ယူကရိန်းတို့က မြေပေါ်တွင် စည်းတားထားသည်။ ထိုစည်းမှာ ဘက်ခ်မွတ်မြို့ ဖြစ်သည်။ ထိုမြို့သည် မဟာဗျူဟာအရ အရေးပါသည်ဟု တချို့က ပြောသည်။ သို့သော် ထိုမြို့အတွက် တိုက်ခိုက်ရင်း လူသောင်းချီ သေဆုံးခဲ့ရပြီဖြစ်သည်။ ဘက်ခ်မွတ်မြို့ တိုက်ပွဲက လွန်ခဲ့သည့် ခုနစ်လကျော်အကြာက စခဲ့ပြီး လက်ရှိအချိန်အထိ ယင်းသည် ရုရှား-ယူကရိန်း စစ်ပွဲ၏ အရှည်ကြာဆုံး တိုက်ပွဲ ဖြစ်သည်။

မြို့၏ တောင်ဘက်စွန်းပိုင်းနယ်မြေကို ခုခံကာကွယ်လျက် ရှိသော ယူကရိန်းစစ်တပ် တပ်ဖွဲ့နှစ်ခုက ဘီဘီစီကို ပြီးခဲ့သည့် သီတင်းပတ်က ၎င်းတို့၏ တပ်ချရာနေရာများဆီ လာရောက်လေ့လာခွင့်ပေးခဲ့သည်။ ဘက်ခ်မွတ် မြို့တွင်းနှင့် ဝန်းကျင်တွင်မူ တိုက်ပွဲများက အပြင်းအထန် ဆက်ဖြစ်နေသည်။ ဘက်ခ်မွတ်မြို့ကို ခုခံကာကွယ်နေသော ယူကရိန်းစစ်သားတို့မှာ ပုံမှန်ရုရှားစစ်တပ်၏ တပ်ဖွဲ့များကိုသာမက ၎င်းတို့၏ ကတုတ်ကျင်းများထဲသို့ ပြုံတိုးဝင်ရောက်ကြသည့် Wagner ပုဂ္ဂလိက စစ်ဘက်ကုမ္ပဏီ၏ စည်းရုံးစုဆောင်းခံ စစ်အကျဉ်းသားများကိုပါ ရင်ဆိုင်ရင်း လများချီကြာ ဖြတ်သန်းထားကြရသည်။ ရုရှားဘက်မှ ထိခိုက်သေဆုံးမှုများသည် မိမိတို့ဘက်၏ ထိခိုက်သေဆုံးမှုများထက် အလွန်ပင် ပိုများနေကြောင်း ယူကရိန်းစစ်သားများက ပြောသည်။ သို့သော် ရန်သူသည် မြို့နှင့် အနီးဝန်းကျင် ကျေးလက်ဒေသတို့ကို သိမ်းပိုက်နိုင်ရန် နည်းဗျူဟာသစ်များ အသုံးချနေသည်ဟု ဆိုသည်။

