မတ် ၂၉
မြန်မာဒုက္ခသည် ၂,၀၀၀ ကို လက်ခံမည့်အပြင် ဒေါ်လာ ၉၅ သန်း အကူအညီ ပေးမည်ဟု ဩစတြေးလျ ဝန်ကြီးချုပ်က ပြောကြားသည်။
မြန်မာ့အရေး တစိုက်မတ်မတ် လှုပ်ရှား ဆောင်ရွက်နေသည့် လွှတ်တော်အမတ် ဒန်စမစ်က ဩစတြေးလျ ဝန်ကြီးချုပ် စကော့မောရစ်ဆန်၏ ပြောကြားချက်ကို ကိုးကားပြီး ၎င်း၏ လူမှုကွန်ရက် စာမျက်နှာတွင် ရေးသားထားခြင်း ဖြစ်သည်။
“ အကူအညီ လိုအပ်နေတဲ့ မြန်မာနိုင်ငံက ဒုက္ခသည် ၂,၀၀၀ ကို လူသားချင်းစာနာမှု အစီအစဉ်တွေ အရ ဗီဇာ ထုတ်ပေးမှာ ဖြစ်ပြီးတော့ လက်ရှိ ဘဏ္ဍာနှစ် အတွင်းမှာလည်း မြန်မာ ပြည်သူတွေ အတွက် အမေရိကန် ဒေါ်လာ ၉၅ သန်းကို ထောက်ပံ့ ကူညီမှာပါ ” ဟု လွှတ်တော်အမတ် ဒန်စမစ်က ရေးသားထားသည်။
ပြီးခဲ့သည့် ရက်သတ္တပတ် ကလည်း သြစတြေးလျနိုင်ငံက တပ်နှင့် ရဲ CDM များ နေထိုင်နိုင်ရန် လုပ်ဆောင် ပေးမည်ဟု ပြောကြားထားသည်။
လက်ရှိတွင် မြန်မာစစ်တပ်မှ အကြမ်းမဖက် အာဏာ ဖီဆန်ရေးလှုပ်ရှားမှု (CDM) ပြုလုပ်ခဲ့သူ အရာရှိ နှစ်ဦးကို သြစတြေးလျတွင် နေထိုင်ခွင့် ဗီဇာ ထုတ်ပေးခဲ့သည်။
