အောက်တိုဘာ ၇
မဇ္စျိမ။ ။နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ ရွှေနှင့်ဒေါ်လာ ရာဇဝတ်အယူခံအမှုနှင့် ပတ်သက်ပြီး ယနေ့ အောက်တိုဘာ ၆ရက်တွင် ပြည်ထောင်စု တရားလွှတ်တော်ချုပ်၌ နှစ်ဖက်ရှေ့နေများ၏ လျှောက်လဲချက်ကို ကြားနာခဲ့ကြောင်း တရားရုံးနှင့်နီးစပ်သည့် အသိုင်းအဝိုင်းထံမှ သိရသည်။
အမှုကို ပြည်ထောင်စုတရားလွှတ်တော်ချုပ် တရားသူကြီး ဦးမျိုးတင့်က ရုံးထိုင်ကြားနာခဲ့ပြီး စီရင်ချက်ချမှတ်ရန် သီးသန့်ထားကြောင်း တရားလွှတ်တော်ချုပ်၏ Websiteတွင် ဖော်ပြထားသည်။
အမှုနှင့် ပတ်သတ်ပြီး စီရက်ချက်ချမှတ်မည့် ရက်အတိအကျကိုမူ မသိရသေးကြောင်း တရားရုံးနှင့် နီးစပ်သူများက ပြောသည်။
အဆိုပါ အမှုမှာ NLDအစိုးရလက်ထက် ရန်ကုန်တိုင်းဝန်ကြီးချုပ် ဦးဖြိုးမင်းသိန်းက ဒေါ်အောင်ဆန်းစုကြည်ကို အမေရိကန်ဒေါ်လာ ခြောက်သိန်းနှင့် အကယ်ဒမီအခေါက်ရွှေ ခုနစ်ပိဿာ ပေးခဲ့ကြောင်း စွပ်စွဲထားသည့် အမှုဖြစ်သည်။
ရွှေနှင့်ဒေါ်လာများ ဒေါ်အောင်ဆန်းစုကြည်ထံ ပေးခဲ့ကြောင်း ဦးဖြိုးမင်းသိန်းက ၂၀၂၁ခုနှစ် အောက်တိုဘာ ၁ ရက်နေ့ ရုံးချိန်းတွင် လိုပြသက်သေအဖြစ် ထွက်ဆိုခဲ့ပြီး ၎င်း၏ထွက်ဆိုချက်အပေါ် "အဓိပ္ပါယ်မဲ့ကြောင်း”ဒေါ်အောင်ဆန်းစုကြည်က "All Absurd"ဟု မှတ်ချက်ပေးခဲ့သည်။
တရားလို၊ တရားလိုပြသက်သေများနှင့် စွပ်စွဲခံရသူကို စစ်ဆေးပြီးနောက် ပြီးခဲ့သည့် ဧပြီလ ၂၇ ရက်နေ့တွင် ဒေါ်အောင်ဆန်းစုကြည်ကို အထူးတရားရုံးက ထောင်ဒဏ် ငါးနှစ်ချမှတ်ခဲ့ရာ ၎င်း၏ ရှေ့နေအဖွဲ့က ပြည်ထောင်စုတရားလွှတ်တော်ချုပ်အထိ အယူခံ အဆင့်ဆင့်တက်ခဲ့ခြင်းဖြစ်ကြောင်း သိရသည်။
ထို့အပြင် ယနေ့ ပြည်ထောင်စုတရားလွှတ်တော်ချုပ်၌ NLDအစိုးရလက်ထက် နေပြည်တော် မြို့တော်ဝန် ဒေါက်တာမျိုးအောင်အပေါ် အမိန့်ချထားသည့် အဂတိတစ်မှု အယူခံနှင့် ရန်ကုန်တိုင်းဒေသကြီး အစိုးရအဖွဲ့၊ လူမှုရေးဝန်ကြီး ဦးနိုင်ငံလင်းအပေါ် အမိန့်ချထားသည့် အဂတိအမှု ငါးမှု အယူခံကိုလည်း ကြားနာခဲ့ကြောင်း သိရသည်။
စာတည်း။ ။ဖူးသိမ်ကျ
စာမူတည်းဖြတ်။ ။သန့်ဇော်(သန်လျင်)