Shop.com.mm

မာရသာမုန်တိုင်းကြောင့် ဆုံးရှုံးမှုတန်​ဖိုး ကျပ်သိန်း ၄၀၀ နီးပါးရှိဟု ကနဦးထုတ်​ပြန်​

.

မဟာသင်္ကြန်အတက်နေ့ ဧပြီ ၁၆ရက် နံနက် ၁၀နာရီခန့်က ရန်ကုန်မြို့ မင်္ဂလာတောင်ညွန့်မြို့နယ်၊ ကန်/မြောက်ရပ်ကွက်၊ အထက်ပန်းဆိုးတန်းလမ်း၊ ကန်တော်ကြီးထိပ်ရှိ လုံးပတ်(၃)ပေခန့်ရှိ
မဟော်ဂနီပင်မှာ အမြစ်မှကျွတ်၍လမ်းပေါ်သို့လဲကျခဲ့ရာ ဓါတ်ကြိုးပေါ်သို့ ပိမိပြီး ဓါတ်တိုင်(၅)တိုင်ကျိုးကျခဲ့သည်။ (ဓာတ်ပုံ - သူရ/မဇ္ဈိမ)

ရန်ကုန်၊ ဧပြီ ၁၈ ။            ။ ရခိုင်ကမ်းရိုးတန်းဒေသကို ဦးတည်တိုက်ခတ်ခဲ့သည့် ဆိုင်ကလုန်းမုန်တိုင်း မာရသာကြောင့် အားလုံးအတိုင်းအတာဖြင့် ကျပ်သိန်း ၃၀၀ ကျော် ၄၀၀ နီးပါးထိခိုက်ဆုံးရှုံးခဲ့ကြောင်း လူမှုဝန်ထမ်း၊ ကယ်ဆယ်ရေးနှင့် ပြန်​လည်​နေရာချထားရေးဝန်ကြီးဌာနမှ သိရသည်။

“အားလုံးပေါင်း သူတို့မှန်းထားတာ သိန်း ၃၈၉ သိန်းကျော်လားမသိဘူး။ ပျက်စီးတယ်ပေါ့နော်။ ဒါက အားလုံးပျက်စီးတာကို ပြောတာ"ဟု လူမှုဝန်ထမ်း၊ ကယ်ဆယ်ရေးနှင့် ပြန်​လည်​နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာဝင်းမြတ်အေးက မဇ္စျိမသို့ ပြောသည်။

သို့သော် လတ်တလော တွက်ချက်ရရှိသည့် ဧပြီ ၁၈ရက်​ထိ ပျက်စီးဆုံးရှုံးမှုတန်ဖိုးသာဖြစ်ပြီး စုစုပေါင်း စာရင်းချုပ်ထွက်လာမှ ပိုပြီး တိတိကျကျဖြစ်နိုင်မည်ဟု ၎င်းက ဆိုသည်။

ငွေကျပ်သိန်း ၃၀၀ ကျော်ဆုံးရှုံးသည် ဆိုသော်လည်း ထိခိုက်မှုအများကြောင်း ဒေါက်တာဝင်းမြတ်အေးက ဆိုသည်။

“အများကြီးတော့မဟုတ်ဘူး။ အိမ်တွေမှာ အမိုးလှန်တာတို့ အဲ့​လောက်ပဲ။ တဲတွေကတော့ ပြိုတာပေါ့နော်"ဟု ၎င်းက ပြောသည်။

မာရသာမုန်တိုင်းကြောင့် လူသေဆုံးမှုအနေဖြင့် ဓာတ်လိုက်သေဆုံးသူ ၂ ဦးနှင့် သစ်ပင်ပိသေဆုံးသူ ၂ဦးရှိခဲ့ကြောင်း လူမှုဝန်ထမ်း၊ ကယ်ဆယ်ရေးနှင့် ပြန်​လည်​နေရာချထားရေးဝန်ကြီးဌာနမှ သိရသည်။

ရေကြီးပြီးသည့်နောက် သန့်ရှင်းသည့် ​သောက်သုံးရေ မရရှိမှုကြောင့် ဝမ်းပျက်ဝမ်းလျှောကဲ့သို့ ရောဂါများကိုလည်း သတိပြုရမည်ဖြစ်ကြောင်း ဒေါက်တာဝင်းမြတ်အေးက ပြောသည်။

မုန်တိုင်းဖြစ်ပွားပြီးသည့်နောက်တွင် ရေကြီးခြင်းနှင့် မြေပြိုခြင်းများဖြစ်လာနိုင်သည်ဟု လူမှုဝန်ထမ်း၊ ပြည်လည်ကယ်ဆယ်ရေးနှင့် နေရာချထား​ရေးဝန်ကြီးဌာနမှသိရသည်။

မုန်တိုင်းကြောင့် ဧရာဝတီတိုင်းဒေသကြီး၊ မော်လမြိုင်ကျွန်းမြို့နယ်၊ ရေတွင်းကုန်းကျေးရွာအုပ်စု၊ လေးဂွကြီး ကျေးရွာနှင့် ဘင်္ဂလားကြီးကျေးရွာတို့တွင် လူနေအိမ်(၁၆)လုံးပြိုလဲခဲ့ပြီး (၁၅)လုံးအမိုးလန် ပျက်စီးခဲ့ကြောင်းနှင့် ငပုတောမြို့နယ်၊ ငရုတ်ကောင်းမြို့ရှိဂေါ်ရမ်ဂျီကျွန်းမြေသားလမ်း ပျက်စီးမှု ဖြစ်ပွားခဲ့သည်။

မုန်တိုင်းဒဏ်ကြောင့် ပျက်စီးဆုံးရှုံးမှုများအပေါ် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချ ထားရေးဝန်ကြီးဌာနအနေဖြင့် လိုအပ်သည့် ထောက်ပံ့မှုများဆက်လက်ဆောင်ရွက်လျှက်ရှိကြောင်း အစိုးရက သတင်းထုတ်ပြန်ထားသည်။

Tags: