October 12
မဇ္စျိမ။ ။နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် သမ္မတဦးဝင်းမြင့်တို့ကို စွပ်စွဲထားသည့် ရဟတ်ယာဥ်အဂတိအမှု ငါးမှုကို လာမည့် အောက်တိုဘာလ ၁၇ ရက်နေ့ ရုံးချိန်းတွင် ကြားဖြတ်စွဲချက် လျှောက်လဲချက် ကြားနာမည်ဖြစ်ကြောင်း တရားရုံးနှင့်နီးစပ်သည့် အသိုင်းအဝိုင်းမှ သိရသည်။
"သက်သေတွေကျန်သေးတယ် အမှုတွေမှာ သက်သေတွေ လေး၊ ငါး၊ ခြောက်ယောက်လောက် ကျန်သေးတယ်။ ကျန်တော့ တရားရုံးကဘာပြောလဲဆိုတော့ အဲ့ဒီသက်သေတွေကို ဥပဒေအရာရှိဘက်က ပယ်မယ်လို့လည်း မပြောသေးဘူး။ တရားရုံးကလည်း မပြောသေးဘူး။ ဒါပေမဲ့ လာမယ့် ၁၇ရက်နေ့ တနင်္လာနေ့ကိုတော့ ဒီငါးမှုစလုံးကို စွဲချက်တင်သင့်၊ မသင့် လျှောက်လဲချက် ကြားဖြတ်ဆောင်ရွက်မယ်"ဟု တရားရုံးနှင့် နီးစပ်သူတစ်ဦးက ပြောသည်။
ထို့ကြောင့် အောက်တိုဘာ ၁၇ရက်နေ့ ရုံးချိန်းတွင် အမှုများကို စွဲချက်တင်သင့်၊ မသင့်အပေါ် နှစ်ဖက်ရှေ့နေများက ကြားဖြတ်လျှောက်လဲချက် ပေးကြမည်ဖြစ်ကြောင်း သိရသည်။
အဆိုပါ အမှုများမှာ သဘာဝဘေးအန္တရာယ် ကာကွယ်ရေးလုပ်ငန်းများ ဆောင်ရွက်ရန် အမျိုးသားသဘာဝ ဘေးအန္တရာယ်ဆိုင်ရာ စီမံခန့်ခွဲမှုရန်ပုံငွေမှ ရဟတ်ယာဉ်ငှားရမ်းခြင်း၊ နိုင်ငံတော်ပိုင် ရဟတ်ယာဉ်တစ်စီး ဝယ်ယူခြင်းတို့နှင့် ပတ်သက်ပြီး နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ သမ္မတဦးဝင်းမြင့်နှင့် လူမှုဝန်ထမ်း၊ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာဝင်းမြတ်အေးတို့ကို အဂတိအမှုငါးမှုဖြင့် စွပ်စွဲတရားစွဲဆိုထားခြင်း ဖြစ်သည်။
တရားလိုမှာ အဂတိလိုက်စားမှုတိုက်ဖျက်ရေးကော်မရှင်ညွှန်မှူး ဦးအောင်ခန့်ဖြစ်ပြီး အမှုငါးမှုတွင် သုံးမှုမှာ ရဟတ်ယာဉ်ငှားရမ်းမှုနှင့် ပတ်သက်ပြီး နှစ်မှုမှာ ရဟတ်ယာဉ်တစ်စီးဝယ်ယူမှုနှင့် ပတ်သက်၍ စွဲဆိုထားခြင်းဖြစ်ကြောင်း သိရသည်။
ယမန်နေ့ အောက်တိုဘာလ ၁၁ ရက်နေ့ ရုံးချိန်းတွင်ရဟတ်ယာဥ် အဂတိအမှု ငါးမှုအတွက် ပြည်ထောင်စုစာရင်းစစ်ချုပ်ရုံးမှ ညွှန်ကြားရေးမှူး ဒေါ်သန္တာဖြူအေးကို စာရင်းစစ်အစီရင်ခံစာနှင့် ပတ်သက်ပြီး စစ်ဆေးခဲ့ကြောင်းလည်း သိရသည်။
နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အနေဖြင့် လက်ရှိတွင် အမှုပေါင်း ၁၂ မှုအတွက် ထောင်ဒဏ် ၂၃ နှစ် ချမှတ်ခံထားရကာ ဦးမောင်ဝိတ်ထံမှ လာဘ်ယူသည်ဟု စွပ်စွဲခံထားရသည့်အမှုနှစ်မှုကိုလည်း ယနေ့အောက်တိုဘာ ၁၂ရက်နေ့ ရုံးချိန်းတွင် အမိန့်ချမှတ်မည်ဟု သိရသည်။
သမ္မတ ဦးဝင်းမြင့်အနေဖြင့်လည်း အမှုသုံးမှုအတွက် ထောင်ဒဏ်ငါးနှစ် သတ်မှတ် ချမှတ်ခံထားရသည်။
စာတည်း။ ။ဖူးသိမ်ကျ
စာမူတည်းဖြတ်။ ။ သန့်ဇော်(သန်လျင်)