"Football Leaks" ဝက်ဘ်ဆိုက်နောက်ကွယ်မှ ပေါ်တူဂီနိုင်ငံသား ရူလ် ပင်တိုကို ငွေညှစ်ရန် ကြိုးပမ်းမှု၊ ဒေတာတရားမဝင် ဝင်ရောက်မှုနဲ့ ကိုယ်ရေးကိုယ်တာအခွင့်အရေးများကို ချိုးဖောက်ခြင်း ဒါမဟုတ် လျှို့ဝှက်ချက်ကို ချိုးဖောက်ခြင်းတို့အတွက် တနင်္လာနေ့က လစ္စဘွန်းတရားရုံးက ဆိုင်းငံ့ထောင်ဒဏ် လေးနှစ် ချမှတ်ခဲ့ကြောင်း တရားသူကြီး မာဂရီဒါ အဲလ်ဗက်စ်က ပြောပါတယ်။
အသက် ၃၄ နှစ်အရွယ် သမိုင်းကျောင်းသားဟောင်းနဲ့ ကွန်ပျူတာကို ကိုယ်ကိုတိုင်သင်ကြားတတ်မြောက် ကျွမ်းကျင်သူဟာ ပြောင်းရွှေ့ကြေး ဒါမှဟုတ် အားကစားအဖွဲ့တွေကြား သဘောတူညီချက်တွေလိုမျိုး လျှို့ဝှက်စာရွက်စာတမ်းတွေ မျှဝေဖို့အတွက် ၂၀၁၅ ခုနှစ်မှာ ဝဘ်ဆိုက်ကို တည်ထောင်ခဲ့ပါတယ်။
ပင်တိုဟာ ၂၀၁၉ ဇန်နဝါရီလမှာ ဟန်ဂေရီမှာ ဖမ်းဆီးခံခဲ့ရပေမယ့်လည်း နောက်ပိုင်းမှာ နေအိမ်အကျယ်ချုပ်ကနေ လွတ်မြောက်လာပြီး သက်သေ အကာအကွယ်အောက်မှာ ရှိနေခဲ့ပါတယ်။ အမှုကြားနာစစ်ဆေးမှုကို ၂၀၂၀ စက်တင်ဘာလမှာ စတင်ခဲ့ပါတယ်။
"တရားရုံးက ရူလ် ပင်တိုကို လေးနှစ် ပြစ်ဒဏ် တခုတည်း ချမှတ်မယ်လို့ ဆုံးဖြတ်ခဲ့ပါတယ် ... ဒါပေမယ့် ထောင်ဒဏ်ကျခံဖို့ မလိုအပ်ပါဘူး"လို့ တရားသူကြီးက ပြောပါတယ်။ "တရားရုံးမှာ နောင်တရမှု (ပင်တို တရားရုံးမှာ ပြသခဲ့) ဟာ လေးနက်တယ်လို့ မျှော်လင့်ရပြီး အခုချိန်ကစပြီး သူ ဒီမှာ ဖော်ပြထားတဲ့အတိုင်း ပြုမူတာတွေကို ရှောင်ကြဉ်ဖို့ မျှော်လင့်ပါတယ်။"
“လွတ်လပ်စွာ သတင်းပေးခွင့်က ကိုယ်ရေးကိုယ်တာ ချိုးဖောက်မှုတွေကို တရားမျှတမှု မပြုပါဘူး” လို့ သူမက ပြောပြီး “သူဟာ ငွေရဖို့ မျှော်လင့်နေခဲ့တာဖြစ်ကြောင်း ဒါကို ရှင်းရှင်းလင်းလင်း သိထားပြီးသားဖြစ်ပါတယ်။”လို့ ဖြည့်စွတ်ပြောကြားခဲ့ပါတယ်။
တရားခွင် ဆိုင်းငံ့ထားခံထားရတဲ့ ပင်တိုဟာ ခွဲစိတ်ခန်းသုံး နှာခေါင်းစီး၊ ဂျင်းဘောင်းဘီနဲ့ နက်ပြာရောင် ရှပ်အင်္ကျီတို့ကို ဝတ်ဆင်ထားပြီး တရားရုံးမှာ ရုံးထုတ်ခဲ့ပါတယ်။
သူဟာ ဟက်ကာပြစ်မှု ၈၉ မှုနဲ့အတူ ငွေညှစ်ရန် ကြိုးပမ်းမှု၊ ပေါ်တူဂီမှာ ထောင်ဒဏ် နှစ်နှစ်မှ ၁၀ နှစ်အထိ ချမှတ်နိုင်တဲ့ ရာဇဝတ်မှုတို့နဲ့ပါ စွဲချက်တင်ခံထားရတာပါ။
