ချင်းမိုင်၊ သြဂုတ် ၁၅ ။ ။ ကချင်ပြည်နယ် တနိုင်းမြို့နယ် ဝါရာဇွပ်ကျေးရွာအုပ်စု ရှထူးဇွပ်ကျေးရွာအနီး မြန်မာ့တပ်မတော်နှင့် ကချင်လွတ်လပ်ရေး တပ်မတော်(KIA)တို့အကြား သြဂုတ်လ လဆန်းမှစတင်၍ ယနေ့ထိ တိုက်ပွဲ ပြင်းထန်နေပြီး စစ်ပြေး ဒုက္ခ သည် ၅၀၀ ကျော် ထွက်ပြေးတိမ်းရှောင်နေရကြောင်း သိရသည်။
သြဂုတ်လ ၁၅ ရက် နံနက် ၆ နာရီမှ စတင်၍ မွန်းလွဲပိုင်းအထိ ချောင်းဆုံကျေးရွာအနီးတွင် KIA တပ်ဟမာ ၂ လက် အောက်ခံ တပ်ရင်း ၁၄ နယ်မြေအတွင်း မြန်မာ့တပ်မတော်က ထိုးစစ်ဆင်မှုများကြောင့် တိုက်ပွဲ ပြင်းပြင်းထန်ထန် ဖြစ် ပွားနေသည်ဟု ဝါရာဇွပ်ကျေးရွာအုပ်စု ကျေးရွာအုပ်ချုပ်ရေးမှူး ဦးလမုန်နော်ဒီးက ပြောသည်။
“ဒီမနက် ၅ နာရီကနေ ၁၁ နာရီကျော်လောက်ထိ တိုက်ပွဲဖြစ်နေတယ်။ ခုတော့ ငြိမ်နေတယ်။ ရှထူးဇွပ်အနောက်ဘက် ချောင်းဆုံဘက်မှာ ဖြစ်နေတယ်။ လက်နက်ကြီးနဲ့ ပစ်တာတွေ ကြားနေရတယ်”ဟု ဦးလမုန်နော်ဒီးက မဇ္ဈိမကို ပြောသည်။
မြန်မာ့တပ်မတော်နှင့် KIA တပ်ရင်း ၁၄ ရှေ့တန်း တပ်ဖွဲ့တို့ ယမန်နေ့အထိ တိုက်ပွဲ ဖြစ်ပွားခဲ့ကာ ယနေ့တွင် တိုက်ပွဲ သတင်း မသိရသေးသော်လည်း တပ်မတော်ဘက်မှ ဆုတ်ခွာခြင်း မရှိသဖြင့် တိုက်ပွဲ ဆက်လက် ပြင်းထန်လာမည့် အခြေအနေတွင် ရှိနေသည်ဟု KIA ၏ ပြန်ကြာရေးတာဝန်ခံ တစ်ဦးဖြစ်သူ ဒုဗိုလ်မှူးကြီး နော်ဘူက ပြောသည်။
“ဒီနေ့ တိုက်ပွဲသတင်းက ခုထိမရသေးဘူး။ ဖြစ်တော့ ဖြစ်မှာပါ။ တပ်မတော်ဘက်ကလည်း ပြန်ဆုတ်သွားတာ မရှိသေးဘူး” ဟု မဇ္ဈိမကို ပြောသည်။