နယူးယော့ခ်၊ သြဂုတ် ၁၈ ။ ။ ပေါ့ပ်ကြယ်ပွင့် တေလာဆွစ်ဖ်သည် မကြာသေးမီက ရေကြီးမှုဒဏ်ခံစားခဲ့ရသော လူးဝစ်စီယားနားပြည်နယ် အတွက် ရေဘေးကယ်ဆယ်ရေး အလှူငွေ အမေရိကန်ဒေါ်လာ တစ်သန်းလှူဒါန်းခဲ့ကြောင်း သတင်းတစ်ရပ်တွင် ဖော်ပြထားသည်။
သြဂုတ် ၁၂ရက်က လူးဝစ်စီးယားနားပြည်နယ်တွင် မိုးသည်းထန်စွာရွာသွန်းမှုကြောင့် ရေကြီးမှုဒဏ်ခံစားခဲ့ရသော ပြည်သူများကို ထောက်ပံ့မှုများ ပြုလုပ်ပေးသွားမည်ဖြစ်ကြောင်း အသက် ၂၆နှစ်အရွယ်ရှိ တေလာဆွစ်ဖ်က သြဂုတ် ၁၆ရက်တွင် အေပီသတင်းဌာနကို ပြောကြားခဲ့သည်။
“ လူးဝစ်စီးယားနားပြည်နယ်မှာ ကျွန်မရဲ့ 1989 ကမ္ဘာလှည့်ဖျော်ဖြေပွဲ စတင်ခဲ့တယ်။ပြည်နယ်မှာရှိတဲ့ ပရိတ်သတ်တွေကြောင့် ကျွန်မ ကိုယ့်အိမ်ရောက်သလို ခံစားခဲ့ရတယ်။ယခုသီတင်းပတ်က လူးဝစ်စီးယားနားပြည်နယ်မှာရှိတဲ့ ပြည်သူတွေ ရေကြီးမှုကြောင့် သူတို့ရဲ့နေအိမ်ကို စွန့်ခွာပြီး ထွက်ပြေးရတယ်လို့ ကြားရတာ စိတ်မကောင်းဖြစ်ရပါတယ်”ဟု တေလာက အေပီသတင်းဌာနကို ပြောကြားခဲ့သည်။
ရေကြီးမှုသည် ပြည်နယ်၏သမိုင်းတွင် အဆိုးရွားဆုံးရေကြီးမှုဖြစ်ခဲ့ပြီး ငါးရက်ကြာရေကြီးမှုကြောင့် လူနေအိမ်ခြေ ၄၀ ၀၀၀ ထက်မနည်း ပျက်စီးခဲ့ရပြီး ၁၁ဦးထက်မနည်းသေဆုံးခဲ့သည်။
