ပြီးခဲ့သော ရက်ပိုင်းအတွင်းက နှလုံးအမောဖောက်ဝေဒနာကို ခံစားခဲ့ရသူ စတားဝါးမင်းသမီးကြီး Carrie Fisher ဟာ အသက် ၆၀ အရွယ်၌ ကွယ်လွန်သွားပြီဖြစ်ကြောင်း သိရှိရပါသည်။
သူမဟာ ပြီးခဲ့သော သောကြာနေ့တုန်းက လန်ဒန်မှ လော့စ်အိန်ဂျယ်လိစ်သို့ လေယာဉ်ခရီးစဉ် ပြန်သန်းလာစဉ်၌ နှလုံးအမောဖောက်ဝေဒနာကိုခံစားခဲ့ရတာဖြစ်ပြီး သူမကို လော့စ်အိန်ဂျယ်လိစ်ရှိဆေးရုံသို့ ပို့ဆောင်ခဲ့ရပါသည်။
သူမ၏မိသားစုကပြီးခဲ့သော အင်္ဂါနေ့မှာ သူမကွယ်လွန်သွားပြီဖြစ်ကြောင်းကြေညာချက်ထုတ်ပြန်ခဲ့ပါသည်။ သူမ အား ရည်စူးဂုဏ်ပြုမှုအများအပြားရှိနေပြီး ထိုထဲကမှ သူမ၏ စတားဝါးဇာတ်ကား တွဲဖက်သရုပ်ဆောင် Mark Hamill က “ပြောစရာစကားတောင် မရှိတော့ပါဘူး။ တကယ့်ကို ယူကြံုးမရဖြစ်ရပါတယ်” လို့တွစ်တာ၌ ရေးသားခဲ့ပါသည်။
Fisher ၏သမီး Billie Lourd ၏ ကိုယ်စား ပြောရေးဆိုခွင့်ရှိသူ Simon Halls က ထုတ်ပြန်ကြေညာချက်ထဲတွင် “Billie Lourd က သူမ၏ ချစ်လှစွာသော မိခင်ကြီး Carrie Fisher ဟာ ဒီဇင်ဘာ၂၇ ရက် အင်္ဂါနေ့မနက် ၈နာရီ ၅၅ မိနစ်တွင် ကွယ်လွန်သွားပြီဖြစ်ကြောင်း အတည်ပြုပြောကြားခဲ့ပြီး ဒါဟာအလွန်ကို နက်နက်ရှိုင်းရှိုင်း ၀မ်းနည်းပူဆွေး ရပါတယ်” လို့ပြောခဲ့ပါသည်။
Carrie Fisher ဟာ ရုပ်ရှင်မင်းသမီးအဖြစ်ပါနာမည်ကျော်ကြားခဲ့ရုံသာမက ရောင်းအားအကောင်းဆုံးစာရေး ဆရာမတစ်ဦးအဖြစ်လည်းကျော်ကြားခဲ့သူဖြစ်ပါသည်။