ယခုနှစ် အမေရိကန်ပြည်ထောင်စုတွင် ကျင်းပသည့် ၆၆ ကြိမ်မြောက် မယ်ကမ္ဘာပြိုင်ပွဲတွင် ပွယ်တိုရီကိုနိုင်ငံ ကိုယ်စားပြုမယ် Stephanie Del Valle က မယ်ကမ္ဘာသရဖူကိုရရှိပြီး အနိုင်ရခဲ့ပါသည်။ သရဖူကိုတော့ ၂၀၁၅ ခုနှစ် မယ်ကမ္ဘာပြိုင်ပွဲတွင်အနိုင်ရရှိခဲ့သည့် စပိန်နိုင်ငံကိုယ်စားပြုမယ် Mireia Lalaguna က တပ်ဆင်ပေးခဲ့ပါသည်။
နယူးယောက်မြို့Pace တက္ကသိုလ်တွင် ဥပဒေနှင့်ဆက်သွယ်ရေးဘာသာ သင်ကြားနေသော ၁၉ နှစ်အရွယ် ကျောင်းသူဖြစ်သည့် Stephanie က သူမ၏နိုင်ငံကို ကိုယ်စားပြုယှဉ်ပြိုင်ရခြင်းဟာ ကြီးကျယ်မြင့်မြတ်ပြီး ဂုဏ်ယူစရာကောင်းသည့် ၀တ္တရားတစ်ခုဖြစ်ကြောင်း ပြောခဲ့ပါသည်။
အဆိုပါ ပြိုင်ပွဲရဲ့ဒုတိယဆုကိုတော့ ဒိုမီနီကန်ရီပတ်ဘလစ်နိုင်ငံ ကိုယ်စားပြုမယ် Yaritza Miguelina Reyes က ရရှိခဲ့ပြီး တတိယဆုကိုတော့ အင်ဒိုနီးရှားနိုင်ငံ ကိုယ်စားပြုမယ် Natasha Mannuela က ရရှိခဲ့ပါသည်။
ဗိုလ်လုပွဲကိုရောက်ရှိခဲ့တဲ့ ထိပ်သီးမယ် ငါးဦးစာရင်းတွင် ကင်ညာနိုင်ငံမှ Njambi Thungu နှင့် ဖိလစ်ပိုင်နိုင်ငံမှ Catriona Elisa Gray တို့ ပါ၀င်ခဲ့ကြပါသည်။
ယခုနှစ်ရဲ့ မယ်ကမ္ဘာပြိုင်ပွဲကို ၀ါရှင်တန်ဒီစီအနီးရှိ အမျိုးသားဆိပ်ကမ်းမှာ ကျင်းပခဲ့ပြီး နိုင်ငံပေါင်း ၁၀၀ ကျော်မှ ကိုယ်စားပြုမယ်များ ပါ၀င်ယှဉ်ပြိုင်ခဲ့ကြပါသည်။