ယူကရိန်းတပ်ဖွဲ့များမှာ ရန်သူ ရုရှားတပ်ဖွဲ့များနှင့် ယှဉ်ပါက လူအင်အား၊ လက်နက်အင်အား ပို၍ နည်းပါးပါသည်။ သို့သော် မြို့တောင်ဘက်ပိုင်းရှိ ထုံးကျောက် တောင်စောင်းတစ်နေရာတွင် အမှတ် ၃ သီးခြား တိုက်ခိုက်ရေးတပ်မဟာမှ တင့်ကားဖျက်တပ်ဖွဲ့တစ်ဖွဲ့ ရှိသည်။ 3Storm အဖြစ် သိကြသည့် အဆိုပါ တပ်ဖွဲ့သည် အလျှော့မပေးဘဲ တင်းခံကာ ရှိနေသည်။ ၎င်းတို့သည် ကတုတ်ကျင်းများကို မြေကြီးထဲ ခပ်နက်နက် တူးထားကြသည်။ အမိုးကို ကျားကန်၊ ဒေါက်ထောက်ပေးထားသည့် သစ်သားများမှာ ခပ်လှမ်းလှမ်းနေရာ၌ ရုရှားလက်နက်ကြီးကျည်များ ကျလာသည့်အခါမျိုးတွင် တုန်ခါသွားလေ့ ရှိသည်။ ကတုတ်ကျင်း၏ ပျဉ်ချပ်များပေါ်တွင် လယ်ကြွက်များ လှစ်ခနဲ လှစ်ခနဲ ဖြတ်ပြေးသွားသည်ကိုလည်း တွေ့ရသည်။ ရှေ့ခေတ်ကာလကတည်းကဖြစ်သော စစ်ဖက်ဆက်သွယ်ရေးသုံး တယ်လီဖုန်းတစ်လုံးလည်း သစ်သားချောင်တစ်နေရာတွင် ရှိနေသည်။ ယင်းတို့သည် ၎င်းတို့၏ ဘိုးဘေးများ မှတ်မိနေလိမ့်မည့် အခြေအနေများဖြစ်သည်။

“သူတို့ဘက်က ကျွန်တော်တို့ကို ထိခိုက်အောင် လုပ်လို့ မရနိုင်ပါဘူး။ ကျွန်တော်တို့က ဦးတည်ရာလမ်းကြောင်းအကုန်လုံးကနေ တစ်ကီလိုမီတာလောက်အထိ မြင်နိုင်လို့ပါ” ဟု ဒွါ့ ဟု ခေါ်သည့် အသက် ၂၆ နှစ်အရွယ် မုတ်ဆိတ်ရှိ ယူကရိန်းစစ်သားတစ်ယောက်က ရုရှား တည်နေရာများကို ညွှန်ပြရင်း ပြောသည်။ “ကျွန်တော်တို့မှာ ရှိတဲ့အရာမှန်သမျှနဲ့ ရန်သူကို ထိမှန်အောင် လုပ်နိုင်တယ်” ဟု သူက ဆိုသည်။

ဘက်ခ်မွတ်မြို့ သို့မဟုတ် အခြားတစ်နေရာရာတွင် ဖြစ်ပွားသည့် တိုက်ပွဲများအတွင်း  ထိခိုက်သေကျေမှုဆိုင်ရာ တရားဝင် ကိန်းဂဏန်းများကို ယူကရိန်းစစ်တပ်ရော၊ ရုရှားစစ်တပ်ရော ထုတ်ပြန်ခြင်း မရှိပါ။ သို့သော် အများအားဖြင့် နေထိုင်သူများ စွန့်ခွာသွားပြီဖြစ်သော ဘက်ခ်မွတ်မြို့သည် ယခုအခါ သားသတ်ရုံတစ်ရုံသဖွယ် ဖြစ်လာခဲ့သည်။

ဘက်ခ်မွတ်မြို့ကို ခုခံကာကွယ်တိုက်ခိုက်ရသည့် သီတင်းတစ်ပတ်အတွင်း ဒွါ့၏ တပ်ဖွဲသည် ရုရှား၏ Wagner group ကုမ္ပဏီမှ စစ်မှုထမ်းအကျဉ်းသားများနှင့် ရင်ဆိုင်ခဲ့ရသည်။ “နှစ်နာရီခြားတစ်ခါ ကျွန်တော်တို့ တိုက်ပွဲတွေ ဖြစ်ခဲ့တယ်” ဟု သူက ပြောသည်။ “ကျွန်တော့်အထင်ပြောရရင် တပ်ဖွဲ့တစ်ခုတည်းကတောင် တစ်နေ့တစ်နေ့ကို ရန်သူအယောက် ၅၀ လောက်ကို သုတ်သင်ရှင်းလင်းနိုင်ခဲ့တယ်။” အဆိုပါ ထင်မြင်ချက်အပေါ် သံသယရှိစရာမလိုဘဲ ထိုကိန်းဂဏန်းများကို ဝေဟင်ထောက်လှမ်းမှုဖြင့် အတည်ပြုထားကြောင်း ၎င်းက ထောက်ပြသည်။ “ရုရှားကားတစ်စီး ဆိုက်လာတယ်။ အဲဒီထဲကနေ အလောင်း ၅၀ လောက်ကို အပြင်ကိုထုတ်တာတွေ့တယ်။ တစ်နေ့တာ ကုန်သွားတယ်။ နောက်ထပ် အလောင်း ၅၀ ထပ်ထွက်လာတယ်” ဟု သူက ပြောသည်။ သူ၏ တပ်ဖွဲ့အနေဖြင့် အဆိုပါ ကိန်းဂဏန်း၏ အစိတ်အပိုင်းအနည်းငယ်မျှကိုသာ ဆုံးရှုံးထားခဲ့ရကြောင်း ဒွါ့က ပြောသည်။

