September 9
မဇ္ဈိမ။ ။ မန္တလေးတိုင်း၊ ချမ်းမြသာစည်မြို့နယ် အကွက် (၄၄၆)၊ သန်လျက်မော်တောင်ရပ်ကွက်၊ မန်းကျည်းတန်းလမ်း၊ ကန်တော်ကြီး မိသားစုရောင်းဝယ်ရေးဆိုင်အနီးတွင် စက်တင်ဘာ ၈ရက်၊ ည ၇နာရီ ၂၀မိနစ်ခန့်က စစ်ကောင်စီလက်အောက်ခံ နယ်ထိန်းရဲတပ်ကြပ် အောင်ညွန့် သေနတ်ဖြင့် ပစ်သတ်ခံခဲ့ရကြောင်း သိရသည်။
တာဝန်ထမ်းဆောင်နေချိန် ကန်တော်ကြီးမိသားစုရောင်းဝယ်ရေး ဆိုင်အနီး ဆိုင်ကယ်ရပ်နေစဥ် ဆိုင်ကယ်တစ်စီး လူသုံးဦးမှ သေနတ်ဖြင့် ပစ်သတ်ခြင်းဖြစ်ပြီး ၎င်းတပ်ကြပ်ကိုင်ဆောင်သည့် ခြောက်လုံးပြူးသေနတ်၊စကားပြောစက်နှင့် SCOPPY(စကိုဖီး)ဆိုင်ကယ်တို့ကိုပါ ပစ်ခတ်သူများက ယူဆောင်သွားခဲ့ကြောင်း သိရသည်။
"နယ်ထိန်းက အဖွဲ့နဲ့လာတယ် ၊ သူက ရပ်နေခဲ့တော့ သူ့အဖွဲ့က မစောင့်ဘူး ဆက်သွားတယ်၊ မကြာဘူး ဆိုင်ကယ်တစ်စီး လူသုံးယောက်က ဆင်းပစ်ပစ်တာပဲ၊ ရဲပစ္စည်းအကုန်ပါသွားတယ်။"ဟု ဒေသခံတစ်ဦးမှ မဇ္ဈိမကို ပြောသည်။
သေဆုံးသူ ရဲတပ်ကြပ်နှင့် နီးစပ်သူတစ်ဦးကလည်း"ကျွန်တော်က သူ့ကို ရခိုင်လေးလို့ခေါ်တယ်၊ စျေးဝယ်ဖို့ ကျန်ခဲ့တာလို့ ပြောတယ်၊ နောက်စေ့နဲ့ဗိုက် မှန်တယ်၊ နေရာမှာပဲ သေတယ်၊ အသေးစိတ်တော့ မပြောတော့ဘူး၊လုံခြုံရေးက ရှိသေးတယ်။"ဟု ပြောသည်။
ထိုသို့ ပစ်သတ်ခံရပြီး မန္တလေးမြို့ နေရာအတော်များများတွင် စစ်ဆေးမှုများပြုလုပ်နေကာ ပစ်ခတ်မှုဖြစ်ပွားခဲ့သည့် နေရာတွင်လည်း အရပ်ဝတ်ဖြင့် ရဲတပ်ဖွဲ့ဝင်များက စောင့်ကြည့်မှုများ ပြုလုပ်နေကြောင်း သိရသည်။
စာတည်း - သန့်ဇော်(သန်လျင်)
