September 7
ရန်ကုန်(မဇ္ဈိမ )။ ။ နိုင်ငံတော်ဗဟိုဘဏ်က နိုင်ငံခြားငွေလဲနှုန်း တစ်ဒေါ်လာလျှင် ၂,၁၀၀ကျပ် ဈေးသတ်မှတ်ပြီးနောက်ပိုင်း ပြည်တွင်းပုဂ္ဂလိက ဘဏ်အချို့တွင် နိုင်ငံခြားငွေ ထည့်သွင်းအသုံးပြုရသည့် Visa ကတ်၊ Master ကတ် လျောက်ထားမှုများ ယာယီပိတ်ထားကြောင်း သိရသည်။
စစ်ကောင်စီက နိုင်ငံခြားငွေတစ်ဒေါ်လာလျှင် ၂,၁၀၀ကျပ် ဈေးသတ်မှတ်ထားသော်လည်း ပြင်ပတွင်ပေါက်ဈေး ၄,၀၀၀ကျပ် ဝန်းကျင်ဖြင့်သာအရောင်းအဝယ် ဖြစ်နေကြောင်းလည်း သိရသည်။
''ကျွန်တော်တို့က စာမေးပွဲကြေးသွင်းဖို့အတွက် နိုင်ငံခြားဘဏ်(FE)ဘဏ်ကို သွားပြီးတော့ ဝယ်တယ်။ အဲဒီမှာ ကောင်တာကဘာပြောလဲဆိုရင် ရောင်းဖို့မရှိဘူးတဲ့ ။ကျွန်တော်တို့ကို ညွှန်ကြားထားတာက ဒေါ်လာလာရောင်းရင်လည်း ဒီ ၂၁၀၀ ဈေးနဲ့ဝယ်ပြီး ဝယ်ထားတာပဲ ရောင်းပေးရမယ်လို့ပြောတယ်။ ဒီတော့ ဒီကာလကြီး အပြင်မှာ ၄,၀၀၀နီးပါး ပေါက်ဈေးဖြစ်နေတာကို ဘယ်သူက ၂,၁၀၀နဲ့လာရောင်းမလဲ။ ရောင်းတဲ့သူမရှိရင် ဘဏ်ကလည်း ပြန်မရောင်းနိုင်ဘူးတဲ့''ဟု အစိုးရဘဏ်(FE) ဘဏ်တွင် ငွေသွားဝယ်သည့်သူတစ်ဦးက ပြောသည်။
သည့်အပြင် စစ်ကောင်စီမှလည်း နိုင်ငံခြားငွေများ တရားမဝင် ရောင်းဝယ်နေသည့်သူများကို နိုင်ငံခြားသုံးငွေ စီမံခန့်ခွဲမှုဥပဒေနှင့် စည်းမျဉ်းများအရ ထိရောက်စွာ အရေးယူမည်ဟု သြဂုတ်လ ၂၇ ရက်နေ့က မြန်မာနိုင်ငံတော်ဗဟိုဘဏ်က ထုတ်ပြန်ထားသည်။
''အခုကကျွန်မတို့တွေက Online Shop ရောင်းတဲ့အခါကျတော့ ကိုယ့်ပစ္စည်းကိုလူတိုင်းသိအောင်ကြော်ငြာရတယ် ။ဖေ့ဘုတ်မှာ Boots လုပ်ရတယ်။ အဲဒီအခါကျရင် Visa ကတ်တွေ လိုတာပေါ့။သုံးနေကျကတ်ထဲကို ငွေသွားထည့်တော့ CB Bank က ကတ်တွေအားလုံး ယာယီပိတ်ထားတယ်တဲ့။ ပြီးတော့ ငွေထည့်ရင်လည်း အရင်ကဆို ဘဏ်က လက်ရှိပေါက်ဈေးနဲ့ဖြတ်ပြီး ဒေါ်လာအစား မြန်မာငွေပေးလို့ရတယ်။အခုကျတော့ မြန်မာငွေနဲ့Visa ကတ်ထဲကို ငွေထည့်လို့မရဘူး။ ထည့်ချင်ရင် ဒေါ်လာ အသစ်ချွတ်ချွတ်မှ ထည့်လို့ရမယ်။ဒါတောင် ဒေါ်လာ ၁၀၀တန်ပဲ လက်ခံတယ်ဆိုပြီးပြောလာတယ်''ဟု Online Shoping လုပ်နေသည့်သူတစ်ဦးက ပြောသည်။
လက်ရှိအပြင်ဘဏ်များသည် နိုင်ငံခြားငွေများ ထည့်သွင်းအသုံးပြုရသည့်Visa ကတ်၊ Master ကတ်များ လျှောက်ထားရာတွင် အခက်ခဲများရှိနေပြီး နေ့စဉ်ဗဟိုဘဏ်၏ မူဝါဒများ ပြောင်းလဲနေခြင်းကြောင့် ဘဏ်ရှိဝန်ထမ်းများသည်ပင် လုပ်ကိုင်ရာတွင် ခက်ခဲမှုများရှိနေသည်ဟုလည်းသိရသည်။
စာတည်း။ ။ ဖူးသိမ်ကျ
စာမူတည်းဖြတ် ။ ။ အောင်ကျော်ဖြိုး