တရားဝင်အားဖြင့် ယူကရိန်းစစ်သား တစ်ဦး သေဆုံးတိုင်း၊ ရုရှားဘက်က ခုနစ်ဦး သေဆုံးကြောင်း ယူကရိန်းဘက်က ခန့်မှန်းသည်။ ဘက်ခ်မွတ်မြို့ တိုက်ပွဲ၏ ၂၄ နာရီအတွင်း ယူကရိန်းတပ်ဖွဲ့ဝင် ၂၂၀ ကျော်ကို သုတ်သင်နိုင်ခဲ့ကြောင်း ရုရှားတို့က ယခုသီတင်းပတ်အစောပိုင်းတွင် ပြောသည်။ ထိုကိန်းဂဏန်းများကို သီးခြားလွတ်လပ်စွာ အတည်ပြုနိုင်ခြင်း မရှိပေ။

ဖမ်းဆီးခံရသည့် Wagner စစ်မှုထမ်းနှစ်ဦးက the Wall Street ဂျာနယ်နှင့် အင်တာဗျူးတစ်ခုတွင် ပြောကြားရာတွင် ၎င်းတို့ကို ရှေ့တန်းသို့ မပို့မီ ၎င်းတို့သည် အမှောင်ထုထဲ၌ တောအုပ်များထဲ ရန်သူမမြင်အောင် ဖြတ်ကျော်သွားလာရန် သင်ကြားရခြင်းထက် ကျော်လွန်ပြီး လေ့ကျင့်သင်ကြားမှု အနည်းငယ်မျှကိုသာ ရခဲ့သည်ဟု ဖြေခဲ့ကြသည်။ ရှေ့တန်းတွင် ခြောက်လ တာဝန်ထမ်းဆောင်ပြီးနောက် အကယ်၍ ၎င်းတို့ အသက်ရှင်ကျန်ရစ်ပါက လွတ်မြောက်ပြီ ဖြစ်သည်။

မိုင် ၆၀၀ ရှည်သော အရှေ့ဘက် ရှေ့တန်းနေရာတစ်လျှောက်ရှိ အခြေအနေများက စတင် ပြောင်းလဲလာခဲ့သည်။ 3Storm တပ်ဖွဲ့၏ ထုံးကျောက်များသော တောင်ထိပ်ရှိ တည်နေရာက အနီးဝန်းကျင် နယ်မြေများနှင့် ယှဉ်ပါက ခြောက်သွေ့မြေတစ်ခုသကဲ့သို့ ထင်ရသည်။ နွေဦးကာလ ခပ်စောစော ကျရောက်ခြင်းကြောင့် ဆောင်းကာလ၏ မာကျောသော မြေပြင်ကို ရွှံ့နှစ်ခဲ အနေအထားအဖြစ် ပြောင်းလဲစေသည်ဖြစ်ရာ ယင်းက ခုခံကာကွယ်သူများကို မျက်နှာသာပေးကောင်းပေးနိုင်သည်။ ထိုနေရာသို့ ရောက်ရန် ကျွန်တော်တို့သည် ယူကရိန်းစစ်သားများနှင့်အတူ ခြေကျင်လျှောက်ပြီး လိုက်ခဲ့ကြရသည်။ ခြေလှမ်းအနည်းငယ်သာ လှမ်းရသေးချိန်တွင် ကျွန်တော့် ဘွတ်ဖိနပ်များက  ထူထဲသော ဖုန်မှုန့်ဖုန်ခဲများကြောင့် လေးလံလာသည်။ စစ်မြေပြင် သူနာတင်ယာဉ်တစ်စီးက ပုံမှန်မဟုတ်သည့် အရှိန်နှုန်းဖြင့် သွားနေသည်ကို တွေ့ရပြီး ချိန်းကြိုးဘီးများက မြေကြီးကို ထယ်ထိုးသကဲ့သို့ ဖြစ်နေပြီး လမ်းပေါ်တွင် မြဲမြဲရှိစေရန် ကြိုးပမ်းရစဉ် ရွှံနှစ်အနည်အိုင်များကို ဖွာခနဲ လွင့်စဉ်စေသည်။

