မြန်မာအမျိုးသမီးအသင်းပါဝင်မည့် ၂၀၂၀ အိုလံပစ် အာရှဇုန် ခြေစစ်ပွဲ ပထမအဆင့် ပွဲစဉ်ဇယားထွက်ပေါ်

.

စက်တင်ဘာ ၃ ။         ။ မြန်မာအမျိုးသမီး အိုလံပစ်အသင်း ပါဝင်ယှဉ်ပြိုင်မည့် (Women’s Olympic Football Tournament 2020 Asia Qualifiers Round 1) ၂၀၂၀ အိုလံပစ်အမျိုးသမီးဘောလုံးပြိုင်ပွဲ အာရှဇုန်ခြေစစ်ပွဲ ပထမအဆင့်အတွက် အုပ်စုနှင့် ပွဲစဉ်ဇယား ထွက်ပေါ်လာသည်။

၂၀၂၀ အိုလံပစ် အမျိုးသမီးဘောလုံးပြိုင်ပွဲ အာရှဇုန် ခြေစစ်ပွဲ ပထမအဆင့် အုပ်စု C တွင်  မြန်မာနိုင်ငံမှ အိမ်ရှင်အဖြစ် လက်ခံကျင်းပမည်ဖြစ်ပြီး အိမ်ရှင် မြန်မာနှင့်အတူ အိန္ဒိယ၊ နီပေါ၊ ဘင်္ဂလားဒေ့ရ်ှတို့ ပါဝင်နေသည်။

လာမည့် နိုဝင်ဘာလ ၈ ရက် မှ ၁၃ ရက်အထိ ခြေစစ်ပွဲစဉ်များကို မြန်မာနိုင်ငံတွင် လက်ခံကျင်းပသွားမည် ဖြစ်ပြီး နိုဝင်ဘာလ ၈ ရက်တွင် ဘင်္ဂလားဒေ့ရှ်၊ နိုဝင်ဘာလ ၁၁ ရက်တွင် နီပေါ၊ နိုဝင်ဘာလ ၁၃ ရက်တွင် အိန္ဒိယတို့နှင့် ယှဉ်ပြိုင်ကစားရမည်ဖြစ်သည်။

ခြေစစ်ပွဲပထမအဆင့်ကို အုပ်စု လေးစုခွဲကာ ကျင်းပမည်ဖြစ်ပြီး အုပ်စုထိပ်ဆုံးနှစ်သင်းစီနှင့် အကောင်းဆုံး တတိယရသည့် နှစ်သင်း၊ စုစုပေါင်း ၁၀ သင်းမှာ ဒုတိယအဆင့်သို့ တက်လှမ်းခွင့်ရရှိမည် ဖြစ်သည်။

ဒုတိယအဆင့်တွင် အသင့်စောင့်ကြိုနေသည့် ဗီယက်နက်၊ ဥဇဘတ်ကစ္စတန်နှင့် ပထမအဆင့်မှတက်လာသော ၁၀ သင်း၊ စုစုပေါင်း ၁၂ သင်းမှာ အုပ်စု သုံးစုခွဲကာ ဆက်လက်ယှဉ်ပြိုင်ကစားကြမည်ဖြစ်ပြီး အုပ်စုဗိုလ် ၃ သင်း မှာ တတိယအဆင့်သို့ တက်လှမ်းခွင့်ရမည်ဖြစ်သည်။

တတိယအဆင့်တွင် အသင့်စောင့်ကြိုနေသည့် သြစတြေးလျ၊ မြောက်ကိုရီးယား၊ တရုတ်၊ တောင်ကိုရီးယား၊ ထိုင်း စသည့် အသင်း ငါးသင်းနှင့် ဒုတိယအဆင့်မှ တက်လာသည့် အသင်း သုံးသင်း၊ စုစုပေါင်း ရှစ်သင်းမှာ အုပ်စု နှစ်စုစီခွဲပြီး ဆက်လက် ယှဉ်ပြိုင်ကစားကြမည်ဖြစ်သည်။ အုပ်စုတစ်ခုစီမှ ပထမနှင့် ဒုတိယ နှစ်သင်း၊ စုစုပေါင်း လေးသင်းမှာ စတုတ္ထအဆင့်သို့ တက်လှမ်းခွင့်ရမည် ဖြစ်သည်။

စတုတ္ထအဆင့်တွင် တဖက်အုပ်စုဗိုလ် နှစ်သင်းနှင့် အခြားတဖက်အုပ်စုမှ ဒုတိယ နှစ်သင်းတို့ အိမ်၊ အဝေး ယှဉ်ပြိုင်ကစားရမည် ဖြစ်ပြီး အနိုင်ရသည့် နှစ်သင်းမှာ ခြေစစ်ပွဲအောင်မြင်မည်ဖြစ်သည်။

၂၀၂၀ အိုလံပစ်ပြိုင်ပွဲကို ၂၀၂၀ ခုနှစ် ဇူလိုင် ၂၂ မှ သြဂုတ် ၈ ထိ ဂျပန်နိုင်ငံက အိမ်ရှင်အဖြစ် လက်ခံကျင်းပ မည် ဖြစ်ပြီး အိမ်ရှင် ဂျပန်အမျိုးသမီးအသင်းမှာ အလိုအလျောက် ခြေစစ်ပွဲ အောင်မြင်ထားသည်။