၄၃ ကြိမ်မြောက် အာဆီယံ ထိပ်သီးအစည်းအဝေးကနေ မြန်မာ့အရေးကို အလှည့်ကျဥက္ကဋ္ဌ ၃ နိုင်ငံပူးပေါင်းကိုင် တွယ်ဖြေရှင်းသွားမယ့် ဆုံးဖြတ်ချက်ချခဲ့တာ တွေ့ရပါတယ်။ မြန်မာ့အရေးကိုဖြေရှင်းရာမှာ အလှည့်ကျဥက္ကဋ္ဌ တစ်ယောက်တည်းတာဝန်ယူပြီး တစ်နှစ်အတွင်းဖြေရှင်းဖို့ဆိုတာမဖြစ်နိုင်တဲ့အတွက် အလှည့်ကျဥက္ကဋ္ဌ ၃ နိုင်ငံ ပူးပေါင်းဆောင်ရွက်ဖို့ အာဆီယံခေါင်းဆောင်တွေ သဘောတူခဲ့ကြတာဖြစ်ပါတယ်။ အင်ဒိုနီးရှား နိုင်ငံခြားရေး ဝန်ကြီး မာဆူဒီကတော့ အခုလို ပူးပေါင်းဆောင်ရွက်တာဟာ မြန်မာ့အရေးကို စဉ်ဆက်မပြတ်ထိတွေ့သွားနိုင် ဖို့အတွက်ဖြစ်တယ်လို့ဆိုထားပါတယ်။