ဤနေရာ၏ ဝန်းကျင်ရှိ ရွာများ (တည်နေရာကို ထုတ်ဖော်နိုင်ခြင်း မရှိ) သည် ထိခိုက်ပြိုပျက်လျက် ရှိနေသည်။ ဂိတ်နေရာများတွင် အများအားဖြင့် ရုရှားဘာသာဖြင့် ရေးထားသည့် လက်ရေးဆိုင်းပုဒ်များက “ဤနေရာတွင် လူတွေ နေထိုင်သည်” ဟု ထုတ်ဖော်ထားကာ ယင်းသည် မေတ္တာရပ်ခံချက်တစ်ခု၊ ကြေညာချက်တစ်ခု ဖြစ်သည်။ ထိခိုက်ပျက်စီးထားသော စိုက်ပျိုးခြံများ၊ လူနေအိမ်များ၏ အပျက်အစီး အကြိုအကြားများတွင် လှည့်လည်သွားနေသည့် စွန့်ပစ်ခံ ခွေးများမှအပ လမ်းများပေါ်တွင် လုံးလုံးလျားလျား လူသူကင်းမဲ့နေသည်။

ပြီးခဲ့သည့် နှစ်လအတောအတွင်းက ရုရှားတပ်ဖွဲ့များသည် ဘက်ခ်မွတ်မြို့ကို ဝိုင်းရန် ကြိုးစားရင်း ခပ်မှန်မှန် ရှေ့ကို တိုးခဲ့ကြသည်။ မိမိတို့ တပ်ဖွဲ့များအနေဖြင့် ဆက်လက် ခုခံသွားမည် ဖြစ်ကြောင်း ယူကရိန်း ကြည်းတပ် တပ်မှူး ဗိုလ်ချုပ်ကြီး အိုလက်ခ်ဆန်ဒါ ဆိုင်စကီးက ပြောသည်။ “နေ့စဉ်နေ့တိုင်း မမှိတ်မသုန် ခုခံမှုက ရန်သူရဲ့ ထိုးစစ် လုပ်နိုင်စွမ်းတွေကို လျော့ကျစေဖို့အတွက် ကျွန်တော်တို့ကို တန်ဖိုးရှိတဲ့ အချိန်တွေ ရစေပါတယ်” ဟု ၎င်းက ပြောသည်။ ဧရိယာသို့ နောက်ထပ် စစ်ကူအင်အားဖြည့်တည်းမှုများ ပို့လွှတ်နေသည်ဟုလည်း ပြောသည်။ သို့သော် ဘက်ခ်မွတ် ထောင်ချောက်အတွင်း ရုရှားများသာ သက်ဆင်းထားခဲ့ရသည်တော့ မဟုတ်ပေ။ ထိုနေရာတွင် ယူကရိန်းများလည်း သေဆုံးနေကြရသည်။ ကိန်းဂဏန်းများမှာ အရင်ထက် တိုးနေသည်။

