ရန်ကုန် ၊ ဧပြီ ၂၆ ။ ။ ရွှေစင်ဦး ရုပ်ရှင် ၊ ဗီဒီယို ထုတ်လုပ်ရေးမှ စီစဉ် ပြီး ဒါရိုက်တာ ညွန့်မြန်မာညီညီအောင် ရိုက်ကူး ထားသည့် အုတ်ကြားမြက်ပေါက် ရုပ်ရှင် ဇာတ်ကားကြီး ကို မေ ၆ ရက်နေ့တွင် ရန်ကုန်မြို့ရှိ ရုပ်ရှင်ရုံများတွင် စတင် ပြသ သွားမည် ဖြစ်သည်။
အုတ်ကြားမြက်ပေါက် ရုပ်ရှင် ဇာတ်ကားကို ဇာတ်လမ်း မောင်ရွှေစွန် ၊ ဇာတ်ညွှန်း ဆဲဗင်းဒေး ဖြစ်ပြီး ဒါရိုက်တာ ညွန့်မြန်မာညီညီအောင် ရိုက်ကူးကာ သရုပ်ဆောင်များ အဖြစ် နေတိုး ၊ နေမင်း ၊ ထွန်းထွန်း ၊ သက်မွန်မြင့် ၊ စိုးမြတ်သူဇာ နှင့် သရုပ်ဆောင် များစွာမှ ပါဝင် ထားကြသည်။
ဇာတ်ကားသည် မိဘတွေကြောင့် သားသမီးများ လမ်းမှား ရောက်ရပုံ ၊ လူငယ်တွေကြား ဖြစ်တတ်သည့် သဘာ၀ နှင့် မိဘ များ၏ သားသမီးပေါ် ထားသည့် မေတ္တာတရား အကြောင်းတွေကို ဒါရိုက်တာ မှ ရိုက်ကူး ပုံဖော် ပေးထားခြင်း ဖြစ်သည်။
ဒါရိုက်တာ ညွန့်မြန်မာညီညီအောင် က " မိဘ နှင့် သားသမီး ကြား နားလည်မှု လွဲခဲ့လျှင် မိဘ က သားသမီး ထိန်းချုပ်သည့် လမ်းကြောင်း လွဲသွားလျှင် သားသမီးသည် လမ်းကြောင်း လွဲသွားနိုင်ကြောင်း မိဘ မှ အချစ် လွန်ပြီး ထိန်းချုပ်မှု များသွားလျှင် လည်း လမ်းကြောင်းလွဲသွားနိုင်ပုံများကို ပုံဖော် ရိုက်ကူး ထားခြင်း ဖြစ်ပါတယ်" ဟု ပြောသည်။
ဇာတ်ကားတွင် ရွှေအုတ် အဖြစ် အကယ်ဒမီ နေတိုး ၊ ဖိုးသိကြား အဖြစ် ထွန်းထွန်း ၊ မြက်ရိုင်း အဖြစ် နေမင်း ၊ ပေါက်ပေါက် အဖြစ် သက်မွန်မြင့် ၊ မမကြီး အဖြစ် စိုးမြတ်သူဇာ ၊ မမကြီး ငယ်ဘ၀ အဖြစ် စန္ဒီမြင့်လွင် တို့မှ သရုပ်ဆောင် ထားကြသည်။
သရုပ်ဆောင် နေမင်း က " ကျွန်တော် ကိုယ်တိုင်လဲ ဒီကားမှာ တော်တော် ကြိုးစားခဲ့ရတယ်။ သူငယ်ချင်း တွေရဲ့ အကူအညီ နဲ့ ကြိုးစားပြီး ရိုက်ကူး ခဲ့တယ်။ ဒီကားကို ပရိသတ်တွေ ကြည့်စေချင်ပါတယ်။ လူကြီး နဲ့ လူငယ်တွေ ကြားမှ ရှိနေတဲ့ အလွဲအမှားလေး တစ်ခုကို အမြင်စောင်းနေတာလေးကို အမှန်တရား တစ်ခု ဖြစ်စေချင်တယ်" ဟု ပြောသည်။
