ကြပါသည်" ဟူ၍ ဗိုလ်ချုပ်ဂွမ်မော်က ဧပြီ ၂၃သူ၏ လူမှုကွန်ယက်ပေါ်တွင် လက်ရေးဖြင့်ရေးထားသောစာရွက်ကို ထုတ်ပြန် ကြေငြာထားသည်။
ကျန်ရှိသည့်အချက်များ (အချက် ၈ချက်) အပေါ် ဆက်လက်ဆွေးနွေးသွားကြရန်သဘောတူညီခဲ့ကြကြောင်း ၎င်းကဆက်လက်ပြောဆိုသည်။
သို့သော် UNFC ဘက်မှအဆိုပြုသည့် အချက် ၉ ချက်ကိုဆွေးနွေးခဲ့ရာ မူအားဖြင့်သဘောတူ ညီနိုင်ခဲ့ကြောင်း အစိုးရ၏ငြိမ်းချမ်းရေးကော်မရှင်ဘက်မှ မတ် ၃ ရက်စွဲဖြင့် ထုတ်ပြန်ထားသည်။
လွန်ခဲ့သည့် မတ်လ (၃) ရက်နေ့ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန၊ ရန်ကုန်မြို့တွင် ပြုလုပ်သည့် ငြိမ်းချမ်းရေးကော်မရှင်နှင့် နိုင်ငံရေးဆိုင်ရာညှိနှိုင်းဆွေးနွေးရေးကိုယ်စားလှယ်အဖွဲ့ (DPN) တို့ ၏ စတုတ္ထအကြိမ်အစည်းအဝေးအပြီးတွင် ငြိမ်းချမ်းရေးကော်မရှင်ဘက်က ထုတ်ပြန်ခဲ့ခြင်းလည်းဖြစ်သည်။
KIA စစ်ဦးစီးချုပ်၏ ရေးသားချက်အပေါ် ပြန်ကြားရေးဝန်ကြီး ဦးရဲထွဋ်ကမူ "အကဲဆတ်တဲ့ ဆွေးနွေးပွဲတွေမှာ သတင်းထုတ်ပြန်ချက် တွေ ရှင်းလင်း တိကျဖို့ အရေးကြီးပါတယ်။" ဟု ၎င်း၏ ဖေ့ဘုတ်စာမျက်နှာတွင် မှတ်ချက်ပြုထားသည်။
အဆိုပါကိစ္စနှင့်ပက်သက်ပြီး ငြိမ်းချမ်းရေးကော်မရှင် အကြံပေးအဖွဲ့ဝင် ဦးအောင်စိုးက “တရားဝင်ဆွေးနွေးတယ် တရားဝင်ထုတ်ပြန်ချက် ထုတ်တယ် ညှိနှိုင်းချက်တွေအားလုံးကို သဘောတူညီမှုရပြီးပြီဆိုမှသတင်းထုတ်ပြန်ချက်ကို နှစ်ဖက်ညှိနှိုင်းပြီးထုတ်တာလေ။ ကျွန်တော်တို့က သူတို့နဲ့ညှိပြီး သတင်းထုတ်ပြန်ချက် ထုတ်တာပဲ အဲ့တော့သူကိုဘာမှမဝေဖန်လိုပါဘူး" ဟု ဗိုလ်ချုပ်ဂွမ်မော်ပြောဆိုချက်နှင့် ပတ်သက်ပြီး ၎င်း၏အမြင်ကိုပြောဆိုသည်။
ဗိုလ်ချုပ်ဂွမ်မော်က အချက် ၉ချက်လုံးအပေါ် မူအရသဘောတူညီမှုရရှိခဲ့မည်ဆိုပါက ဆက်လက်ငြင်းခုံဖွယ်ရာများ ရှိတော့မည်မဟုတ်ဟု ဧပြီ ၂၃ကပြောဆိုထားသည်။
အဆိုပါ အချက် ၉ချက်ကိစ္စအပြင် NCA လက်မှတ်ထိုးရေးနှင့် ဒုတိယအကြိမ် ၂၁ ပင်လုံညီလာခံကျင်းပရေးကိစ္စများကို UNFC မှဖွဲ့စည်းထားသည့် နိုင်ငံရေးဆွေးနွေးညှိနှိုင်းရေးအဖွဲ့ (DPN)တို့ ဧပြီ ၂၇၊ ၂၈ တွင် ငြိမ်းချမ်းရေးကော်မရှင်နှင့် ထိုင်းနိုင်ငံ၊ ချင်းမိုင်တွင် တွေ့ဆုံဆွေးနွေးရန်ရှိနေသည်။
ဒုတိယအကြိမ် ၂၁ ရာစု ပင်လုံ ညီလာခံကို လာမယ့် မေလ တတိယပတ်အတွင်းမှာ ကျင်းပနိုင်ဖို့အတွက် စီစဉ်နေတယ်ပြီး နေပြည်တော်တွင် ပြုလုပ်နေသည့် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် အကောင်အထည်ဖော်ရေးဆိုင်ရာ ညှိနှိုင်းအစည်းအဝေး (JICM) တွင် ၂၁ ပင်လုံပြုလုပ်မည့်ရက်ကို အတည်ပြုဆုံးဖြတ်မည်ဖြစ်သည်။