တောင်စောင်းတစ်နေရာတွင် ယူကရိန်းစစ်သားတစ်စုက လက်နက်တည်နေရာတစ်ခု၌ စုဝေးရှိနေကြသည်။ “ကျင့်သားမရသေးသည့် တိုက်ပွဲဝင် ရုရှားအကျဉ်းသားများကြောင့် ယူကရိန်းစစ်သားများ အသက်ဆုံးရှုံးနေရသည် ဖြစ်ရာ ယခုကဲ့သို့ ရန်သူဝိုင်းထားသည့် မြို့သေတစ်မြို့ကို ခုခံကာကွယ်နေခြင်းက အဓိပ္ပါယ်ရှိပါရဲ့လား” ဟု ဒွါ့ကို ကျွန်တော် မေးကြည့်မိသည်။

သူက “ဘက်ခ်မွတ်ကို ကျွန်တော်တို့ ဆက်ပြီး ခုခံကာကွယ်သင့်သလား ဆိုပြီး ကျွန်တော်ကိုယ်တိုင်လည်း တွေးမိခဲ့ပါတယ်။ တစ်ဖက်မှာကြည့်ရင်တော့ ခု ဒီမှာ ဖြစ်ပျက်နေတာတွေက အလွန်ဆိုးဝါးနေတာပေါ့။ ဒါကို ဖော်ပြဖို့ စကားလုံးတောင် မရှိပါဘူး။ ဒါပေမယ့် အခြားနည်းလမ်းကတော့ ကျွန်တော်တို့ ဘက်ခ်မွတ်ကို စွန့်လွှတ်ပြီး အခြားနေရာကို ပြောင်းရွှေ့တာမျိုးပေါ့။ တကယ်တော့ ဘက်ခ်မွတ် ဒါမှမဟုတ် အခြားရွာတစ်ခုခုကို ခုခံကာကွယ်ရတာတွေအကြားမှာ ဘာများခြားနားတာ ရှိဦးမလဲဗျာ” ဟု ပြောသည်။

သူ၏ ရဲဘော်ရဲဘက် ဖြစ်သည့် ဟိုးလ်မ် အမည်ရ ကိုယ်လုံးကိုယ်ပေါက် တောင့်တင်းသည့် မုတ်ဆိတ်ပါ ယူကရိန်းစစ်သားတစ်ဦးကလည်း ဒွါ့၏ ပြောဆိုမှုကို ထောက်ခံသည်။ “အဲဒါက ဒီနေရာမှာ ကျွန်တော်တို့အတွက် မဟာဗျူဟာ မေးခွန်း မဟုတ်ပါဘူး။ ကျွန်တော်တို့က သာမန် စစ်သားတွေလေ။ ဒါပေမယ့် ဒါက ကျွန်တော်တို့ မြေပါ။ ကျွန်တော်တို့ ချာဆစ်ဗ် ယားကို ဆုတ်ရကောင်းဆုတ်ရနိုင်တယ်။ ချာဆစ်ဗ် ယားကနေ စလိုဗ်ယန့်စ်၊ ပြီးတော့ ကိယက်ဗ်အထိ ဆုတ်ရကောင်းဆုတ်ရနိုင်တယ်။ အချိန် တစ်နှစ်၊ နှစ်နှစ်၊ လေး၊ ငါးနှစ် ကြာပါစေ။ ဒါပေမယ့် ကျွန်တော်တို့ကတော့ ကျွန်တော်တို့မြေရဲ့ နေရာတိုင်းအတွက် တိုက်ခိုက်ရပါလိမ့်မယ်”

အဆိုပါ ယူကရိန်းစစ်သားများသည် လက်ရှိတွင် စစ်တိုက်နေသည်မှာ တစ်နှစ်ကျော်ကြာ ရှိနေပြီဖြစ်သည်။ ၎င်းတို့၏ အဆိုအရ ရုရှားများသည် နည်းဗျူဟာများ ပြောင်းလဲဆန်းသစ်ဖော်ဆောင်နေသည်ဟု ဆိုသည်။