သူဟာ ထိပ်တန်းဘောလုံးကြယ်ပွင့်တွေ၊ ကလပ်တွေနဲ့ အေးဂျင့်တွေပါဝင်ပတ်သက်တဲ့ လက်လှမ်းမမီတဲ့ အပေးအယူတွေကို ဖော်ထုတ်ပြတဲ့ လုပ်ရပ်တွေကို သတင်းပေးသူတဦးဖြစ်ကြောင်း သူက စောဒကတက်ပါတယ်။
၂၀၁၅ ကနေ ၂၀၁၈ အတွင်း သူဟာ အင်တာနက်ပေါ်မှာ စာရွက်စာတမ်းပေါင်း ၁၈.၆ သန်းကို မျှဝေခဲ့ပြီး အသေးစိတ်အချက်အလက်များကို ထုတ်ဝေပုံနှိပ်တဲ့ ဥရောပသတင်းစာလုပ်ငန်းစုတခုနဲ့လည်း မျှဝေခဲ့ပါတယ်။
ဖော်ထုတ်မှုတွေဟာ ဘောလုံးလောကကို တုန်လှုပ်စေခဲ့ပါတယ်။
ယင်းတို့ထဲမှာ လီယွန်နယ် မက်ဆီနဲ့ နေမာတို့ရဲ့ လစာတွေ၊ ခရစ္စတီယာနို ရော်နယ်လ်ဒိုကို မုဒိမ်းမှုနဲ့ စွပ်စွဲမှု၊ မန်ချက်စတာစီးတီးမှာ ငွေကြေးအလွဲသုံးစားလုပ်မှုနဲ့ ပဲရစ်စိန့်ဂျာမိန်းမှာ လူမျိုးရေး ခွဲခြားတာတွေ ပါဝင်ခဲ့ပါတယ်။
ပင်တိုရဲ့ ပစ်မှတ်တွေဟာ Sporting ဘောလုံးအသင်း၊ ပေါ်တူဂီဘောလုံးအဖွဲ့ချုပ်၊ ရင်းနှီးမြှုပ်နှံမှု ရန်ပုံငွေအဖွဲ့ Doyen Sports နဲ့ ဥပဒေကုမ္ပဏီ PLMJ တို့လည်း ပါဝင်ပါတယ်။
ပင်တိုနဲ့ ရှေ့နေ အာနီဘယ်လ် ပင်တိုတို့ဟာ Doyen ရဲ့ ဂုဏ်သိက္ခာကို ထိခိုက်စေမယ့် အချက်အလက်တွေကို လူသိရှင်ကြား မထုတ်ဖော်တဲ့အတွက် Doyen ထံကနေ ယူရို ၅၀၀,၀၀၀ နဲ့ တသန်းကြား ငွေညှစ်ရန် ကြိုးပမ်းမှု ပြစ်မှုကျူးလွန်ခဲ့ကြောင်း တရားသူကြီးက ပြောပါတယ်။
ပင်တိုရဲ့ ရှေ့နေ ဖရန်စစ္စကို တီဇယ်ရာဒါ မိုတာက ပင်တိုဝန်ခံပြီးနောက် ဆိုင်းငံ့ပြစ်ဒဏ်ကို ရုပ်သိမ်းဖို့ မဖြစ်နိုင်တာကြောင့် ခုခံကာကွယ်မှုကို ကျေနပ်မိကြောင်း သတင်းထောက်တွေကို ပြောခဲ့ပါတယ်။
“အစစ်အမှန် စီရင်ချက်ချရမယ့် အန္တရာယ်က အမြဲတမ်းရှိခဲ့ပါတယ်… အာဏာပိုင်တွေနဲ့ သူရဲ့ ပူးပေါင်းဆောင်ရွက်မှုကို ထည့်သွင်းစဉ်းစားခဲ့တယ်လို့ ကျနော် ထင်ပါတယ်။”လို့ ရှေ့နေက ပြောပါတယ်။ "တရားလိုတွေဟာ "အတုအယောင် ကွဲလွဲသွား"တဲ့ အခြားသော စွဲချက်တွေကို စွဲချက်တင်ချင်သေးတယ်"လို့ သူက ထည့်သွင်းပြောဆိုခဲ့ပါတယ်။
“ဒါက စိုးရိမ်စရာအပိုင်း၊ စွပ်စွဲခံရသူဟာ တူညီတဲ့အချက်အပေါ် တပြိုင်နက်တည်း တရားစွဲမှု သုံးခု ရှိနိုင်တယ်ဆိုတဲ့ စွပ်စွဲခြင်းရဲ့ လောဂျစ်ပါပဲ”လို့ ၎င်းက အသေးစိတ်ဖော်ပြခြင်းမရှိဘဲ ထပ်လောင်းပြောသွားခဲ့ပါတယ်။
