ဧပြီ ၁၀
လက်ရှိ၂၀၂၂-၂၀၂၃ ဘဏ္ဍာနှစ်အတွက် စစ်ကောင်စီ၏ ဘတ်ဂျတ်သုံးစွဲမှုမှာ အာဏာမသိမ်းခင် အမျိုးသားဒီမိုကရေစီအဖွဲ့ချုပ်အစိုးရလက်ထက် ၂၀၂၀-၂၀၂၁ ဘတ်ဂျတ်သုံးစွဲမှုနှင့် နှိုင်းယှဥ်ပါက ကာကွယ်ရေးတွင် ကျပ်ဘီလီယံ ၃၀၀ခန့်တိုးမြှင့် သုံးစွဲထားပြီး ပညာရေးတွင် ကျပ်ဘီလီယံ ၇၀၀ ကျော် လျော့ချသုံးစွဲထားသည်ကို တွေ့ရသည်။
အာဏာသိမ်းခေါင်းဆောင် ဗိုလ်ချုပ်မှူးကြီး မင်းအောင်လှိုင် မတ်လ ၂၉ ရက်နေ့က လက်မှတ်ရေးထိုးသော ဘတ်ဂျက်အရ ကာကွယ်ရေးဝန်ကြီးဌာနအတွက် ကျပ်ဘီလီယံ ၃၇၀၀ကျော်၊ ပညာရေးအတွက် ကျပ်ဘီလီယံ ၂၁၀၀ကျော်၊ ကျန်းမာရေးအတွက် ကျပ်ဘီလီယံ ၈၀၀ ကျော်ဖြစ်သည်။
NLDအစိုးရလက်ထက် ၂၀၂၀-၂၀၂၁ဘဏ္ဍာရေးနှစ်အတွက်ဘတ်ဂျက်မှာ ကာကွယ်ရေးဝန်ကြီးဌာနအတွက် ကျပ်ဘီလီယံ ၃၄၀၀ကျော်၊ ပညာရေးဝန်ကြီးဌာနအတွက် ကျပ်ဘီလီယံ ၂၈၀၀ကျော်နှင့် ကျန်းမာရေးနှင့် အားကစားဝန်ကြီးဌာနအတွက် ကျပ်ဘီလီယံ ၁၄၀၀ ကျော် ဖြစ်သည်။
လျှပ်စစ်မီးပြတ်တောက်မှုဆိုးရွားစွာခံနေရသော နိုင်ငံတွင် စစ်ကောင်စီက လျှပ်စစ်နှင့်စွမ်းအင်ဝန်ကြီးဌာနအတွက် ကျပ်ဘီလီယံ ၆၀၀ ကျော်ခွင့်ပြုထားရာ NLD လက်ထက်ကထက် သိသိသာသာတိုးလာခြင်းမရှိသလို ပြည်ထဲရေးဝန်ကြီးဌာနအတွက်လည်း ကျပ်ဘီလီယံ ၅၀၀ ကျော်နှင့်ဆင်ဆင်တူသည်။
စစ်ကောင်စီဘတ်ဂျက်တွင်စီမံကိန်းနှင့် ဘဏ္ဍာရေးဝန်ကြီးဌာနက ကျပ်ဘီလီယံ ၄၀၀၀ကျော်ဖြင့် ဘတ်ဂျတ် အများဆုံး ရရှိထားပြီး ကာကွယ်ရေးဝန်ကြီးဌာနက ဒုတိယအများဆုံးဖြစ်သည်။
စစ်တပ်က အာဏာသိမ်းပြီး ဘဏ္ဍာရေးနှစ်သတ်မှတ်ချက်ကာလ ပြန်ပြင်ခဲ့ရာတွင်လည်း ၂၀၂၁အောက် တိုဘာမှ ၂၀၂၂ မတ်လအထိ ခြောက်လတာ ကြားကာလဘတ်ဂျက်တွင် ဝန်ကြီးဌာနများနှင့် ဦးစီးဌာနများအတွက် သုံးငွေစုစုပေါင်း ကျပ်ဘီလီယံ ၉၀၀၀ကျော် သုံးစွဲခဲ့သေးသည်။