“သူတို့ (ရုရှား) တွေက လေ့လာသင်ယူကြတယ်။ သူတို့ ပိုပြီး ကျွမ်းကျင်လာကြတယ်။ ဒါက အမှန်တကယ်တော့ ကျွန်တော်တို့ကို ထိတ်လန့်စေပါတယ်” ဟု ဒွါ့က ပြောသည်။ “သူတို့က အကျဉ်းထောင်ကနေ ခေါ်လာတဲ့ ငတုံး၊ငအ ငါးယောက် အဖွဲ့တစ်ခုကို လွှတ်လိုက်တယ်။ အဲဒီလူတွေ အပစ်ခံရတယ်။ ဒါပေမယ့် လှမ်းပစ်တဲ့ ခင်ဗျား ဘယ်နေရာမှာလဲ ဆိုတာကို ရန်သူက မြင်သွားမယ်။ ပြီးတော့ ရန်သူက အဲဒီကို လျှောက်လာမယ်။ ခင်ဗျားလည်း အနောက်ကနေ အဝိုင်းခံရမယ်”

ရုရှားတို့သည် ယခုအခါ ဗုံးတပ် ဒရုန်းများကို ယခင်ထက် ပိုပြီး ကျွမ်းကျွမ်းကျင်ကျင် သုံးလာနေပြီဟု ဟိုးလ်မ်က ကြားဖြတ်ပြောသည်။ “ကျွန်တော်တို့လည်း အရင်က အဲဒီလိုပဲ ဗုံးချခဲ့ဖူးပါတယ်။ သူတို့ကို မျက်ကလူးဆန်ပြာဖြစ်စေခဲ့တာပေါ့” ဟု သူက ပြောသည်။ “ခုချိန်မှာ သူတို့တွေက ကျွန်တော်တို့ တည်နေရာတွေကို ဒရုန်းနဲ့ ဗုံးတွေ ချနေပါပြီ”

စစ်မဖြစ်ခင်က ဒွါ့သည် အပြင်ထွက် အလုပ်လုပ်ရသည့် လူငယ်အလုပ်သမားတစ်ဦး အဖြစ် လုပ်ကိုင်ခဲ့ပြီး နိုင်ငံ၏ အနောက်ဘက်စွန်းရှိ Carpathian Mountains တောင်တွင် အပျော်ခြေလျင်ခရီးထွက်သည့် လူငယ်များကို လမ်းပြခေါ်ပေးသည့် အလုပ်ကို လုပ်ခဲ့သည်။ ယခု ယူကရိန်း အရှေ့ဘက်ခြမ်းတွင် ရှိနေသည့် ဒွါ့အတွက် ယင်းက အလွန်ကွာလှမ်းသည့် အမှတ်တရတစ်ခုသာ ဖြစ်နေခဲ့သည်။ ၎င်းသည် စစ်ပွဲစတင်ချိန်ကတည်းက တိုက်ပွဲအများအပြား တိုက်ထားခဲ့ရသည်။ သို့သော် လက်ရှိတွင် ၎င်းသည် ဘက်ခ်မွတ်မြို့၌ မနှစ်မြို့ဖွယ် အခြေအနေတို့နှင့်အတူ ရှိနေရသည်။

Wagner ၏ အကျဉ်းသားတပ်ဖွဲ့အကြောင်း ကျွန်တော် မေးကြည့်ရာတွင် သူက ခေတ္တမျှ စဉ်းစားပြီးမှ ပြောသည်။ “အရိုးသားဆုံး ပြောရရင် အဲဒီအဖွဲ့က ထက်မြက်တယ်။ ရက်စက်တယ်။ ယုတ်မာတယ်။ ဒါပေမယ့် ထိရောက်တဲ့ နည်းဗျူဟာတွေ ရှိတယ်။ တွက်ချက်နိုင်တယ်။ ပြီးတော့ သူတို့က ဘက်ခ်မွတ်မှာ အလုပ်ဖြစ်နေဆဲပဲ”

နောက်ရက်များအတွင်း ကျွန်တော် ထိုနေရာသို့ တစ်ဖန် ပြန်ရောက်ခဲ့ပြန်သည်။ ဤတစ်ခါတွင်တော့ ဆိုဗီယက်ခေတ် UAZ ဂျစ်ကားတစ်စီးထဲ အခြားလူလေးဦးနှင့်အတူ ပြွတ်သိပ်လိုက်ပါလာခဲ့ခြင်း ဖြစ်သည်။ ကားစတီယာရင်ခွေတွင် BMW လိုဂိုတစ်ခု ရှိနေသည်။ ယင်းနှင့်ပတ်သက်ပြီး ကားကို မောင်းနှင်သည့် အိုလက်ခ်က ဟာသလုပ် ပြောဆိုသည်။ ယင်းနောက် ကားက တောင်ကုန်းများနှင့် ရွှံ့တောနေရာများကို ခက်ခက်ခဲခဲ ဖြတ်ကျော်သွားလာရစဉ် အိုလက်ခ်တစ်ယောက် အာရုံစိုက်ပြီး စတီယာရင်ကို ထိန်းနေရသဖြင့် စကားပင် သိပ်မပြောနိုင်တော့ပေ။ ရှေ့တွင် အော်တိုမက်တစ် သေနတ်ပစ်သံများကြားရသဖြင့် ကျွန်တော်တို့သည် ရုရှားများနှင့် တိုက်ရိုက် ရင်ဆိုင်တိုက်နေသည့် အမှတ် ၂၈ တပ်မဟာအနီး ရောက်နေပြီဆိုသည်ကို အချက်ပြနေသည်။

စစ်ပွဲ၏ မြင်ကွင်းက တခဏအတွင်း ပြောင်းလဲနေသည်။ ယူကရိန်းစစ်သားများမှာ တောအုပ်ငယ်တစ်ခုအတွင်း ခိုအောင်းနေရာယူကြသည်။ တောအုပ်၏ သစ်ပင်များမှာ ရုရှား၏ ပစ်ခတ်မှုကြောင့် အစိတ်စိတ်အမြွာမြွာ ကွဲနေမှုများ ရှိနေသည်။ တောအုပ်က ၎င်းတို့ကို တစ်လကြာ အကာအကွယ်ပေးလိမ့်မည် ဖြစ်သည်။ လက်ရှိတွင် ယင်း၏ အကိုင်းအခက်များ ပြောင်ရှင်းနေမှုကြောင့် ၎င်းတို့ကို ထောက်လှမ်းရေး ဒရုန်းများဖြင့် မြင်သာစေသည်။ အနီးအနားတွင် အပြန်အလှန် ပစ်ခတ်မှု ရှိနေသည်။ ရုရှား လက်နက်ကြီးကျည်ဆန်များက မီတာ ၅၀၀ အဝေးနေရာသို့ ကျရောက်သည်။ သို့သော် ယခင်က ဗိသုကာတစ်ဦးဖြစ်ခဲ့ပြီး လက်ရှိတွင် ဗိုလ်တစ်ဦးအဖြစ် တာဝန်ထမ်းဆောင်နေသည့် အသက် ၄၈ နှစ်အရွယ် ဘော်ရီးစ်က ယင်းအပေါ် တစုံတရာ စိတ်ပူပန်ပုံ မပေါ်ပေ။

“ဒီနေ့ စစ်ပွဲက ဒရုန်းစစ်ပွဲပေါ့” ဟု သူက ပြောသည်။ “ဒါပေမယ့် ကျွန်တော်တို့ လွတ်လွတ်လပ်လပ် လမ်းလျှောက်သွားလို့ ရနိုင်ပါတယ်။ ဘာလို့လဲဆိုတော့ ဒီနေ့မှာက လေထန်ပြီး မိုးလည်း ရွာတယ်လေ။ ဒရုန်းတွေဆို လေနဲ့ လွင့်သွားတာပေါ့။ တကယ်လို့သာ ဒီနေ့မှာသာ ရာသီဥတု ငြိမ်မယ်ဆိုရင် ကျွန်တော်တို့ ဒရုန်းတွေရော၊ ရန်သူ့ဒရုန်းတွေရောဟာ ကျွန်တော်တို့အပေါ်မှာ ဝဲနေပါလိမ့်မယ်”

အပြန်လမ်း တစ်နေရာအရောက်တွင် အိုလက်ခ်သည် ကားကို ရုတ်တရက် ရပ်လိုက်သည်။ ကျွန်တော်တို့၏ အရှေ့ ဖုန်တောထဲတွင် ကျနေသည့် ဒရုန်းတစ်စင်းကို တွေ့လိုက်ရ၍ ဖြစ်သည်။ ယင်းက လေလမ်းကြောင်းအတိုင်း ကျလာခြင်း ဖြစ်သည်။ ယင်းဒရုန်း၏ ဘထ္ထရီကို ခပ်မြန်မြန် ဖြုတ်ပြီး ကားထဲကို ယူလာခဲ့သည်။ ယင်းက ယူကရိန်းဒရုန်းဖြစ်နေသည်ကို တွေ့ရသည်။

သို့သော် ယနေ့ကာလ စစ်ပွဲသည် ယခင်အတိတ်က စစ်ပွဲတို့နှင့် များစွာ ခြားနားခြင်း မရှိပေ။

ပြီးခဲ့သည့် နှစ်ညအကြာက အမှတ် ၂၈ တပ်ဖွဲ့သည် ရုရှားခြေလျင်တပ်ဖွဲ့နှင့် တင့်ကားများ၏ တိုက်ခိုက်ခြင်းကို ခံခဲ့ရသည်။ မြေအောက်၌ သစ်လုံးတို့ဖြင့် ဆောက်လုပ်ထားသည့် လက်နက် အထိုင်ချနေရာတစ်ခုတွင် အေးမြသော မိုးရေတို့က အမိုးမှတစ်ဆင့် ဖုန်တင်နေသော ကြမ်းပေါ်သို့ တစ်စက်စက် ကျနေသည်။ ယင်းတွင် ခိုင်ခံ့သော သံမဏိဘီးလုံးတပ် မက်ဇင် စက်သေနတ်တစ်လက်က မြေအောက်အထိုင်ချနေရာ၏ အပေါက်မှတစ်ဆင့် အပြင်ဘက် ဗလာဟင်းလင်း မြင်ကွင်းကို ဦးလှည့်ရင်း ရှိနေသည်။

“ကြီးမားတဲ့ တိုက်ခိုက်မှုတစ်ခု ဖြစ်တဲ့အချိန်ကျမှပဲ ဒါကို အသုံးပြုတယ်။ ဒါက တကယ့်ကို အသုံးတည့်ပါတယ်” ဟု ဘိုရီးစ်က ပြောသည်။ “ဒါကြောင့် ဒါကို ကျွန်တော်တို့ အပတ်တိုင်း သုံးတယ်”

အထက်ပါတို့ကတော့ ဘက်ခ်မွတ်မြို့အတွက် မည်သို့မည်ပုံ တိုက်ပွဲဝင်နေကြသလဲ ဆိုသည်ပင် ဖြစ်သည်။ လက်ရှိအချိန်တွင် ၂၁ ရာစု ဥရောပ၌ ဆောင်းကာလမှ နွေဦးသို့ ကူးပြောင်းရောက်ရှိလာပြီ ဖြစ်သည်။ စစ်ဖြစ်နေသော ယူကရိန်းမြေတွင် ၁၉ ရာစု လက်နက်တစ်လက်က ယနေ့အချိန်အထိ လူအမြောက်အမြားကို သေစေလျက် ရှိနေဆဲဖြစ်သည်။